​'മൂന്ന് പേരെയും ശിക്ഷിക്കണം'; വിധികേട്ട് പൊട്ടിക്കരഞ്ഞ് ഷാരോണിന്റെ അമ്മ

തിരുവനന്തപുരം: പാറശാല ഷാരോൺ വധക്കേസിൽ വിധികേട്ട് പൊട്ടിക്കരഞ്ഞ് ഷാരോണിന്റെ അമ്മ. ​ഗ്രീഷ്മയുടെ അമ്മയും കുറ്റക്കാരിയല്ലേ...എന്തിനാണ് വെറുതെ വിട്ടത്... കോടതി വിധിക്കു പിന്നാലെയാണ് ഷാരോണിന്റെ അമ്മയുടെ പ്രതികരണം. നിയമപരമായി എന്തെങ്കിലും ചെയ്യാൻ കഴിയുമെങ്കിൽ ഞങ്ങൾ കോടതിയെ സമീപിക്കും. ഗ്രീഷ്മയും അമ്മ സിന്ധു കുമാരിയും ​ചേർന്നല്ലേ എല്ലാം ചെയ്തത്. ​ഗ്രീഷ്മയ്ക്ക് ശിക്ഷ ലഭിക്കുമെന്നുള്ളത് ഞങ്ങൾക്ക് ബോധ്യമായി. സിന്ധു കുമാരിയെ കുറ്റവിമുക്തയാക്കരുതായിരുന്നു. മൂന്ന് പേർക്കും ശിക്ഷ കൊടുക്കണമായിരുന്നുവെന്നാണ് ശിക്ഷാ വിധികേട്ട ഷാരോണിന്റെ കുടുംബം പ്രതികരിച്ചത്. ഹൈക്കോടതിയിൽ പേകാൻ കഴിയുമോ എന്നതിൽ വിധി വന്നതിന് ശേഷം തീരുമാനമെടുക്കും. കേസിൽ ശക്തമായി കോടതി ഒപ്പം നിന്നതിലും ​ഗ്രീഷ്മയ്ക്ക് ശിക്ഷ ലഭിച്ചതിലും സന്തോഷമുണ്ട്. ​ഗ്രീഷ്മയുടെ വിധിയിൽ തൃപ്തരാണ്. എന്നാൽ സിന്ധുകുമാരിയ്ക്ക് ശിക്ഷ വിധിക്കാത്തതിൽ വിഷമമുണ്ട്. പരമാവധി ശിക്ഷ ലഭിക്കണമെന്നാണ് ആ​ഗ്രഹമെന്നും കുടുംബം പറഞ്ഞു.

പാറശാല ഷാരോൺ വധക്കേസിൽ ഒന്നാംപ്രതി ഗ്രീഷ്‌മ കുറ്റക്കാരിയെന്ന് കോടതി ഇന്ന് വിധി പറഞ്ഞിരുന്നു. ​ഗ്രീഷ്മയുടെ അമ്മാവൻ നിർമലകുമാരൻ നായരും കുറ്റം ചെയ്തതായി കോടതി കണ്ടെത്തി. കേസിൽ അമ്മ സിന്ധുവിനെ വെറുതെവിട്ടു. നെയ്യാറ്റിൻകര സെഷൻസ് കോടതിയാണ് കേസ് പരി​ഗണിച്ച് വിധി പറഞ്ഞത്. ശിക്ഷാവിധി നാളെ. നെയ്യാറ്റിൻകര അഡീഷണൽ സെഷൻസ് ജഡ്‌ജി എ എം ബഷീർ മുമ്പാകെ മൂന്നുദിവസം നടന്ന വാദപ്രതിവാദങ്ങൾക്കു ശേഷമാണ് കേസ്‌ ഇന്ന് വിധിപറയാൻ മാറ്റിയത്. ഒന്നാംപ്രതി ഗ്രീഷ്‌മയ്ക്കെതിരെയുള്ള കൊലപാതകക്കുറ്റവും ഗ്രീഷ്മയുടെ അമ്മ സിന്ധുവിനും അമ്മാവൻ നിർമലകുമാരൻ നായർക്കുമെതിരെ തെളിവുനശിപ്പിച്ച കുറ്റങ്ങളും തെളിഞ്ഞതായി സ്പെഷ്യൽ പബ്ലിക് പ്രോസിക്യൂട്ടർ വി എസ് വിനീത് കുമാർ വാദിച്ചിരുന്നു.