ശിരോവസ്ത്രത്തർക്കം: പരിഹരിച്ചെന്ന്‌ സ്‌കൂൾ അധികൃതർ

പള്ളുരുത്തി: വിദ്യാർഥിനി ശിരോവസ്‌ത്രം ധരിച്ചെത്തിയതിലെ തർക്കത്തെ തുടർന്ന് അടച്ചിട്ട സെന്റ്‌ റീത്താസ് പബ്ലിക്‌ സ്കൂൾ ബുധനാഴ്‌ച തുറന്നു. എന്നാൽ, കഴിഞ്ഞ വെള്ളിയാഴ്‌ച ശിരോവസ്‌ത്രം ധരിച്ചെത്തിയ കുട്ടി വന്നില്ല. ആരോഗ്യ പ്രശ്നങ്ങളുള്ളതിനാലാണ് എത്താതിരുന്നതെന്ന് മാതാപിതാക്കൾ പറഞ്ഞു. ചൊവ്വാഴ്‌ച പകൽ കുട്ടിയുടെ മാതാപിതാക്കളുമായി നടത്തി യ ചർച്ചയിൽ പ്രശ്നം പരിഹരിച്ചതായി അധികൃതർ വ്യക്തമാക്കി. ഒരിക്കലും കുട്ടിയെ സ്‌കൂളിൽനിന്ന്‌ പുറത്താക്കിയിട്ടില്ലെന്നും സ്കൂളിന്റെ നിയമാവലിയനുസരിച്ച്‌ പ്രവർത്തിക്കാമെന്ന് കുട്ടിയുടെ പിതാവ് പറഞ്ഞിട്ടുണ്ടെന്നും പ്രിൻസിപ്പൽ സിസ്റ്റർ ഹെ ലീന ആൻസി പറഞ്ഞു.