കിണറ്റിൽ വീണ കുട്ടിയാനയെ രക്ഷപ്പെടുത്തി; കരയ്ക്ക് കയറിയയുടന്‍ വനത്തിലേക്ക് ഓടിരക്ഷപ്പെട്ടു

പത്തനംതിട്ട : തണ്ണിത്തോട്ടിൽ കിണറ്റിൽ വീണ കുട്ടിയാനയെ രക്ഷപ്പെടുത്തി. അഞ്ചുമണിക്കൂർ നീണ്ട രക്ഷാപ്രവർത്തനത്തിനൊടുവിലാണ് വനംവകുപ്പ് ഉദ്യോ​ഗസ്ഥർ കുട്ടിയാനയെ കരയ്ക്ക് കയറ്റിയത്.

കരയ്ക്ക് കയറിയ കുട്ടിയാന വനത്തിലേക്ക് ഓടിരക്ഷപ്പെട്ടു. തണ്ണിത്തോട് ജനവാസ മേഖലയിലെ റബ്ബർതോട്ടത്തിലെ ഉപയോ​ഗ്യശൂന്യമായ കിണറിലാണ് കുട്ടിയാന വീണത്. ഏകദേശം രണ്ട് വയസ് തോന്നിക്കുന്ന പിടിയാനയെയാണ് കണ്ടെത്തിയത്. കിണറ്റിൽ നിന്ന് ആനയുടെ ശബ്ദം കേട്ട നാട്ടുകാർ വനംവകുപ്പിനെ വിവരമറിയിക്കുകയായിരുന്നു. തുടർന്ന് മണിക്കൂറുകൾ നീണ്ട പ്രയത്നത്തിനൊടുവിൽ കിണറിന്റെ ഒരു ഭാ​ഗം പൊളിച്ചാണ് കുട്ടിയാനയെ രക്ഷപ്പെടുത്തിയത്.