പഞ്ചാബ് നാഷണൽ ബാങ്കിൽ 545 ലോക്കൽ ബാങ്ക് ഓഫീസർ ഒഴിവുകൾ; അപേക്ഷ ക്ഷണിച്ചു

ന്യൂഡൽഹി: പബ്ലിക് സെക്ടർ ബാങ്കായ പഞ്ചാബ് നാഷണൽ ബാങ്കിൽ (പിഎൻബി) ലോക്കൽ ബാങ്ക് ഓഫീസർ (എൽബിഒ) തസ്തികയിലേക്ക് അപേക്ഷ ക്ഷണിച്ചു. ജൂനിയർ മാനേജ്മെന്റ് ഗ്രേഡ് സ്കെയിൽ-I (JMGS-I) കീഴിൽ ആകെ 545 ഒഴിവുകളിലേക്കാണ് നിയമനം നടക്കുന്നത്.

ബാങ്കിങ് മേഖലയിൽ സർക്കാർ ജോലി ആഗ്രഹിക്കുന്ന ഉദ്യോഗാർത്ഥികൾക്ക് ഔദ്യോഗിക വെബ്സൈറ്റ് വഴി ഓൺലൈനായി അപേക്ഷിക്കാം. തിരഞ്ഞെടുക്കപ്പെടുന്ന ഉദ്യോഗാർത്ഥികൾക്ക് 48,480 രൂപ മുതൽ 85,920 രൂപ വരെയാണ് അടിസ്ഥാന ശമ്പളം ലഭിക്കുക.

ഇതിനുപുറമെ ഡിഎ, എച്ച്ആർഎ, സിസിഎ, മെഡിക്കൽ ഇൻഷുറൻസ് എന്നിങ്ങനെയുള്ള മറ്റ് ആനുകൂല്യങ്ങളും ലഭിക്കും. അംഗീകൃത സർവകലാശാലയിൽ നിന്നുള്ള ബിരുദമാണ് അടിസ്ഥാന യോഗ്യത. രജിസ്ട്രേഷൻ സമയത്ത് സാധുവായ ബിരുദ മാർക്ക്ഷീറ്റ് ഉണ്ടായിരിക്കണം.

2026 ജൂലൈ 1 ലെ കണക്കുപ്രകാരം ഉദ്യോഗാർത്ഥികൾക്ക് 20 വയസ്സിനും 30 വയസ്സിനും ഇടയിൽ പ്രായം ഉണ്ടായിരിക്കണം. സർക്കാർ ചട്ടപ്രകാരമുള്ള വയസ്സിളവ് എസ്‌സി, എസ്ടി, ഒബിസി, പിഡബ്ല്യുബിഡി വിഭാഗക്കാർക്ക് ബാധകമാണ്.

ഏതെങ്കിലും ഷെഡ്യൂൾഡ് കൊമേഴ്സ്യൽ ബാങ്കിലോ റീജിയണൽ റൂറൽ ബാങ്കിലോ (ആർആർബി) ക്ലർക്ക് അല്ലെങ്കിൽ ഓഫീസർ കാഡറിൽ കുറഞ്ഞത് ഒരു വർഷത്തെ പ്രവൃത്തിപരിചയം ഉണ്ടായിരിക്കണം. അപേക്ഷിക്കുന്ന സംസ്ഥാനത്തെ പ്രാദേശിക ഭാഷ എഴുതാനും വായിക്കാനും സംസാരിക്കാനും അറിഞ്ഞിരിക്കണം.

ഓൺലൈൻ എഴുത്തുപരീക്ഷ, ഡോക്യുമെന്റ് വെരിഫിക്കേഷൻ, പ്രാദേശിക ഭാഷാ പ്രാവീണ്യ പരിശോധന, വ്യക്തിഗത അഭിമുഖം എന്നിവയുടെ അടിസ്ഥാനത്തിലാണ് അർഹരായ ഉദ്യോഗാർത്ഥികളെ തിരഞ്ഞെടുക്കുന്നത്.

എഴുത്തുപരീക്ഷയിൽ റീസണിങ്, ഡാറ്റാ അനാലിസിസ്, ഇംഗ്ലീഷ്, ക്വാണ്ടിറ്റേറ്റീവ് ആപ്റ്റിറ്റ്യൂഡ്, ജനറൽ/ബാങ്കിങ് അവയർനസ് തുടങ്ങിയ വിഭാഗങ്ങളിൽ നിന്നായി 150 ചോദ്യങ്ങൾ ഉണ്ടാകും. തെറ്റായ ഉത്തരങ്ങൾക്ക് നെഗറ്റീവ് മാർക്കും ഉണ്ടായിരിക്കും.

2026 ആഗസ്റ്റ് 9 ആണ് അപേക്ഷ സമർപ്പിക്കാനുള്ള അവസാനതീയതി. എസ്‌സി, എസ്ടി, പിഡബ്ല്യുബിഡി വിഭാഗങ്ങൾക്ക് 59 രൂപയാണ് അപേക്ഷാ ഫീസ്. മറ്റ് എല്ലാ വിഭാഗങ്ങൾക്കും 1,180 രൂപയാണ് ഫീസ് നൽകേണ്ടത്. ഉദ്യോഗാർത്ഥികൾക്ക് ഏതെങ്കിലും ഒരു സംസ്ഥാനത്തേക്ക് മാത്രമായി അപേക്ഷ സമർപ്പിക്കാം.