ബിജെപിയിലേക്കുള്ള വഴിയുടെ പേരാണ് കോൺ​ഗ്രസ്; ചരിത്രം ഓർമ്മിപ്പിച്ച് എം സ്വരാജ്

കൊച്ചി: ബിജെപിയിലേക്കുള്ള വഴിയുടെ പേരായി കോൺ​ഗ്രസ് മാറിയെന്നും തെരഞ്ഞെടുപ്പിൽ തോറ്റാലും ജയിച്ചാലും ബിജെപിയിൽ ചേരുന്ന പാർടിയായി കോൺ​ഗ്രസ് മാറിയെന്നും സിപിഐ എം സംസ്ഥാന സെക്രട്ടറിയറ്റം​ഗം എം സ്വരാജ്. കോൺ​ഗ്രസ് ഫോർ ബിജെപിയാണ്. കോൺ​ഗ്രസ് വഴി ബിജെപിയിലേക്ക് പോകും. കോൺ​ഗ്രസ് എന്നത് ബിജെപിയിലേക്കുള്ള വഴിയുടെ പേരാണ്, പാർടിയുടെ പേരല്ല. ബിജെപിയിലേക്കുള്ള പാത ഇന്ന് കോൺ​ഗ്രസ് എന്ന് അറിയപ്പെടുന്നെന്നേ ഉള്ളൂ എന്നും സ്വരാജ് വാർത്താസമ്മേളനത്തിൽ പറഞ്ഞു.

ബിജെപി അധികാരത്തിലെത്താൻ കോൺഗ്രസ് ജയിച്ചാലും മതി എന്നാണ് ചരിത്രം. 2019ലും 2022ലും ​ഗോവയിൽ കൈപ്പത്തി അടയാളത്തിൽ മത്സരിച്ച് ജയിച്ച എംഎൽഎമാരാണ് ബിജെപിയിൽ ചേക്കേറിയത്. 2016ൽ അരുണാചൽ പ്രദേശിൽ കോൺ​ഗ്രസ് സ്ഥാനാർഥികളായി മത്സരിച്ച് വിജയിച്ച 43 എംഎൽഎമാരാണ് ബിജെപിയിലെത്തിയത്. അരുണാചൽ പ്രദേശിൽ കോൺ​ഗ്രസ് ഇല്ലാതായത് അങ്ങനെയാണ്.

2019ൽ കർണാടകയിലും 2016ൽ ഉത്തരാഖണ്ഡിലും കോൺ​ഗ്രസ് എംഎൽഎമാരാണ് ബിജെപിയിൽ ചേർന്നത്. ഉത്തരാഖണ്ഡിലായാലും കർണാടകയിലായാലും ​ഗോവയിലായാലും അരുണാചൽപ്രദേശിലായാലും ജയിച്ച കോൺ​ഗ്രസാണ് ബിജെപിയിൽ പോയത്. തോറ്റാൽ ബിജെപിൽ ചേരുമെന്നതുമാത്രമല്ല ജയിച്ചാലും ബിജെപിയിൽ ചേരും. കോൺ​ഗ്രസ് മുഖ്യമന്ത്രിമാരായ ഒരു ഡസന്‍ പേരാണ് ബിജെപിയിലേക്ക് കടന്നുചെന്നത്. നിലവിലെ നാല് മുഖ്യമന്ത്രിമാർ കോൺ​ഗ്രസിൽ നിന്ന് ബിജെപിയിലെത്തിയവരാണ്. കേരളത്തിൽ കോൺ​ഗ്രസ് തോറ്റൽ, കോൺ​ഗ്രസ് ബിജെപിയിലേക്ക് പോകുമെന്ന് ഉത്കണ്ഠപ്പെടുന്നവർ ഈ ചരിത്രം അറിയണം. തോറ്റാൽ ബിജെപിയിൽ പോകുന്നതിനേക്കാൾ ജയിച്ചാലാണ് ബിജെപിയിലേക്ക് പോകാൻ സാധ്യതയെന്നും അദ്ദേഹം പറഞ്ഞു.