തിരുവനന്തപുരത്ത് ഗവേഷണ വിദ്യാർഥിനിക്ക് ലഭിച്ച പാഴ്സലിൽ കഞ്ചാവ്‌ പൊതി

കഴക്കൂട്ടം : ഗവേഷണ വിദ്യാർഥിനിക്ക് ലഭിച്ച പാഴ്സലിൽ കഞ്ചാവ്‌ പൊതി. കാര്യവട്ടം ക്യാമ്പസിലെ മലയാളം വിഭാഗത്തിലെ ഗവേഷണ വിദ്യാർഥിനിക്ക് എത്തിയ പാഴ്സലിലാണ് കഞ്ചാവ് പൊതി കിട്ടിയത്. പോസ്റ്റോഫീസ് വഴി കോഴിക്കോട് സ്വദേശി ശ്രീലാൽ എന്ന പേരിൽനിന്നാണ് പാഴ്സൽ വന്നത്.

4 ഗ്രാം കഞ്ചാവാണ് പൊതിയിലുള്ളത്. ഉടൻ കോളേജ് ഡിപ്പാർട്ട്മെന്റ് അധികാരിയെ വിവരം അറിയിച്ചു. കോളേജ് അധികൃതർ ശ്രീകാര്യം പൊലീസിലും അറിയിച്ചു. പൊലീസ് ക്യാമ്പസിലെത്തി പരിശോധന നടത്തി. വിദ്യാർഥിനിയുടെ മൊഴി രേഖപ്പെടുത്തി കേസെടുത്തു. സംഭവത്തെക്കുറിച്ച് വിശദമായ അന്വേഷണം നടത്തുമെന്ന് പൊലീസ് പറഞ്ഞു.