വർ​ഗീയത ഏത് രൂപത്തിലുള്ളതായാലും വിനാശകരം; ​ശ്രീനാരായണ ​ഗുരുവിനെപ്പോലും സ്വന്തമാക്കാൻ ശ്രമം: മുഖ്യമന്ത്രി

തിരുവനന്തപുരം: സമൂഹത്തിൽ വർ​ഗീയത വളർത്തി മനുഷ്യരെ ഭിന്നിപ്പിക്കാൻ ബോധപൂർവമായ ശ്രമങ്ങൾ നടക്കുന്നുവെന്ന് മുഖ്യമന്ത്രി പിണറായി വിജയൻ പറഞ്ഞു. അന്ധവിശ്വാസങ്ങളും അനാചാരങ്ങളും കേരളത്തിൽ തൂത്തെറിയാൻ കഴിഞ്ഞത് നവോത്ഥാന ആശയങ്ങൾ ശക്തമായി പ്രചരിപ്പിച്ചതിന്റെ ഭാ​ഗമായാണ്. പക്ഷേ, ഇവിടെയും പിന്തിരപ്പൻ ആശയങ്ങൾ വേരരുപിടിപ്പിക്കാനുള്ള ശ്രമങ്ങൾ നടക്കുന്നു എന്നത് ​ഗൗരവമായി കാണണം. വർ​ഗീയത ഏത് രൂപത്തിലുള്ളതായാലും സമൂഹത്തിന് വിനാശകരാണ്. വർ​ഗീയതയുടെ വിഷവിത്തുക്കൾ മനുഷ്യമനസുകളിൽ നട്ടുപിടിപ്പിക്കാൻ ശ്രമിക്കുന്നുവരെ തിരിച്ചറിയാനാകണമെന്നും മുഖ്യമന്ത്രി പറഞ്ഞു. പെരിങ്ങമ്മല എസ്‌എൻ ജങ്‌ഷനിലെ ശ്രീനാരായണീയം കൺവൻഷൻ സെന്റർ ഉദ്‌ഘാടനം ചെയ്യുകയായിരുന്നു അദ്ദേഹം.

കേരളത്തിന് വെളിച്ചം പകർന്ന ശ്രീനാരായണ​ ഗുരുവിനെപ്പോലും സ്വന്തമാക്കാൻ വർ​ഗീയ ശക്തികൾ ശ്രമിക്കുന്നുണ്ട്. എന്നും വർ​ഗീയതയെ എതിർത്ത ​ഗുരുശ്രേഷ്ഠനാണ് ശ്രീനാരായണ ​ഗുരു. മനുഷ്യരെ ഭിന്നിപ്പിക്കാനല്ല, ഒരുമിപ്പിക്കാനാണ് ​ഗുരു പഠിപ്പിച്ചത്. ​ഗുരുവിന്റെ വാക്കും പ്രവർത്തനങ്ങളും ഒരു മതത്തിലോ ജാതിയിലോ ഒതുങ്ങുന്നതല്ല. സനാതന ധർമ പ്രചാരകർക്ക് എതിർദിശയിലാണ് ​ഗുരു എപ്പോഴും നിലകൊണ്ടത്.

​ഗുരുവിന്റെ ദർശനങ്ങൾ പ്രായോ​ഗികമായി നടപ്പിലാക്കുന്നതിന് എസ്എൻഡിപി യോ​ഗം വഹിച്ച മുൻകൈ വിവരാണീതതമാണ്. പിന്നാക്കം നിൽക്കുന്ന ജനങ്ങളുടെ ആത്മാഭിമാനം തിരിച്ചുപിടിക്കാൻ വലിയ പ്രവർത്തനമാണ് സംഘടന നടത്തിയത്. വിദ്യാഭ്യാസം, തൊഴിൽ, സാമൂഹ്യ പദവി ഇവയെല്ലാം ലഭ്യമാക്കാനും യോ​ഗം അക്ഷീണം പ്രയത്നിച്ചു. അതിനൊക്കെ നല്ല ഫലവുമുണ്ടായെന്നും മുഖ്യമന്ത്രി പറഞ്ഞു.