വാട്സാപ്പ് ജനനത്തീയതി ചോദിക്കുന്നുണ്ടോ? പ്രായപരിശോധനയെ കുറിച്ച് അറിയാം

ഇന്ത്യയിലെ ചില വാട്സാപ്പ് ഉപയോക്താക്കളുടെ സ്ക്രീനിൽ ജനനത്തീയതി രേഖപ്പെടുത്താൻ ആവശ്യപ്പെടുന്ന സന്ദേശം പ്രത്യക്ഷപ്പെട്ടുതുടങ്ങി. ഇതോടെ അക്കൗണ്ട് പൂട്ടുമോ, തിരിച്ചറിയൽ രേഖ നൽകേണ്ടിവരുമോ, സ്വകാര്യത നഷ്ടപ്പെടുമോ തുടങ്ങിയ ആശങ്കകളും ഉയർന്നു.

എന്നാൽ നിലവിൽ ഇത് നിർബന്ധമല്ലാത്ത (ഓപ്ഷണൽ) പരീക്ഷണം മാത്രമാണ്. ഇപ്പോൾ ജനനത്തീയതി നൽകാത്തവർക്കും വാട്സാപ്പ് തുടർന്നുപയോഗിക്കാം. കുട്ടികളുടെ വ്യക്തിഗത വിവരങ്ങൾ സംരക്ഷിക്കുന്നതിനുള്ള ഡിജിറ്റൽ പേഴ്സണൽ ഡാറ്റ പ്രൊട്ടക്ഷൻ നിയമത്തിലെ വ്യവസ്ഥകൾ നടപ്പാക്കുന്നതിന് മുന്നോടിയായാണ് പരീക്ഷണം.

ചില ഉപയോക്താക്കൾക്ക് ലഭിച്ച സന്ദേശത്തിൽ, “ഇന്ത്യയിൽ വരാനിരിക്കുന്ന നിയമങ്ങൾ പ്രകാരം നിങ്ങളുടെ പ്രായം ചോദിക്കേണ്ടതുണ്ട്” എന്നാണ് പറയുന്നത്. ഇതിന്റെ സ്ക്രീൻഷോട്ടുകൾ എക്സിൽ പ്രചരിച്ചിരുന്നു.

എന്താണ് പുതിയ പരീക്ഷണം?

ഇന്ത്യയിലെ ചില ഉപയോക്താക്കളോട് പ്രായം സ്ഥിരീകരിക്കാൻ വാട്സാപ്പ് ആവശ്യപ്പെടുന്ന പരീക്ഷണമാണിത്. എല്ലാ ഉപയോക്താക്കൾക്കും ഇപ്പോൾ ഈ സന്ദേശം ലഭിക്കില്ല. തിരഞ്ഞെടുത്ത ചില അക്കൗണ്ടുകളിലാണ് പരീക്ഷണം നടക്കുന്നത്.

ഇന്ത്യയിലെ പുതിയ വിവരസംരക്ഷണ നിയമങ്ങൾ പാലിക്കുന്നതിനായി, സ്വകാര്യതയെ ബാധിക്കാത്ത രീതിയിൽ പ്രായം സ്ഥിരീകരിക്കാനുള്ള മാർഗങ്ങൾ പരീക്ഷിക്കുകയാണെന്ന് വാട്സാപ്പ് അറിയിച്ചു.

നിയമം പൂർണമായി നടപ്പാകുന്നതിനുമുമ്പ് ഉപയോക്താക്കളുടെ പ്രായം തിരിച്ചറിയാനും കുട്ടികളുടെ കാര്യത്തിൽ മാതാപിതാക്കളുടെ സമ്മതം ഉറപ്പാക്കാനുമുള്ള സംവിധാനം തയ്യാറാക്കേണ്ടതുണ്ട്. ഇതിന്റെ ഭാഗമായാണ് പരീക്ഷണമെന്നാണ് വിശദീകരണം.

ഇന്ത്യയിലെ ഡാറ്റാ നിയമം പറയുന്നത് എന്ത്?

ഡിജിറ്റൽ പേഴ്സണൽ ഡാറ്റ പ്രൊട്ടക്ഷൻ നിയമപ്രകാരം 18 വയസ്സിൽ താഴെയുള്ളവരെ കുട്ടികളായി കണക്കാക്കുന്നു.

