നാല് വർഷത്തിന് ശേഷം ഒരുമിച്ച് കോർട്ടിൽ; വില്യംസ് സഹോദരിമാർ ആദ്യ റൗണ്ടിൽ പുറത്ത്

ന്യൂയോർക്ക് : നാല് വർഷത്തെ ഇടവേളക്ക് ശേഷം യുഎസ് ഓപ്പണിലെ വനിത ഡബിൾസിൽ തിരിച്ചെത്തിയ വില്യംസ് സ​ഹോദരിമാർ ആദ്യ റൗണ്ടിൽ പുറത്തായി. ഹാവോ ചിങ്ചാൻ - മയാ ജോയിന്റ് സഖ്യത്തോട് മൂന്ന് മണിക്കൂർ നീണ്ട ആവേശകരമായ പോരാട്ടത്തിനൊടുവിലാണ് വില്യംസ് സ​ഹോദരിമാർ കീഴടങ്ങിയത്. സ്കോർ : 3-6, 7-6(6), 6-7(7)

നിർണായകമായ മൂന്നാം സെറ്റിൽ ഒരു ഘട്ടത്തിൽ സെറീനയും വീനസും 5-0ന് മുന്നേറിയിരുന്നു. എന്നാൽ പിന്നീട് ലീഡ് കൈവിട്ടു. ആർതർ ആഷെ സ്റ്റേഡിയത്തിൽ 23000ലധികം കാണികളാണ് സെറീന - വീനസ് സഖ്യത്തിന്റെ ​തിരിച്ചുവരവിന് സാക്ഷ്യം വഹിച്ചത്. ആരാധകരുടെ ആവേശകരമായ പിന്തുണയാണ് വില്യംസ് സ​ഹോദരിമാർക്ക് ലഭിച്ചത്.

2022ലാണ് ഇരുവരും അവസാനമായി യുഎസ് ഓപ്പണിൽ ഡബിൾസിൽ മത്സരിച്ചത്. 1999ലും 2009ലും യുഎസ് ഓപ്പൺ കിരീടം നേടിയ വില്യംസ് സഹോദരിമാർക്ക് ആകെ 14 ​ഗ്രാൻഡ്സ്ലാം ഡബിൾസ് കീരീടങ്ങളുണ്ട്. ഒന്നാം റൗണ്ടിൽ കരുത്തരായ ഹാവോ ചിങ്ചാൻ - മയാ സഖ്യത്തിന് മുന്നിൽ പരാജയപ്പെട്ടെങ്കിലും ടെന്നീസിലെ ഇതിഹാസ താരങ്ങളായ വില്യംസ് സഹോദരിമാരുടെ തിരിച്ചുവരവ് ആരാധകർക്ക് മികച്ച അനുഭവമാണൊരുക്കിയത്.