ഇ– ചെല്ലാൻ പോർട്ടൽ തകരാറിൽ, പിഴയടയ്ക്കാൻ സാധിക്കുന്നില്ല; കുരുക്കിലായി വാഹന ഉടമകൾ

തിരുവനന്തപുരം : ​ഗതാ​ഗത നിയമലംഘനങ്ങൾക്ക് പിഴയടയ്ക്കേണ്ട ഇ ചെല്ലാൻ പോർട്ടൽ തകരാറിലായതോടെ കുരുക്കിലായി വാഹന ഉടമകൾ. പിഴയൊടുക്കി ഫിറ്റ്നസ് നടത്താൻ സാധിക്കാത്തതോടെ ഓണക്കാലത്ത് ടാക്സി അടക്കമുള്ള വാഹന ഉടമകൾ പ്രശ്നത്തിലായി. തൽസ്ഥിതി തുടരുകയാണെങ്കിൽ ഓണത്തിനു മുമ്പ് പണമടച്ച് വാ​ഹനം നിരത്തിലിറക്കാൻ സാധിക്കില്ല.

കോടതിക്ക് കൈമാറിയ കേസുകൾ പൊലീസ് മോട്ടോർവാഹന വകുപ്പ് ഓഫീസുകളിൽ തിരിച്ചെടുത്താണ് പിഴയൊടുക്കാൻ സൗകര്യമൊരുക്കുന്നത്. പോർട്ടൽ തകരാറിലായതുകാരണം ഇതിനു കഴിയുന്നില്ല. കോടതിക്ക് കൈമാറിയ കേസുകൾ തിരിച്ചെടുക്കാതെ ഓൺലൈനിൽ പിഴയടയ്ക്കാനാകില്ല.

തകരാറിലായി മൂന്ന് ദിവസമായിട്ടും കാര്യമായ ഇടപെടലൊന്നും അധികൃതരുടെ ഭാ​ഗത്തുനിന്ന് ഉണ്ടായിട്ടില്ല.