കോവിഡാനന്തരം ഹെൽത്ത്​ സപ്ലിമെന്റ്​സ്​ ഉപഭോഗം വർധിക്കുന്നു; ജാഗ്രത വേണമെന്ന്​ ആരോഗ്യ വിദഗ്​ധർ

കോഴിക്കോട്​: ശരീരത്തിനുവേണ്ട പോഷകാംശങ്ങൾ നൽകുന്ന ഹെൽത്ത്​ സപ്ലിമെന്റ്​സ്​ ഗുളികകളുടെ ഉപഭോഗം കോവിഡാനന്തരം സംസ്ഥാനത്ത്​ വർധിക്കുന്നു. പ്രതിവർഷം 10 ശതമാനം വർധനയാണ്​ ഇ‍ൗ ഗുളികകളുടെ വിൽപ്പനയിലുള്ളത്​. ഡോക്ടർമാർ നിർദേശിക്കുന്നതിന്​ പുറമെ സമൂഹമാധ്യമങ്ങൾ വഴിയുള്ള പ്രചാരണത്തിലൂടെയാണ്​ ഉപഭോഗം. എന്നാൽ പരിശോധന നടത്താതെ മരുന്നുകൾ സ്വയം കഴിക്കുന്നത്​ ആരോഗ്യ പ്രശ്നങ്ങളുണ്ടാക്കുമെന്ന്​ ആരോഗ്യ പ്രവർത്തകർ ഓർമിപ്പിക്കുന്നു.

വിറ്റാമിൻ സി, ഡി, ഇ, ഒമേഗ ത്രീ ഫാറ്റി ആസിഡ്​ തുടങ്ങിയ വിറ്റാമിനുകളും മിനറലുകളുമാണ്​ വിറ്റഴിയുന്നത്​. കോവിഡിനുശേഷമുണ്ടായ ചില ആരോഗ്യ പ്രശ്നങ്ങൾക്ക്​ പരിഹാരമായി ഡോക്ടർമാർ വഴിയും നേരിട്ടും പലരും സപ്ലിമെന്റുകളെ ആശ്രയിച്ചിരുന്നു. ഇതോടൊപ്പം സമൂഹമാധ്യമ പ്രചാരണം ശക്തിപ്പെട്ടതോടെയാണ്​ ആവശ്യക്കാർ കൂടിയത്​. വ്ലോഗർമാർ പരസ്യമായും അല്ലാതെയും സപ്ലിമെന്റുകളുടെ റീലുകളും വീഡിയോയും ചെയ്യുന്നുണ്ട്​. സപ്ലിമെന്റ്​ ഉപഭോഗം കൂടുന്നുണ്ടെന്ന്​ വിപണിയിലെ കണക്കുകൾ സൂചിപ്പിക്കുന്നതായി ഓൾ കേരള കെമിസ്​റ്റ്സ്​ ആൻഡ്​​ ഡ്രഗിസ്​റ്റ്​സ്​ അസോസിയേഷൻ സംസ്ഥാന പ്രസിഡന്റ്​ എ എൻ മോഹനൻ പറയുന്നു. ‘കേരളത്തിൽ ഒരുവർഷം 15,000 കോടി രൂപയുടെ മരുന്നാണ്​ വിറ്റഴിയുന്നത്​. ഇതിൽ 500 കോടിയോളം രൂപയുടെ വിൽപ്പനയും സപ്ലിമെന്റുകളാണ്​’– അദ്ദേഹം പറഞ്ഞു.

വെള്ളത്തിൽ ലയിക്കുന്ന വിറ്റാമിനുകളായ സി, ബി എന്നിവ മൂത്രത്തിലൂടെ പുറത്തുപോവുമെങ്കിലും സ്ഥിരമായി കഴിച്ചാൽ ഞരമ്പ്​ രോഗങ്ങൾ, തിമിരം തുടങ്ങിയവയ്​ക്ക്​ കാരണമാകുമെന്ന്​ ഡോക്ടർമാർ പറയുന്നു. കൊഴുപ്പിൽ ലയിക്കുന്ന വിറ്റാമിൻ ഡി, ഇ, കെ എന്നിവയും സ്ഥിരമാക്കിയാൽ മൂത്രക്കല്ല്​, കിഡ്​നിയിൽ നീര്​, വിശപ്പില്ലായ്മ, ​ ഹൃദയാഘാതം, കാഴ്​ച മങ്ങൽ, പ്രോസ്​റ്റേറ്റ്​ ക്യാൻസർ തുടങ്ങിയവയ്​ക്ക്​ സാധ്യതയുണ്ട്​.

ഡയറ്റാണ്​ പ്രധാനം, സ്വയം ചികിത്സ വേണ്ട

ഒരു സപ്ലിമെന്റും സ്വന്തം തീരുമാനത്തിൽ കഴിക്കരുത്​. ഡോക്ടർ പരിശോധിച്ച്​ മാത്രമാണ്​ സപ്ലിമെന്റുകൾ എഴുതുന്നത്​. അല്ലാതെ കഴിക്കേണ്ട കാര്യമില്ല. ഭക്ഷണരീതിയാണ്​ പ്രധാനം. ശരീരത്തിനുവേണ്ട പോഷകാംശങ്ങൾ ഭക്ഷണത്തിലൂടെയാണ്​ ശരീരത്തിൽ എത്തേണ്ടത്​. ഒരു മാനദണ്ഡവുമില്ലാതെ സപ്ലിമെന്റുകൾ കഴിച്ചാൽ പ്രത്യാഘാതങ്ങൾ ഉണ്ടാകാൻ സാധ്യതയുണ്ട്​.

– ഡോ. വി കെ ഷമീർ (അസി. പ്രൊഫ. ജനറൽ മെഡിസിൻ, കോഴിക്കോട്​ ഗവ. മെഡിക്കൽ കോളേജ്​)