താൽകാലിക വി സിയുടെ പ്രതികാര നടപടി; കേരള സർവകലാശാല യൂണിയനെ അസാധുവാക്കി

തിരുവനന്തപുരം: കേരള സർവകലാശാലയിലെ വിദ്യാർഥി യൂണിയനെ അസാധുവാക്കി താൽകാലിക വൈസ് ചാൻസലറുടെ പ്രതികാര നടപടി. പുതിയ യൂണിയൻ തെരഞ്ഞെടുപ്പിനായി ജനറൽ കൗൺസിൽ രൂപീകരിച്ചു. ഈ മാസം 28വരെ യൂണിയന് കാലാവധി ഉണ്ട്. ഇത് വകവെക്കാതെയാണ് വി സി മോഹനൻ കുന്നുമ്മൽ എസ്എഫ്ഐ നേതൃത്വത്തിലുള്ള യൂണിയനെ അസാധുവാക്കിയത്. വി സിയുടെ വിദ്യാർഥി വിരുദ്ധ നയങ്ങൾക്കെതിരെയും വർ​ഗീയ നിലപാടുകൾക്കെതിരെയും എസ്എഫ്ഐ പ്രക്ഷോഭം ശക്തിമാക്കിയതോടെയാണ് പകപോക്കൽ.

വരാനിരിക്കുന്ന സർവകലാശാല കലോത്സവം തടയാനാണ് വി സിയുടെ നീക്കം. നാടകോത്സവം, ഫിലിംഫെസ്റ്റിവൽ തുടങ്ങിയ പരിപാടികൾ വിദ്യാർഥി യൂണിയൻ നേരത്തെ നിശ്ചയിച്ചിരുന്നു. എന്നാൽ യൂണിയനെ അസാധുവാക്കിയതോടെ ഈ പരിപാടകളും മുടങ്ങും.

കലോത്സവം അടിയന്തരമായി നടത്തുക, ഇന്റർ യൂണിവേഴ്സിറ്റി കായിക മേളയിൽ പങ്കെടുത്തവർക്ക് ടിഎ അനുവദിക്കുക തുടങ്ങിയ ആവശ്യങ്ങളുന്നയിച്ച് എസ്എഫ്ഐ സർവകലാശാല ആസ്ഥാനത്ത് സമരം നടത്തിവരികയായിരുന്നു.

യൂണിയനെ അസാധുവാക്കിയത് വി സിയുടെ പ്രതികാര നടപടിയാണെന്നും പ്രക്ഷോഭം ശക്തമാക്കുമെന്നും എസ്എഫ്ഐ അറിയിച്ചു.