print edition കാറിൽ 4 പേർ; കുതിച്ചത്‌
മിന്നൽവേഗത്തിൽ; ജഡ്‌ജിയുണ്ടായിരുന്നുവെന്നും സംശയം

കൊച്ചി: ചേരാനല്ലൂരില്‍ ആഡംബരക്കാറിടിച്ച് സ്‌കൂട്ടര്‍ യാത്രക്കാരന്‍ മരിച്ച സംഭവത്തില്‍ കൂടുതൽ വെളിപ്പെടുത്തൽ. അപകടസമയത്ത്‌ ബെൻസ്‌ കാറിൽ നാലുപേരുണ്ടായിരുന്നുവെന്ന്‌ അപകടത്തിൽ മരിച്ച ജയബാലകൃഷ്‌ണന്റെ കുടുംബം മാധ്യമങ്ങളെ അറിയിച്ചു. മൂന്നുപേർ സംഭവശേഷം ഓടിപ്പോയതായി ദൃക്‌സാക്ഷി പറഞ്ഞിട്ടുണ്ട്‌. അപകടം വരുത്തിയ കാറിൽ പതിനേഴുകാരന്റെ പിതാവായ അഡീഷണൽ ജഡ്‌ജിയുണ്ടായിരുന്നോ എന്ന്‌ സംശയമുണ്ട്‌.

അദ്ദേഹത്തിന്റെ ഒ‍ൗദ്യോഗിക ബോർഡ്‌ കാറിലുണ്ടായിരുന്നു. അത്‌ ഒടിച്ചെടുത്ത നിലയിലായിരുന്നു. കേസ്‌ അട്ടിമറിക്കാൻ, വാഹനമോടിച്ചത്‌ പ്രായപൂർത്തിയാകാത്ത മകനാണെന്ന്‌ വരുത്തിത്തീർത്തതാണോ എന്നും സംശയമുണ്ട്‌. കാരണം കേസിൽനിന്ന്‌ രക്ഷപ്പെടാനുള്ള വഴികൾ അവർക്ക്‌ നന്നായറിയാം. കണ്ടെയ്‌നർ റോഡ്‌ മുതൽ അപകടം നടന്ന സ്ഥലംവരെയുള്ള മുഴുവൻ സിസിടിവി ദൃശ്യങ്ങളും പൊലീസ്‌ ശേഖരിക്കണം. കൂടുതൽ തെളിവുകളുമായി എത്തുമെന്നും കുടുംബം പറഞ്ഞു.

അപകടസമയത്ത്‌ കാറിന്റെ വേഗം 104 കിലോമീറ്ററിന്‌ മുകളിലാണ്‌ എന്നാണ്‌ വിവരം. ഇത്‌ വ്യക്തമാക്കുന്ന ദൃശ്യങ്ങൾ പ്രതിയുടെ ഫോണിൽനിന്ന്‌ ലഭിച്ചിട്ടുണ്ട്‌. ആദ്യമായാണ്‌ വാഹനം ഓടിച്ചതെന്ന പതിനേഴുകാരന്റെ മൊഴി കള്ളമാണെന്ന്‌ വ്യക്തമാക്കുന്ന വിവരങ്ങളും ലഭിച്ചു. നേരത്തേ 208 കിലോമീറ്റർ വേഗത്തിൽ വാഹനമോടിക്കുന്ന ദൃശ്യങ്ങൾ സമൂഹമാധ്യമത്തിൽ ഇയാൾ പങ്കുവച്ചിട്ടുണ്ടെന്നും ജയബാലകൃഷ്‌ണന്റെ കുടുംബം പറഞ്ഞു.