ഇമദിന്റെ ‘വാക്ക്​’ അധ്യാപകർ പരിശീലിക്കും

തളിപ്പറമ്പ്​: ഗ്രേസിയുടെ ‘വാക്ക്‌’ കഥയെ കൂട്ടുപിടിച്ച്​ എട്ടാംക്ലാസുകാരനായ വി ഇമദ്​ നടന്നുകയറിയത്​ കേരളത്തിലെ സ്​കൂളുകളിലേക്ക്‌. ​കണ്ണൂർ ചെറുകുന്ന്​ ബോയ്​സ്​ ഹയർസെക്കൻഡറി സ്​കൂൾ വിദ്യാർഥിയായ ഇമദ് തയ്യാറാക്കിയ നിർമിതബുദ്ധി (എഐ) വീഡിയോ അധ്യാപക മൂല്യനിർണയ പരിശീലനത്തിനുള്ള സംസ്ഥാന​​ മൊഡ്യൂളിൽ ഇടംപിടിച്ചു.

അധ്യാപിക ഷിബിനയാണ്‌ എട്ടാംതരം കേരള പാഠാവലിയിൽ പഠിക്കാനുള്ള​ ‘വാക്ക്​’ കഥ വായിച്ച്​ വീഡിയോ തയ്യാറാക്കാൻ വിദ്യാർഥികളോട്‌ ആവശ്യപ്പെട്ടത്‌. ലിറ്റിൽ കൈറ്റ്​ അംഗമായ ഇമദ്​ ചാറ്റ്​ ജിപിടിയുടെ സഹായത്തോടെ തിരക്കഥ തയ്യാറാക്കി. വിദേശത്ത്​ ഐടി മേഖലയിൽ ജോലിചെയ്യുന്ന ഉപ്പ ഫൈസൽ നിർദേശിച്ച എഐ ടൂളുകളുടെ സഹായത്തോടെ വീഡിയോ തയ്യാറാക്കി. അവയിൽ മികച്ച ഒന്ന്‌ അധ്യാപികയ്‌ക്ക്‌ അയച്ചുകൊടുത്തു. ഷിബിന വഴി മലയാളം അധ്യാപിക കെ വി ജയശ്രീയാണ്​ മലയാളം അധ്യാപക കൂട്ടായ്​മയിലേക്ക്​ വീഡിയോ കൈമാറിയത്. ഇത്​ എസ്ആർജിമാരുടെ ശ്രദ്ധയിൽപ്പെട്ടതോടെ വീഡിയോ മൊഡ്യൂളിൽ ഉൾപ്പെടുത്താൻ തീരുമാനിക്കുകയായിരുന്നു.

തിങ്കളാഴ്​ച സംസ്ഥാനത്തുടനീളം നടന്ന ജില്ലാ ഡിആർജി പരിശീലനത്തിൽ വീഡിയോ പ്രദർശിപ്പിച്ചു. ചൊവ്വ, ബുധൻ ദിവസങ്ങളിൽ നടക്കുന്ന ഓൺലൈൻ അധ്യാപക പരിശീലനത്തിലും വീഡിയോ പ്രദർശിപ്പിക്കും.

എല്ലാവരും അഭിപ്രായം പറഞ്ഞപ്പോൾ സന്തോഷം തോന്നിയെന്ന് മൊട്ടമ്മൽ പുഞ്ചവയൽ സ്വദേശിയായ ഇമദ്​ പറഞ്ഞു. സാബിറയാണ്‌ ഇമദിന്റെ ഉമ്മ. വിദ്യാർഥികളായ നഷ്​വ, നെഹ്​ല എന്നിവർ സഹോദരങ്ങൾ.