ശബരിമല തീർത്ഥാടകരുടെ വാഹനം നിയന്ത്രണം വിട്ട് മതിലിടിച്ചു; ആറുപേർക്ക് പരിക്ക്

മുണ്ടക്കയം: ശബരിമല തീർത്ഥാടകരുടെ വാഹനം നിയന്ത്രണം വിട്ട് മതിലിൽ ഇടിച്ച് ആറുപേർക്ക് പരിക്കേറ്റു. ശബരിമല പാതയിൽ മുണ്ടക്കയം അമരാവതിക്ക് സമീപമാണ് ശബരിമല തീർത്ഥാടകരുടെ വാഹനം അപകടത്തിൽപ്പെട്ടത്. നിയന്ത്രണംവിട്ട ഒമിനി വാൻ റോഡിന്റെ വശത്തെ മതിലിലേക്ക് ഇടിച്ച് കയറുകയായിരുന്നു. അപകടത്തെ തുടർന്ന് ഡ്രൈവറും മുൻ സീറ്റിൽ സഞ്ചരിച്ചിരുന്ന തീർത്ഥാടകനും വാഹനത്തിൽ കുടുങ്ങി.

നാട്ടുകാരും പൊലീസും ചേർന്ന് ഏറെനേരം പണിപ്പെട്ടാണ് ഇവരെ വാഹനത്തിൽ നിന്നും പുറത്ത് എത്തിച്ചത്. അതേസമയം അപകടത്തിൽ പരിക്കേറ്റവരുമായി പോയ കാർ കരിനിലത്തിന് സമീപം മറ്റൊരു തീർത്ഥാടന വാഹനവുമായി കൂട്ടിയിടിച്ചും അപകടമുണ്ടായി. അപകടത്തിൽ ഇരു വാഹനങ്ങൾക്കും സാരമായ കേടുപാട് സംഭവിച്ചു. പരിക്കേറ്റവരെ ഉടൻതന്നെ മറ്റൊരു വാഹനത്തിൽ ആശുപത്രിയിലേക്ക് മാറ്റി. മുണ്ടക്കയം പൊലീസും മോട്ടോർ വെഹിക്കിൾ ഡിപ്പാർട്ട്മെന്റ് ഉദ്യോഗസ്ഥരും സ്ഥലത്തെത്തി.