മോഷണത്തിനിടെ ഒന്നാം നിലയില്‍ നിന്ന്‌ ചാടി; കാലൊടിഞ്ഞ് പിടിയിലായി

കാസർകോട്: നാട്ടുകാർ വളഞ്ഞപ്പോള്‍ കെട്ടിടത്തിന്റെ ഒന്നാം നിലയില്‍നിന്ന്‌ ചാടി രക്ഷപ്പെടാൻ ശ്രമിച്ച കുപ്രസിദ്ധ മോഷ്ടാവ് തൊരപ്പന്‍ സന്തോഷ് കാലൊടിഞ്ഞ് പൊലീസ് പിടിയിലായി. വെള്ളിയാഴ്ച പുലർച്ചെ മേൽപ്പറമ്പ് പഴയ മിൽമ ബൂത്തിന് സമീപത്തെ കാഷ് മാർട്ട് ഹൈപ്പർ മാർക്കറ്റിൽ കവർച്ചയ്‌ക്കെത്തിയപ്പോൾ നാട്ടുകാരിൽനിന്ന് രക്ഷപ്പെടാനായി ഒന്നാം നിലയിൽനിന്ന് ചാടുകയായിരുന്നു.

നിരവധി കവർച്ചക്കേകേസുകളിൽ പ്രതിയായ സന്തോഷ് കുടിയാന്മല പൊലീസ്‌സ്റ്റേഷൻ പരിധിയിലാണ് താമസം. വ്യാഴം രാത്രി ഒമ്പതോടെയാണ് മേൽപ്പറന്പിലെത്തിയത്‌. പുലർച്ചെയോളം കുറ്റിക്കാട്ടിൽ മറഞ്ഞുനിന്നശേഷം ഹൈപ്പർ മാർക്കറ്റിന്റെ ഷട്ടർ പൂട്ടുപൊളിച്ച് ഉള്ളിൽ കടന്നു. ക്യാഷ് കൗണ്ടറിൽനിന്ന്‌ 3,000 രൂപ കൈക്കലാക്കിയാണ് രക്ഷപ്പെടാൻ ശ്രമിച്ചത്. കടയുടെ സമീപം പാർക്കുചെയ്ത ബൈക്കുകൾ എടുക്കാനായി എത്തിയ യുവാക്കൾ ശബ്ദംകേട്ടതോടെ നാട്ടുകാരെ അറിയിച്ചു. പരിസരവാസികൾ വളഞ്ഞതോടെ സന്തോഷ് ഒന്നാം നിലയിൽനിന്ന് താഴേക്ക് ചാടി. ചാട്ടത്തിൽ കാലൊടിഞ്ഞതിനാൽ രക്ഷപ്പെടാനായില്ല. സ്ഥാപന ഉടമ കെ അനൂപ് നൽകിയ പരാതിയിൽ മേൽപ്പറമ്പ് പൊലീസ് കേസെടുത്തു. കേരളത്തിൽ പലയിടത്തായി മോഷണം നടത്തിയ സന്തോഷ് പലവട്ടം പൊലീസ് പിടിയിലായിട്ടുണ്ട്.