കാലാവസ്ഥാ വ്യതിയാനം; ടെക് മേഖലയെ ബാധിക്കുന്നു

മുംബൈ : ആഗോളതലത്തിൽ വൻ ഡിമാൻഡുള്ള ഡാറ്റാ സെന്ററുകളുടെ പ്രവർത്തനം കടുത്ത പ്രതിസന്ധിയിലേക്ക്. ആയിരക്കണക്കിന് സെർവറുകൾ നിരന്തരം പ്രവർത്തിക്കുന്ന ഇത്തരം കേന്ദ്രങ്ങളിൽ നിന്ന് സാധാരണ നിലയിൽ തന്നെ വൻതോതിൽ ചൂടാണ് പുറന്തള്ളപ്പെടുന്നത്. എന്നാൽ നിലവിൽ പുറത്തെ അന്തരീക്ഷ താപനില ഉയരുന്നത് ഡാറ്റാ സെന്ററുകളിലെ കൂളിംഗ് സംവിധാനങ്ങൾക്ക് ഇരട്ടി ഭാരമായി മാറിയിരിക്കുകയാണ്.

അന്തരീക്ഷത്തിലെ ചൂട് വർധിക്കുന്നതോടെ സെർവറുകൾ തണുപ്പിച്ചു നിർത്താനുള്ള സിസ്റ്റങ്ങൾക്ക് സാധാരണയേക്കാൾ കൂടുതൽ കഠിനമായി പ്രവർത്തിക്കേണ്ടി വരുന്നു. ഏതെങ്കിലും കാരണവശാൽ ഈ തണുപ്പിക്കൽ സംവിധാനം പരാജയപ്പെട്ടാൽ സെർവറുകൾ അമിതമായി ചൂടാകാൻ സാധ്യതയുണ്ട്. ഇത് ആഗോള ഡിജിറ്റൽ മേഖലയെത്തന്നെ ബാധിക്കുന്ന വലിയ തകരാറുകളിലേക്കും ഡാറ്റാ നഷ്ടത്തിലേക്കും നയിച്ചേക്കാമെന്നാണ് വിദഗ്ദ്ധർ മുന്നറിയിപ്പ് നൽകുന്നത്.

പ്രമുഖ ഗവേഷണ സ്ഥാപനമായ 'ഫസ്റ്റ് സ്ട്രീറ്റ്' നടത്തിയ പഠനമനുസരിച്ച്, ലോകത്തിലെ ആകെ ഡാറ്റാ സെന്റർ ശേഷിയുടെ 79 ശതമാനവും കാട്ടുതീ, വെള്ളപ്പൊക്കം, അത്യുഷ്ണം തുടങ്ങിയ കടുത്ത പ്രതിസന്ധികളുടെ ഭീഷണിയിലാണ്. ഇത്തരം പ്രകൃതിദുരന്തങ്ങൾ ഡാറ്റാ സെന്ററുകളുടെ പ്രവർത്തനം പൂർണമായി സ്തംഭിപ്പിക്കാനും ആഗോളതലത്തിലുള്ള ഓൺലൈൻ സേവനങ്ങളെ ദോഷകരമായി ബാധിക്കാനും കാരണമാകും. ദുരന്തങ്ങൾക്ക് ശേഷമുള്ള അറ്റകുറ്റപ്പണികൾക്കായി കമ്പനികൾക്ക് ഭീമമായ തുക ചെലവഴിക്കേണ്ടി വരുന്നത് വലിയ സാമ്പത്തിക പ്രതിസന്ധിക്കും കാരണമാകുന്നുണ്ടെന്ന് റിപ്പോർട്ടിൽ ചൂണ്ടിക്കാണിക്കുന്നു.

അതേസമയം വൻകിട സാങ്കേതിക കമ്പനികൾ പുതിയ വിപണികൾ തേടിപ്പോകുന്നതോടെ ആഗോള ഡാറ്റാ സെന്റർ മേഖലയിൽ വലിയ ഘടനാപരമായ മാറ്റങ്ങൾ പ്രകടമാകുന്നുണ്ട്. ഇതിന്റെ ഫലമായി ആഗോള ഡാറ്റാ സെന്റർ ശേഷിയുടെ 64 ശതമാനവും ഇപ്പോൾ പരമ്പരാഗതമായ വലിയ ഹബ്ബുകൾക്ക് പുറത്താണ് നിർമിക്കപ്പെടുന്നത്. വികസ്വര രാജ്യങ്ങളിലേക്ക് ഈ മേഖല വ്യാപിക്കുന്നതിന്റെ ഭാഗമായി ബ്രസീൽ പോലുള്ള രാജ്യങ്ങളിൽ നിലവിൽ ഡാറ്റാ സെന്റർ നിർമാണം അതിവേഗം വർധിച്ചു വരുന്നതായും റിപ്പോർട്ടുകൾ വ്യക്തമാക്കുന്നു.

