വീണ്ടും അൽകാരസ്‌; തുടർച്ചയായ മൂന്നാം വർഷവും വിംബിൾഡൺ ഫൈനലിൽ

ലണ്ടൻ: തുടർച്ചയായ മൂന്നാം തവണയും വിംബിൾഡൺ ഫൈനലിൽ പ്രവേശിച്ച്‌ സ്‌പാനിഷ്‌ താരം കാർലോസ്‌ അൽകാരസ്‌. യുഎസ്‌എയുടെ ടെയ്‌ലർ ഫ്രിറ്റ്സിനെ പരാജയപ്പെടുത്തിയാണ്‌ ഫൈനലിലേക്കുള്ള അൽകാരസിന്റെ മുന്നേറ്റം. സ്‌കോർ: 4–6, 7–5, 3–6, 6–7.

നാല്‌ സെറ്റുകൾ നീണ്ട പോരാട്ടത്തിനൊടുവിലാണ്‌ ഫ്രിറ്റ്‌സിനെ അൽകാരസ്‌ പരാജയപ്പെടുത്തിയത്‌. ആദ്യ സെറ്റിൽ അൽകാരസ്‌ ഫ്രിറ്റ്‌സിനെതിരെ ജയം പിടിച്ചെങ്കിലും രണ്ടാം സെറ്റിൽ അമേരിക്കക്കാരൻ വിജയിക്കുകയായിരുന്നു. എന്നാൽ മൂന്നും നാലും സെറ്റുകൾ വിജയിച്ച്‌ അൽകാരസ്‌ ഫൈനലിൽ പ്രവേശിച്ചു.

തുടർച്ചയായ മൂന്നാം കിരീടമാണ്‌ വിംബിൾഡണിൽ കാർലോസ്‌ അൽകാരസിന്റെ ലക്ഷ്യം. കഴിഞ്ഞ രണ്ട്‌ തവണയും ഇതിഹാസ താരം നൊവാക്‌ ജോക്കോവിച്ചിനെ പരാജയപ്പെടുത്തി അൽകാരസ്‌ കിരീടമുയർത്തിയിരുന്നു.

നൊവാക്‌ ജോക്കോവിച്ച്‌, യാനിക്‌ സിന്നർ എന്നിവർ തമ്മിലാണ്‌ രണ്ടാം സെമി ഫൈനൽ. ഇതിലെ വിജയിയായിരിക്കും ഫൈനലിൽ അൽകാരസിന്റെ എതിരാളി. ജൂലൈ 13നാണ്‌ ഫൈനൽ.