വ്യാജ കാസ്റ്റിംഗ് കോൾ: ജാഗ്രതാ നിർദ്ദേശവുമായി ആശിർവാദ് സിനിമാസ്

കൊച്ചി: ആശിർവാദ് സിനിമാസിന്റെ പേരിൽ അനധികൃതമായി കാസ്റ്റിംഗ് കാളുകളും ഓഡിഷൻ അറിയിപ്പുകളും പ്രചരിക്കുന്നതിനെതിരെ മുന്നറിയിപ്പുമായി കമ്പനി. ആശിർവാദ് സിനിമാസ് പോസ്റ്റുചെയ്ത പോസ്റ്റ് നടൻ മോഹൻലാൽ തന്റെ സോഷ്യൽ മീഡിയയിൽ പങ്കുവെച്ചിട്ടുണ്ട്. ഇത്തരം വ്യാജ സന്ദേശങ്ങൾ അയക്കുന്നതിനോ നിയമനത്തിന് പണം ആവശ്യപ്പെടുന്നതിനോ യാതൊരു ഏജൻസിയെയും വ്യക്തിയെയും കമ്പനി ചുമതലപ്പെടുത്തിയിട്ടില്ലെന്ന് കമ്പനി പബ്ലിക് നോട്ടീസിലൂടെ വ്യക്തമാക്കി. ഇത്തരം തട്ടിപ്പുകൾക്കെതിരെ ഔദ്യോഗികമായി പരാതി നൽകിയിട്ടുണ്ടെന്നും അന്വേഷണം ആരംഭിച്ചതായും കമ്പനി അറിയിച്ചു.

സിവിൽ, ക്രിമിനൽ നടപടികൾ ഉൾപ്പെടെയുള്ള നിയമവഴികളിലൂടെ കുറ്റക്കാർക്കെതിരെ ശക്തമായി നീങ്ങാനാണ് ആശിർവാദ് സിനിമാസിന്റെ തീരുമാനം. അനധികൃതമായ ഇത്തരം സന്ദേശങ്ങളോട് പ്രതികരിക്കുന്നവർ സ്വന്തം ഉത്തരവാദിത്തത്തിൽ വേണം അത് ചെയ്യാൻ എന്നും, അതിലൂടെയുണ്ടാകുന്ന സാമ്പത്തിക നഷ്ടങ്ങൾക്കോ വിവരങ്ങൾ ദുരുപയോഗം ചെയ്യുന്നതിനോ കമ്പനി ഉത്തരവാദികളായിരിക്കില്ലെന്നും നോട്ടീസിൽ പറയുന്നു. ഔദ്യോഗിക അറിയിപ്പുകൾ കമ്പനിയുടെ വെരിഫൈഡ് ചാനലുകളിലൂടെ മാത്രമേ ഉണ്ടാകൂ എന്നും പൊതുജനങ്ങൾ ജാഗ്രത പാലിക്കണമെന്നും നിർമ്മാതാക്കൾ ആവശ്യപ്പെട്ടു.