പ്രവാസത്തിന് സമ്പൂർണ ആരോഗ്യ സുരക്ഷ: നോർക്ക കെയർ മുഖ്യമന്ത്രി ഉദ്ഘാടനം ചെയ്തു

തിരുവനന്തപുരം: പ്രവാസികളായ കേരളീയർക്കും കുടുംബാംഗങ്ങൾക്കുമായി സംസ്ഥാന സർക്കാർ നോർക്ക റൂട്ട്‌സ് വഴി നടപ്പാക്കുന്ന സമഗ്ര ആരോഗ്യ -അപകട ഇൻഷുറൻസ് പദ്ധതി ‘നോർക്ക കെയർ' മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. പ്രവാസികളുടെ ദീർഘകാലത്തെ ആവശ്യമാണ് ഇന്ന് നടപ്പിലാകുന്നതെന്നും ഏറെ ഉപകാരപ്രദമായ പദ്ധതിയുടെ സേവനം കേരള പിറവി ദിനം മുതൽ ലഭ്യമാകുമെന്നും മുഖ്യമന്ത്രി പറഞ്ഞു. പ്രവാസികൾക്ക് മാത്രമായി രാജ്യത്ത് ആദ്യമായി നടപ്പിലാക്കുന്ന ഇൻഷുറൻസ് എന്ന പ്രത്യേകതയും പദ്ധതിയ്ക്കുണ്ടെന്ന് മുഖ്യമന്ത്രി പറഞ്ഞു. ചടങ്ങിൽ മന്ത്രി കെ എൻ ബാലഗോപാൽ അധ്യക്ഷനായി.

പദ്ധതിയുടെ ഭാഗമാകുന്ന ആദ്യ പ്രവാസി കുടുംബത്തിനുള്ള ഇ- കാർഡ് നോർക്ക റൂട്ട്സ് റസിഡന്റ് വൈസ് ചെയർമാൻ പി ശ്രീരാമകൃഷ്ണൻ ചടങ്ങിൽ കൈമാറി. വിദേശ രാജ്യങ്ങളിലും മറ്റ് സംസ്ഥാനങ്ങളിലുമുള്ള പ്രവാസി മലയാളികൾക്കും കുടുംബാംഗങ്ങൾക്കും പദ്ധതിയിൽ അംഗങ്ങളാകാം. നോർക്ക പ്രവാസി ഐഡി കാർഡോ സ്റ്റുഡന്റ് ഐഡി കാർഡോ ഉള്ളവർക്കും മറ്റ്‌ സംസ്ഥാനങ്ങളിലെ എൻആർകെ ഐഡി കാർഡുള്ളവർക്കും പദ്ധതിയിൽ ചേരാം. അഞ്ചുലക്ഷം രൂപയുടെ ആരോഗ്യ ഇൻഷുറൻസും പത്തുലക്ഷം രൂപയുടെ അപകട പരിരക്ഷയും ലഭിക്കും. ​കേരളത്തിലെ അഞ്ഞൂറിലധികം ആശുപത്രികളുൾപ്പെടെ രാജ്യത്തെ 16,000 ആശുപത്രികളിൽ ക്യാഷ്‌ലെസ് ചികിത്സ ഉറപ്പാക്കും. ​ഭാവിയിൽ ജിസിസി രാജ്യങ്ങളിലടക്കമുള്ള ആശുപത്രികളിലേക്കും പദ്ധതി വ്യാപിപ്പിക്കും.

പ്രവാസിയും ജീവിതപങ്കാളിയും കൂടാതെ 25 വയസ്സിൽ താഴെയുള്ള രണ്ടു മക്കൾക്കുംകൂടി ഏകദേശം 13,275 രൂപയാണ് വാർഷിക പ്രീമിയം. നിലവിലുള്ള അസുഖവും ഇൻഷുറൻസ് പരിരക്ഷയിൽ ഉൾപ്പെടും. പോളിസി എടുത്തശേഷം തിരികെവരുന്ന പ്രവാസികൾക്കും പദ്ധതി തുടരാം. വിവരങ്ങൾക്കായി ഇന്ത്യയിൽനിന്ന് 1800 425 3939 എന്ന ടോൾ ഫ്രീ നമ്പറിലും വിദേശത്തുനിന്ന് +91-8802 012 345 എന്ന നമ്പറിലും (മിസ്ഡ് കോൾ സേവനം) ബന്ധപ്പെടാം.