ആഗോള താപനില ക്രമാതീതമായി ഉയരുന്ന പശ്ചാത്തലത്തിൽ ഡാറ്റാ സെന്ററുകൾ തണുപ്പിച്ചു നിർത്തുക എന്നത് സാങ്കേതിക ലോകം നേരിടുന്ന ഏറ്റവും വലിയ വെല്ലുവിളിയായി മാറിയിരിക്കുകയാണ്. കടുത്ത കാലാവസ്ഥാ വ്യതിയാനങ്ങളെയും അത്യുഷ്ണത്തെയും പ്രതിരോധിക്കാൻ തക്കവണ്ണം തങ്ങളുടെ കൂളിംഗ് സംവിധാനങ്ങൾ അടിയന്തരമായി പുനർരൂപകൽപ്പന ചെയ്യാൻ പ്രമുഖ കമ്പനികൾ ഇപ്പോൾ നിർബന്ധിതരായിക്കൊണ്ടിരിക്കുകയാണ്. എന്നാൽ ഇത്തരം അത്യാധുനിക തണുപ്പിക്കൽ സംവിധാനങ്ങളിലേക്ക് മാറുന്നത് ഡാറ്റാ സെന്ററുകളിലെ വൈദ്യുതി ഉപഭോഗം വിചാരിച്ചതിലും വലിയ രീതിയിൽ ഉയർത്താൻ കാരണമാകും.

സാധാരണ പ്രവർത്തന സാഹചര്യങ്ങളിൽ പോലും ഒരു ഡാറ്റാ സെന്ററിലെ മൊത്തം വൈദ്യുതി ഉപഭോഗത്തിന്റെ 40 ശതമാനത്തോളം വരുന്നത് ഈ കൂളിംഗ് സംവിധാനങ്ങൾ പ്രവർത്തിപ്പിക്കാൻ മാത്രമായാണ്. എന്നാൽ അന്തരീക്ഷത്തിൽ കടുത്ത ഉഷ്ണതരംഗങ്ങൾ ഉണ്ടാകുമ്പോൾ സെർവറുകളുടെ താപനില ക്രമീകരിക്കാൻ ഈ സിസ്റ്റങ്ങൾക്ക് കൂടുതൽ കഠിനമായി പ്രവർത്തിക്കേണ്ടി വരുന്നു. ഇത് വൈദ്യുതിയുടെ ആവശ്യകത സാധാരണയേക്കാൾ ഇരട്ടിയാക്കുന്നു. ഡാറ്റാ സെന്ററുകളിലെ ഇത്തരം അനിയന്ത്രിതമായ വൈദ്യുതി ഉപഭോഗം വിപണിയിൽ മൊത്തത്തിൽ കടുത്ത വൈദ്യുതിക്ഷാമത്തിന് കാരണമാകും. ഇത് പൊതുജനങ്ങളെപ്പോലും ബാധിക്കുന്ന രീതിയിലുള്ള വൈദ്യുതി വിതരണം പൂർണമായി തടസപ്പെടുന്ന അവസ്ഥയിലേക്ക് നയിക്കാൻ സാധ്യതയുണ്ടെന്നും വിദഗ്ദ്ധർ ചൂണ്ടിക്കാണിക്കുന്നു.

ഈ ‌സാഹചര്യം മുൻനിർത്തി ഭാവിയിലെ സുരക്ഷ മുൻകൂട്ടി കണ്ടുകൊണ്ടുള്ള നിർമാണ പ്രവർത്തനങ്ങളിലേക്കാണ് ടെക് കമ്പനികൾ ഇപ്പോൾ ശ്രദ്ധ കേന്ദ്രീകരിക്കുന്നത്. കടുത്ത കാലാവസ്ഥാ വ്യതിയാനങ്ങൾക്ക് സാധ്യത കുറഞ്ഞതും പ്രകൃതിദുരന്തങ്ങൾ ബാധിക്കാത്തതുമായ സുരക്ഷിതമായ പ്രദേശങ്ങൾ നോക്കിയാണ് കമ്പനികൾ ഇപ്പോൾ തങ്ങളുടെ പുതിയ പ്രോജക്റ്റുകൾക്കായി സ്ഥലം തിരഞ്ഞെടുക്കുന്നത്.

പ്രവർത്തന തടസ്സങ്ങൾ പൂർണ്ണമായി ഒഴിവാക്കുന്നതിനായി സമാന്തരമായ ബാക്കപ്പ് ഇൻഫ്രാസ്ട്രക്ചറുകൾ നിർമിക്കാനും കമ്പനികൾ പ്രത്യേക ശ്രദ്ധ നൽകുന്നുണ്ട്. ഒപ്പം തന്നെ സെർവറുകളിലെ താപനില, വൈദ്യുതി വിനിയോഗം, യന്ത്രസാമഗ്രികളുടെ പ്രവർത്തനം എന്നിവ തത്സമയം കൃത്യമായി നിരീക്ഷിക്കാനും അടിയന്തര ഘട്ടങ്ങളിൽ മുൻകരുതലുകൾ സ്വീകരിക്കാനുമുള്ള അത്യാധുനിക മോണിറ്ററിംഗ് സംവിധാനങ്ങളും അവർ ഇതിനായി ഉപയോഗപ്പെടുത്തുന്നുണ്ട്.