രണ്ടു പശുക്കളുമായി കോവിഡ് കാലവറുതിയെ മറികടന്നു; സൂര്യയുടെ ഒറ്റയാൾ പോരാട്ടം പുരസ്കാര നിറവിൽ

പയ്യന്നൂർ

പശുവളർത്തലും തീറ്റപ്പുൽ കൃഷിയുമായി സൂര്യയുടെ വിജയ വഴി നാടിന് മാതൃകയാവുകയാണ്. അഞ്ച് വർഷം മുമ്പ് വീടിനോട് ചേർന്ന് രണ്ടു പശുക്കളുമായി തുടങ്ങിയ സംരംഭമാണ്. കൂടുതൽ അധ്വാനവും ശ്രദ്ധയും വേണ്ട മേഖലയിൽ അന്ന് ഒരു സാഹസത്തിന് തുടക്കമിടുകയായിരുന്നു.

ഒറ്റയ്ക്ക് ഒരു വനിത തുടക്കമിട്ട സ്വാശ്രയ മാതൃകയായി അത് വളർന്നു. ഇന്ന് ഇരുപത് പശു ക്കളും ഏഴ് കിടാവുകളുമുള്ള ഫാമിന് ഉടമയാണവർ. ക്ഷീര കർഷകമേഖലയിലെ നഷ്ടക്കണക്കല്ല സൂര്യയ്ക്ക് പറയാനുള്ളത്.

അന്ന് ജീവിത പോരാട്ടം ഇന്ന് അംഗീകാരങ്ങളുടെ നിറവ്

തുടർച്ചയായി അഞ്ചാം വർഷവും ഏറ്റവും കൂടുതൽ പാലളക്കുന്ന വ്യക്തിക്കുള്ള പുരസ്കാരം സൂര്യയെ തേടി യെത്തി. പശു വളർത്തലിൽ മികച്ച മാതൃകയാണ് ഇപ്പോൾ പയ്യന്നൂർ ഏച്ചിലാംവയലിലെ കാമ്പ്രത്ത് സൂര്യ. രണ്ട് പശുക്കളിൽ നിന്നാണ് 'ഗോകുലം' ഫാമിലേക്കുള്ള വളർച്ച. പശുവിനെ കറക്കുന്നതും കുളിപ്പിക്കുന്നതും തീറ്റ നൽകുന്നതുമെല്ലാം ഒറ്റയ്ക്കായിരുന്നു. ഇപ്പോഴൊരു സഹായിയുണ്ട്.

വെള്ളൂർ ക്ഷീര സഹകരണ സംഘത്തിൽ ദിവസവും 170 ലിറ്റർ പാൽ അളക്കുന്നു. വീടിന് സമീപത്തെ വയലിൽ തീറ്റ പുൽകൃഷിയും തുടങ്ങി.

കോവിഡുകാലത്ത് എല്ലാ മേഖലയും പ്രതിസന്ധിയിലായപ്പോഴും സൂര്യ തളർന്നില്ല. അധ്വാനത്തിന്റെ മഹിമയാൽ അവർ തിളങ്ങി നിന്നു. 2020ൽ കൃഷിഭവന്റെ യുവ കർഷക അവാർഡ് നേടി. വെള്ളൂർ ക്ഷീര സഹകരണ സംഘത്തിൽ ഏറ്റവും കൂടുതൽ പാലളന്നതിനുള്ള പുരസ്കാരം തുടർച്ചയായി അഞ്ചു വർഷവും സ്വന്തമാക്കി.

തൊഴിലില്ല എന്നത് വെറും വാക്കാണെന്ന് സൂര്യ

സ്ത്രീകൾക്ക് പശു വളർത്തൽ ജീവിത മാർഗമാക്കാനാകുമെന്ന് സൂര്യ ഉറപ്പ് പറയുന്നു. തൊഴിലില്ല എന്നത് വെറും വാക്കാണ്. ഒരു പശുവിനെ വളർത്തിയാലും ജീവിതോപാധി കണ്ടെത്താനാകും. മുഴുവൻ സമയ ശ്രദ്ധ നൽകണം അതാണ് പ്രധാനം അവർ ഓർമ്മപ്പെടുത്തി.

ജഴ്സി, എച്ച്എഫ്, ഗിർ ക്രോസ് തുടങ്ങിയയിനം പശുക്കളാണ് സൂര്യയുടെ ഫാമിലുള്ളത്. പരേതനായ എ വി കരുണാകരനാണ് ഭർത്താവ് അഞ്ജലി, അഞ്ജിത എന്നിവർ മക്കളാണ്.