തോമസ് കപ്പിൽ ഇന്ത്യയുടെ കിരീടമോഹങ്ങൾ സെമിയിൽ തകർത്ത് ഫ്രാൻസ്; വെങ്കലത്തോടെ മടക്കം

ഹോർസെൻസ് (ഡെന്മാർക്ക്): തോമസ് കപ്പ് ബാഡ്മിന്റൺ ചാമ്പ്യൻഷിപ്പിന്റെ സെമിഫൈനലിൽ ഫ്രാൻസിനോട് പരാജയപ്പെട്ട് ഇന്ത്യ പുറത്തായി. ശനിയാഴ്ച നടന്ന ആവേശകരമായ പോരാട്ടത്തിൽ എതിരില്ലാത്ത മൂന്ന് സെറ്റുകൾക്കാണ് ഫ്രാൻസ് ഇന്ത്യയെ പരാജയപ്പെടുത്തിയത്.

ഇതോടെ 2022 ൽ നേടിയ കിരീടം തിരിച്ചുപിടിക്കാമെന്ന ഇന്ത്യയുടെ മോഹം സെമിയിൽ അവസാനിച്ചു. ഈ സീസണിൽ വെങ്കല മെഡലുമായി ഇന്ത്യക്ക് മടങ്ങേണ്ടി വന്നു.

മത്സരം തുടങ്ങുന്നതിന് മുൻപേ ഏറ്റ തിരിച്ചടിയാണ് ഇന്ത്യയുടെ പതനത്തിന് പ്രധാന കാരണമായത്. ക്വാർട്ടർ ഫൈനലിൽ ചൈനീസ് തായ്‌പേയിക്കെതിരായ വിജയത്തിനിടെ കൈമുട്ടിന് പരിക്കേറ്റ ഇന്ത്യയുടെ മുൻനിര താരം ലക്ഷ്യ സെൻ സെമിയിൽ കളിച്ചിരുന്നില്ല.

ടീമിന്റെ കുന്തമുനയായ ലക്ഷ്യയുടെ അഭാവത്തിൽ ഫ്രഞ്ച് താരങ്ങളുടെ ആക്രമണശൈലിയെ പ്രതിരോധിക്കാൻ ഇന്ത്യൻ താരങ്ങൾക്ക് സാധിച്ചില്ല.

ആദ്യ സിംഗിൾസിൽ ആയുഷ് ഷെട്ടി ലോക നാലാം നമ്പർ താരം ക്രിസ്റ്റോ പോപോവിനോട് പരാജയപ്പെട്ടു. തുടക്കം മുതൽ ആധിപത്യം പുലർത്തിയ പോപോവ് 21-11, 21-9 എന്ന സ്കോറിനാണ് ആയുഷിനെ മറികടന്നത്.

രണ്ടാം മത്സരത്തിൽ പരിചയസമ്പന്നനായ കിഡംബി ശ്രീകാന്ത് അലക്സ് ലാനിയറെ നേരിട്ടെങ്കിലും നേരിട്ടുള്ള ഗെയിമുകൾക്ക് കീഴടങ്ങി (21-16, 21-18). ഇതോടെ 2-0 എന്ന നിലയിൽ ഫ്രാൻസ് വിജയമുറപ്പിച്ചു.

നിർണ്ണായകമായ മൂന്നാം മത്സരത്തിൽ എച്ച്എസ് പ്രണോയിക്ക് തോമ ജൂനിയർ പോപോവിനെ തടയാനായില്ല. ആദ്യ ഗെയിമിൽ 19-18 ന് പ്രണോയ് മുന്നിട്ടുനിന്നെങ്കിലും അവസാന നിമിഷം ഫ്രഞ്ച് താരം കളി തിരിച്ചുപിടിച്ചു (21-19).

രണ്ടാം ഗെയിമിൽ പൂർണ്ണ നിയന്ത്രണം ഏറ്റെടുത്ത പോപോവ് 21-16 ന് വിജയിച്ചതോടെ ഫ്രാൻസ് ഫൈനൽ ബർത്ത് ഉറപ്പിച്ചു. ക്വാർട്ടറിൽ ചൈനീസ് തായ്‌പേയിയെ 3-0 ന് തോൽപ്പിച്ചായിരുന്നു ഇന്ത്യ സെമിയിൽ എത്തിയത്.