സംസ്ഥാനത്ത് വീണ്ടും ഷി​ഗല്ല; കോഴിക്കോട് രണ്ട് കുട്ടികൾക്ക് രോ​ഗം

കോഴിക്കോട്: സംസ്ഥാനത്ത് വീണ്ടും ഷി​ഗല്ല രോ​ഗം സ്ഥിരീകരിച്ചു. കോഴിക്കോട് പെരുമണ്ണയിൽ രണ്ട് കുട്ടികൾക്കാണ് രോ​ഗം അണബാധ സ്ഥിരീകരിച്ചത്. ഇരുവരും കോഴിക്കോട് ഗവ. മെഡിക്കൽ കോളേജ് ആശുപത്രിയിൽ ചികിത്സയിലാണ്. കുട്ടികളുടെ ആരോ​ഗ്യനില തൃപ്തികരമാണെന്ന് ഡോക്ടർമാർ അറിയിച്ചു. പെരുമണ്ണ പഞ്ചായത്തിലെ പാറക്കണ്ടം, പുതിയോട്ടിൽ ഭാഗത്തുള്ള രണ്ടും മൂന്നും വയസുള്ള കുട്ടികൾക്കാണ് ഷിഗല്ല രോ​ഗം പിടിപ്പെട്ടത്.

‌ലക്ഷണങ്ങളുണ്ടായതോടെ ഇരുവരേയും പെരുമണ്ണ ഹെൽത്ത് സെന്ററിൽ പ്രവേശിപ്പിച്ചു. പ്രാഥമിക ചികിത്സയ്ക്ക് ശേഷം കുട്ടികളെ മെഡിക്കൽ കോളേജ് ആശുപത്രിയിൽ പ്രവേശിപ്പിക്കുകയായിരുന്നു. കുട്ടികൾക്ക് രോ​ഗം സ്ഥിരീകരിച്ചതോടെ പ്രദേശത്ത് പ്രതിരോധപ്രവർത്തനങ്ങൾ ആരംഭിച്ചതായി പഞ്ചായത്തും ആരോഗ്യവകുപ്പും അറിയിച്ചു. നേരത്തേ കോഴിക്കോട്ടെ പെരുവയൽ ഗ്രാമപഞ്ചായത്തിൽ വ്യാപകമായി ഷിഗല്ല രോഗം പടർന്നിരുന്നു. ശക്തമായ പ്രതിരോധ പ്രവർത്തനങ്ങളിലൂടെയാണ് അന്ന് ഷിഗല്ലയെ നിയന്ത്രിച്ചത്.