ജയിക്കാൻ ഉദ്ദേശിക്കുന്ന മണ്ഡലങ്ങളിൽ പുറത്തുനിന്ന് ആളുകളെ കൊണ്ടുവന്ന് താമസിപ്പിക്കും, വോട്ട് ചെയ്യിക്കും: ബിജെപി നേതാവ്

തൃശൂർ: ജയിക്കാൻ ഉദ്ദേശിക്കുന്ന മണ്ഡലങ്ങളിൽ പുറത്തുനിന്ന് ആളുകളെ കൊണ്ടുവന്ന് വ്യാപകമായി വോട്ട് ചേർക്കുമെന്ന് ബിജെപി നേതാവ് ബി ഗോപാലകൃഷ്ണൻ. തൃശൂരിൽ സുരേഷ് ഗോപിയുടെ വിജയത്തിൽ കള്ളവോട്ട് നടന്നെന്ന ആരോപണത്തിൽ പ്രതികരിക്കുകയായിരുന്നു ​ഗോപാലകൃഷ്ണൻ.

'ജയിക്കാനായി വ്യാപകമായി ഞങ്ങൾ ഇനിയും വോട്ട് ചേർക്കും. ഞങ്ങൾ ജയിക്കാൻ ഉദ്ദേശിക്കുന്ന മണ്ഡലങ്ങളിൽ ജമ്മു കശ്മീരിൽനിന്നും ആളുകളെ കൊണ്ട് വന്ന് ഒരു വർഷം താമസിപ്പിച്ച് വോട്ട് ചെയ്യിപ്പിക്കും. അത് നാളെയും ചെയ്യിക്കും.' ബി ഗോപാലകൃഷ്ണൻ പറഞ്ഞു.

നിയമസഭാ തെരഞ്ഞെടുപ്പിൽ ഇപ്പോൾ ഇത്തരത്തിൽ വോട്ട് ചേർക്കാൻ പദ്ധതിയിട്ടിട്ടില്ല. ലോക്സഭാ തെരഞ്ഞെടുപ്പിൽ മാത്രമാണ് പുറത്ത് നിന്ന് ആളുകളെ കൊണ്ടുവന്ന് വോട്ട് ചേർക്കുന്നതെന്നും ബിജെപി നേതാവ് പറഞ്ഞു. സുരേഷ്​ഗോപിയുടെ 'വാനരന്മാർ' പ്രയോ​ഗത്തെ ബി ​ഗോപാലകൃഷ്ണൻ ന്യായീകരിക്കുകയും ചെയ്തു.