ക്ഷീര കർഷകന് ഇൻഷുറൻസ് നിഷേധിച്ചു: നഷ്ടപരിഹാരം നൽകാൻ ഉത്തരവിട്ട് ഉപഭോക്തൃ കമീഷൻ

പാലക്കാട്: ക്ഷീര കർഷകന് ഇൻഷുറൻസ് നിഷേധിച്ച കമ്പനിയോട് 1,30,000 രൂപ നഷ്ടപരിഹാരം നൽകാൻ ഉത്തരവിട്ട് ഉപഭോക്തൃ കമീഷൻ. പ്രസിഡന്റ് കെ മോഹൻദാസ്, അംഗങ്ങളായ പ്രീതി ശിവരാമൻ, സി വി മുഹമ്മദ് ഇസ്മായിൽ എന്നിവരടങ്ങിയ കമീഷന്റേതാണ് ഉത്തരവ്. ഇൻഷുറൻസ് തുകയായി 70,000 രൂപയും നഷ്ടപരിഹാരമായി 50,000 രൂപയും കോടതി ചെലവ് ഇനത്തിൽ 10,000 രൂപയും നൽകാനാണ് കമീഷൻ ഉത്തരവിട്ടത്. മങ്കട തയ്യിൽ സ്വദേശിയും ക്ഷീര കർഷകനുമായ തയ്യിൽ ഇസ്മായിൽ നൽകിയ പരാതിയിലാണ് വിധി.

പാലക്കാട് നിന്നും 70,000 രൂപ നൽകിയാണ് പരാതിക്കാരൻ പശുവിനെ വാങ്ങിയത്. പശു പ്രസവിച്ച് രണ്ടാഴ്ചയ്ക്ക് ശേഷം രോ​ഗം ബാധിച്ചു. ചികിത്സ നൽകിയെങ്കിലും പശു ചത്തു. ഇൻഷുർ ആവശ്യത്തിനായി പശുവിനെ പരിശോധിച്ച അതേ ഡോക്ടർ തന്നെയാണ് പോസ്റ്റ്‌മോർട്ടം നടത്തിയത്. ഇൻഷുറൻസ് കമ്പനിക്ക് നൽകുന്നതിനായി പശുവിന്റെ ഫോട്ടോ എടുത്തപ്പോൾ ടാഗ് കാണുന്നതിനായി ഇടതുവശം ചെവിയോട് ചേർത്തു വെച്ചാണ് ഫോട്ടോ എടുത്തത്. എന്നാൽ ടാഗ് പതിച്ചിരുന്നത് വലത് വശം ചെവിയിലായിരുന്നെന്ന കാരണം പറഞ്ഞ് കമ്പനി ഇൻഷുറൻസ് നിഷേധിച്ചു.

വെറ്റിനറി ഡോക്ടർ വസ്തുതകൾ വിവരിച്ചുള്ള രേഖ നൽകിയെങ്കിലും ഇൻഷുറൻസ് തുക നൽകിയില്ല. തുടർന്നാണ് ഉപഭോക്തൃ കമ്മീഷനിൽ പരാതി നൽകിയത്. പശുവിന് ഇൻഷുറൻസ് പോളിസി എടുക്കുമ്പോൾ പരിശോധിക്കുകയും പോസ്റ്റ് മോർട്ടം നടത്തുകയും ചെയ്ത വെറ്റിനറി ഡോക്ടർ കമ്മീഷൻ മുമ്പാകെ ഹാജരായി മൊഴി നൽകി. തെളിവുകൾ പരിശോധിച്ച കമീഷൻ ക്ഷീര കർഷകന്റെ ഇൻഷുറൻസ് ആനുകൂല്യം ഏഴുമാസം വൈകിയത് ഗുരുതരമായ സേവനത്തിലെ വീഴ്ചയാണെന്ന് കണ്ടെത്തി. തുടർന്ന് മൊത്തം 1,30,000 രൂപ നൽകാൻ കമീഷൻ ഉത്തരവിട്ടു. ഒരു മാസത്തിനകം വിധി നടപ്പിലാക്കിയല്ലെങ്കിൽ ഒൻപത് ശതമാനം പലിശയും നൽകണം.