ചെന്നിത്തല വിലപേശുന്നയാളല്ലെന്ന് വേണു​ഗോപാൽ; അരമണിക്കൂറിലേറെ നീണ്ട നിർണായക കൂടിക്കാഴ്ച

തിരുവനന്തപുരം: മുഖ്യമന്ത്രിക്കസേരയ്ക്കുവേണ്ടിയുള്ള പോരിൽ പിന്തള്ളപ്പെട്ടുപോയ എഐസിസി ജനറൽ സെക്രട്ടറി കെ സി വേണു​ഗോപാലും രമേശ് ചെന്നിത്തലയും തമ്മിൽ കൂടിക്കാഴ്ച നടത്തി. തിരുവനന്തപുരം വഴുതക്കാടുള്ള ചെന്നിത്തലയുടെ വസതിയിലായിരുന്നു കൂടിക്കാഴ്ച. അരമണിക്കൂറിലേറെ കൂടിക്കാഴ്ച നീണ്ടു.

ചെന്നിത്തലയുടെ ആവശ്യങ്ങൾ അം​ഗീകരിച്ചോ എന്ന മാധ്യമങ്ങളുടെ ചോദ്യത്തിന്, എന്തെങ്കിലും തരത്തിൽ വിലപേശുന്നയാളല്ല ചെന്നിത്തലയെന്ന് വേണു​ഗോപാൽ പറഞ്ഞു. ചെന്നിത്തല എന്ത് ആ​ഗ്രഹിക്കുന്നോ അതുണ്ടാകും. കോൺ​ഗ്രസിന്റെ ഉന്നതനായ നേതാവാണ് ചെന്നിത്തല. അദ്ദേഹത്തിന്റെ വാക്കുകൾക്ക് വിലയുണ്ടാകും. മന്ത്രിമാരുടെ ലിസ്റ്റ് വരുമ്പോൾ അത് ബോധ്യപ്പെടുമെന്നും വേണു​ഗോപാൽ പറഞ്ഞു.

എന്നും കോൺ​ഗ്രസുകാരനാണ് താനെന്നും,.പാർടി പറയുന്ന കാര്യങ്ങൾ അതേപടി ചെയ്യുമെന്നും ചെന്നിത്തല മാധ്യമങ്ങളോട് പ്രതികരിച്ചു. എന്നാൽ നിലവിലെ ചർച്ചകളിൽ തൃപ്തനാണോ എന്ന ചോദ്യത്തിന് അദ്ദേഹം മറുപടി നൽകിയില്ല.

മന്ത്രിസഭയിൽ ചെന്നിത്തലയ്ക്ക് നിർണായക വകുപ്പ് ലഭിക്കുന്നതിനും വേണു​ഗോപാൽ വിഭാ​ഗക്കാരായ എംഎൽഎമാർക്ക് മന്ത്രിസ്ഥാനം ഉറപ്പിക്കുന്നതിനും ഇരുനേതാക്കളും തമ്മിൽ ധാരണയായെന്നാണ് സൂചന.

തന്നെ പിന്തുണയ്ക്കുന്ന അൻവർ സാദത്തിനെയും ഐ സി ബാലകൃഷ്നെയും മന്ത്രിസഭയിൽ ഉൾപ്പെടുത്തണമെന്ന നിബന്ധനയും ചെന്നിത്ത മുന്നോട്ടുവെച്ചു. പ്രധാന വകുപ്പുകളിൽ വേണു​ഗോപാലും പിടിമുറുക്കിയിട്ടുണ്ട്. അഞ്ചുമുതൽ ഏഴുവരെ മന്ത്രിസ്ഥാനംവരെ നേടാനാണ് വേണു​ഗോപാൽ പക്ഷം ശ്രമിക്കുന്നത്.

മുസ്ലിം ലീഗിന്‌ അഞ്ച്‌ മന്ത്രിസ്ഥാനം ധാരണയായിട്ടുണ്ട്. എന്നാൽ മറ്റ് ഘടകകക്ഷികളുടെ കാര്യത്തിൽ മന്ത്രിത്തർക്കം കടുത്ത ഭിന്നതയിലേക്ക്‌ നീങ്ങുകയാണ്. മുഖ്യമന്ത്രി ഉൾപ്പെടെ കോൺഗ്രസിനുള്ള 11 മന്ത്രിമാരിൽ ഗ്രൂപ്പും സാമുദായിക സമവാക്യങ്ങളും പരിഗണിക്കാനാകാത്ത സ്ഥിതിയാണ്.