പിഎഫ് മാറുന്നതിന് കൈക്കൂലി: ഹെഡ്മാസ്റ്റർ വിജിലൻസ് പിടിയിൽ

വടകര : പിഎഫ് അക്കൗണ്ടിലെ തുക മാറി കൊടുക്കുന്നതിന് കൈക്കൂലി വാങ്ങിയ സ്കൂൾ ഹെഡ്മാസ്റ്റർ പിടിയിൽ. കോഴിക്കോട് ജില്ലയിലെ വടകര പാക്കയിൽ ജെബി യുപി സ്കൂൾ ഹെഡ്മാസ്റ്ററായ ഇ വി രവീന്ദ്രനെയാണ് വിജിലൻസ് പിടികൂടിയത്. 10,000 രൂപയും 90,000 രൂപയുടെ ചെക്കും ഉൾപ്പടെ 1,00,000 രൂപയാണ് കൈക്കൂലി വാങ്ങിയത്.

ഇതേ സ്കൂളിലെ അധ്യാപികയായ പരാതിക്കാരി പിഎഫ് അക്കൗണ്ടിൽ നിന്നും 3 ലക്ഷം രൂപ നോൺ റീഫണ്ടബിൾ അഡ്വാൻസായി ലഭിക്കുന്നതിന് അപേക്ഷ നൽകിയിരുന്നു. ഹെഡ് മാസ്റ്റർ പിഎഫ് അക്കൗണ്ട് മാറി നൽകുന്നതിനുള്ള നടപടി ക്രമം ചെയ്യുന്നതിന് 1 ലക്ഷം രൂപ കൈകൂലി അധ്യാപികയോട് ആവശ്യപ്പെടുകയും അഡ്വാൻസ് മാറികിട്ടുന്നതിനുള്ള നടപടി ക്രമം വൈകിപ്പിക്കുകയും ചെയ്തു. തുടർന്ന് അധ്യാപിക വിവരം കോഴിക്കോട് വിജിലൻസ് ഡെപ്യൂട്ടി പൊലീസ് സൂപ്രണ്ടിനെ അറിയിക്കുകയായിരുന്നു. തുടർന്നാണ് ഇന്ന് ഇയാളെ അറസ്റ്റ് ചെയ്യുന്നത്. കോഴിക്കോട് വിജിലൻസ് കോടതിയിൽ ഹാജരാക്കും.

പൊതുജനങ്ങളുടെ ശ്രദ്ധയിൽ അഴിമതി സംബന്ധിച്ച വിവരങ്ങൾ ലഭിക്കുകയാണെങ്കിൽ, വിജിലൻസിന്റെ ടോൾ ഫ്രീ നമ്പറായ 1064ലോ , 8592900900 എന്ന നമ്പരിലോ, വാട്സ് ആപ്പ് നമ്പരായ 9447789100ലോ അറിയിക്കണമെന്ന് വിജിലൻസ് ഡയറക്ടർ മനോജ് എബ്രഹാം അറിയിച്ചു.