കുട്ടികളുടെ വ്യക്തിഗത വിവരങ്ങൾ ശേഖരിക്കുന്നതിനോ ഉപയോഗിക്കുന്നതിനോ മുമ്പ് മാതാപിതാവിന്റെയോ നിയമപരമായ രക്ഷിതാവിന്റെയോ സ്ഥിരീകരിക്കാവുന്ന സമ്മതം ഡിജിറ്റൽ പ്ലാറ്റ്‌ഫോമുകൾ നേടണം.

സമ്മതം യഥാർഥ രക്ഷിതാവിന്റേതാണെന്ന് ഉറപ്പാക്കാനുള്ള സംവിധാനവും കമ്പനികൾ ഒരുക്കണം. കുട്ടികൾക്ക് ദോഷമുണ്ടാക്കുന്ന രീതിയിൽ അവരുടെ വിവരങ്ങൾ ഉപയോഗിക്കുന്നതും ഓൺലൈൻ പ്രവർത്തനം നിരീക്ഷിക്കുന്നതും അവരെ ലക്ഷ്യമിട്ട് പരസ്യങ്ങൾ നൽകുന്നതും നിയമം നിയന്ത്രിക്കുന്നു.

ഈ വ്യവസ്ഥകൾ ലംഘിക്കുന്ന കമ്പനികൾക്ക് വലിയ സാമ്പത്തിക പിഴ നേരിടേണ്ടിവരും.

പ്രായം നൽകിയില്ലെങ്കിൽ അക്കൗണ്ട് പൂട്ടുമോ?

ഇല്ല. ഇപ്പോഴത്തെ പരീക്ഷണത്തിൽ പ്രായം സ്ഥിരീകരിക്കുന്നത് നിർബന്ധമല്ലെന്ന് വാട്സാപ്പ് വ്യക്തമാക്കിയിട്ടുണ്ട്. ജനനത്തീയതി രേഖപ്പെടുത്താത്തവർക്കും സന്ദേശങ്ങളും കോളുകളും ഉൾപ്പെടെയുള്ള സേവനങ്ങൾ തുടർന്നുപയോഗിക്കാം. പുതിയ സംവിധാനം വാട്സാപ്പിന്റെ പ്രവർത്തനത്തിലോ നിലവിലെ ഉപയോക്തൃ അനുഭവത്തിലോ മാറ്റമുണ്ടാക്കില്ലെന്നും കമ്പനി പറയുന്നു.

ജനനത്തീയതി മറ്റുള്ളവർക്ക് കാണാനാകുമോ?

പ്രൊഫൈലിലോ ചാറ്റിലോ ജനനത്തീയതി പ്രദർശിപ്പിക്കില്ല. പ്രായം സ്ഥിരീകരിക്കാൻ നൽകുന്ന വിവരം മറ്റ് വാട്സാപ്പ് ഉപയോക്താക്കൾക്ക് ദൃശ്യമാകില്ലെന്നാണ് കമ്പനിയുടെ വിശദീകരണം.

എന്നാൽ ഈ വിവരം എത്രകാലം സൂക്ഷിക്കും, ഏതെങ്കിലും മൂന്നാംകക്ഷി ഏജൻസിക്ക് കൈമാറുമോ തുടങ്ങിയ കാര്യങ്ങളിൽ വിശദമായ വ്യക്തത ഇതുവരെ ലഭിച്ചിട്ടില്ല.

എപ്പോൾ മുതൽ നിയമം നടപ്പാകും?

കുട്ടികളുടെ വിവരങ്ങൾ കൈകാര്യം ചെയ്യുന്നതും മാതാപിതാക്കളുടെ സമ്മതം ഉറപ്പാക്കുന്നതുമായി ബന്ധപ്പെട്ട പ്രധാന വ്യവസ്ഥകൾ 2027 മെയ് മാസത്തിൽ പ്രാബല്യത്തിൽ വരുമെന്നാണ് റിപ്പോർട്ട്.

നിയമം നടപ്പാകുന്നതിനുമുമ്പ് സംവിധാനങ്ങൾ തയ്യാറാക്കുന്നതിനാണ് വാട്സാപ്പ് ഉൾപ്പെടെയുള്ള ഡിജിറ്റൽ കമ്പനികൾക്ക് സമയം അനുവദിച്ചിരിക്കുന്നത്.

