"ജയിച്ചുകഴിയുമ്പോൾ വരണം"; ​മുഖ്യമന്ത്രിയെ കാണാനെത്തി മുണ്ടക്കൈ ദുരന്തബാധിതർ

ധർമടം: ഒറ്റരാത്രികൊണ്ട് സർവതും നഷ്ടപ്പെട്ട ജനതയെ നെഞ്ചോട് ചേർത്ത് സംരക്ഷിച്ച സർക്കാരിന്റെ നായകനെ നേരിട്ട് കാണാൻ അവരെത്തി. പറഞ്ഞറിയിക്കാനാകാത്ത സ്നേഹവും നന്ദിയും പങ്കുവെക്കാനായിരുന്നു മുണ്ടക്കൈ- ചൂരൽമല ഉരുൾപൊട്ടലിന്റെ ദുരന്തബാധിതർ മുഖ്യമന്ത്രി പിണറായി വിജയനെ ധർമടത്തെത്തി കണ്ടത്. പിണറായിയിലെ കൺവെൻഷൻ സെന്ററിൽവെച്ചായിരുന്നു കൂടിക്കാഴ്ച.

​ദുരന്തബാധിതരുടെ പ്രതിനിധികളായി 13 പേരാണ് എത്തിയത്. കൽപ്പറ്റയിൽ സർ‌ക്കാർ ഒരുക്കിയ ടൗൺഷിപ്പിലേക്ക് താമസം മാറാനൊരുങ്ങുകയാണ് ഇവർ. തെരഞ്ഞെടുപ്പിന് ശേഷം ഓരോരുത്തരും വീടുകളിൽ കയറി താമസിക്കുമ്പോൾ മുഖ്യമന്ത്രികൂടി എത്തണം എന്ന് ആവശ്യപ്പെട്ടു. പൂർത്തിയായതും നിർമാണം പുരോ​ഗമിക്കുന്നതുമായ വീടുകളെക്കുറിച്ച് മുഖ്യമന്ത്രി ചോദിച്ചറിഞ്ഞു.

സർക്കാർ തങ്ങളെ ചേർത്ത് പിടിച്ചെന്നും തങ്ങള്‍ക്കെല്ലാം നൽകിയെന്നും ദുരന്തബാധിതർ മാധ്യമങ്ങളോട് പ്രതികരിച്ചു. ജയിച്ചുകഴിയുമ്പോൾ മക്കളുടെ അടുത്തേക്ക് വരണമെന്ന് മുഖ്യമന്ത്രിയോട് പറഞ്ഞു. പരാതികളൊന്നുമില്ല, സർക്കാർ നന്നായി എല്ലാ കാര്യങ്ങളും ചെയ്തു. ഉടനെ താമസം തുടങ്ങും- ദുരന്തത്തില്‍ തന്‍റെ മൂന്ന് മക്കളെയും നഷ്ടപ്പെട്ട സയന പറഞ്ഞു.

ടൗൺഷിപ്പിലേക്ക് എല്ലാവരും ഒരുമിച്ച് താമസം തുടങ്ങാനാണ് പദ്ധതി. ആദ്യഘട്ടമായി 178 വീടുകളുടെ താക്കോൽദാനം മാർച്ച് രണ്ടിന് മുഖ്യമന്ത്രി നിർവഹിച്ചിരുന്നു. ഏഴ് സെന്റിന്റെ പട്ടയവും നൽകിയിട്ടുണ്ട്.