എങ്ങനെയാണ് വാട്സാപ്പിലെ പ്രായപരിശോധന

നിലവിൽ ജനനത്തീയതി രേഖപ്പെടുത്താൻ ആവശ്യപ്പെടുന്ന സന്ദേശമാണ് ചിലർക്ക് ലഭിക്കുന്നത്. എന്നാൽ ഭാവിയിൽ തിരിച്ചറിയൽ രേഖ, മൂന്നാംകക്ഷി പ്രായസ്ഥിരീകരണ സംവിധാനം, എഐ അടിസ്ഥാനമാക്കിയുള്ള പരിശോധന തുടങ്ങിയ മാർഗങ്ങൾ ഉപയോഗിക്കുമോയെന്ന് വാട്സാപ്പ് വ്യക്തമാക്കിയിട്ടില്ല.

തെറ്റായ ജനനത്തീയതി നൽകിയാൽ അക്കൗണ്ടിന് എന്ത് സംഭവിക്കും, തെറ്റായി പ്രായം നിർണയിക്കപ്പെട്ടാൽ എങ്ങനെ തിരുത്താം, അപ്പീൽ സംവിധാനം ഉണ്ടാകുമോ തുടങ്ങിയ കാര്യങ്ങളിലും വ്യക്തതയില്ല.

വാട്സാപ്പിന്റെ കുറഞ്ഞ പ്രായപരിധി എത്ര?

സാധാരണ വാട്സാപ്പ് അക്കൗണ്ട് തുടങ്ങുന്നതിനുള്ള കുറഞ്ഞ പ്രായം 13 വയസ്സാണ്. എന്നാൽ രാജ്യത്തെ നിയമങ്ങൾക്കനുസരിച്ച് ഉയർന്ന പ്രായപരിധി ബാധകമായേക്കാം.

നിലവിൽ ഉപയോക്താക്കൾ നൽകുന്ന ഫോൺ നമ്പർ മാത്രം ഉപയോഗിച്ചാണ് മിക്ക അക്കൗണ്ടുകളും ആരംഭിക്കുന്നത്. അതിനാൽ ഉപയോക്താവിന്റെ യഥാർഥ പ്രായം വാട്സാപ്പിന്റെ കൈവശമില്ലാത്ത സാഹചര്യങ്ങളുണ്ട്. കുട്ടികളെയും മുതിർന്നവരെയും നിയമപരമായി വേർതിരിക്കുന്നതിനാണ് പ്രായപരിശോധന ആവശ്യമായി വരുന്നത്.

13 വയസ്സിൽ താഴെയുള്ളവർക്കുള്ള അക്കൗണ്ട്

13 വയസ്സിൽ താഴെയുള്ളവർക്കായി മാതാപിതാക്കൾ നിയന്ത്രിക്കുന്ന അക്കൗണ്ടുകളും വാട്സാപ്പ് അവതരിപ്പിച്ചുതുടങ്ങിയിട്ടുണ്ട്. സന്ദേശങ്ങളും കോളുകളും പോലുള്ള പരിമിതമായ സൗകര്യങ്ങളായിരിക്കും ഇത്തരം അക്കൗണ്ടുകളിൽ ലഭിക്കുക.

കുട്ടിയെ ആർക്കെല്ലാം ബന്ധപ്പെടാം, ഏതെല്ലാം ഗ്രൂപ്പുകളിൽ ചേരാം, അപരിചിത നമ്പറുകളിൽനിന്നുള്ള സന്ദേശങ്ങൾ സ്വീകരിക്കണമോ തുടങ്ങിയവ മാതാപിതാക്കൾക്ക് നിയന്ത്രിക്കാം. സ്വകാര്യതാ ക്രമീകരണങ്ങൾ മാറ്റുന്നതും മാതാപിതാക്കളുടെ പിൻ ഉപയോഗിച്ചായിരിക്കും.

വ്യക്തിഗത സന്ദേശങ്ങളും കോളുകളും എൻഡ് ടു എൻഡ് എൻക്രിപ്ഷനിൽ തുടരുമെന്നാണ് കമ്പനി പറയുന്നത്.