വോളിക്കാലം 
വരുന്നു

​മലപ്പുറം

പ്രൈം വോളി ലീഗ്‌ നാലാം സീസൺ നാളെ ഹൈദരാബാദിലെ ഗച്ചിബൗളി ഇന്‍ഡോര്‍ സ്‌റ്റേഡിയത്തില്‍ തുടങ്ങും. വൈകിട്ട് 6.30ന് നടക്കുന്ന ഉദ്ഘാടന മത്സരത്തില്‍ ആതിഥേയരായ ഹൈദരാബാദ് ബ്ലാക്ക് ഹോക്‌സ് ചാമ്പ്യൻമാരായ കാലിക്കറ്റ് ഹീറോസിനെ നേരിടും. ഇക്കുറി 10 ടീമുകളാണ്‌. 21 ദിവസം 38 മത്സരങ്ങളുണ്ട്‌. ഫൈനൽ 26നാണ്‌. ഒന്പതിന്‌ രാത്രി 8.30നാണ് കൊച്ചി ബ്ലൂ സ്‌പൈക്കേഴ്‌സും കാലിക്കറ്റ് ഹീറോസും തമ്മിലുള്ള കേരള ഡെര്‍ബി.

കാലിക്കറ്റ്‌ ഹീറോസ്‌, കൊച്ചി ബ്ലൂ സ്‌പൈക്കേഴ്‌സ്, ബംഗളൂരു ടോര്‍പ്പിഡോസ്, ചെന്നൈ ബ്ലിറ്റ്‌സ്‌, അഹമ്മദാബാദ് ഡിഫന്‍ഡേഴ്‌സ്, ഹൈദരാബാദ്‌ ബ്ലാക്ക്‌ഹോക്‌സ്‌, കൊല്‍ക്കത്ത തണ്ടര്‍ബോള്‍ട്ട്‌സ്, ഗോവ ഗാര്‍ഡിയന്‍സ്‌, മുംബൈ മിറ്റിയോഴ്‌സ്, ഡൽഹി തൂഫാൻസ്‌ എന്നിവയാണ്‌ ടീമുകൾ. സോണി സ്‌പോര്‍ട്‌സ് നെറ്റ്‌വര്‍ക്കിലും പ്രൈം വോളിബോള്‍ യൂട്യൂബ് ചാനലിലും മത്സരങ്ങള്‍ തത്സമയം കാണാം.

​

​നിലനിർത്താൻ കാലിക്കറ്റ്

കിരീടം നിലനിർത്താനുറച്ചാണ്‌ കാലിക്കറ്റ്‌ ഹീറോസ് ഇറങ്ങുന്നത്‌. കഴിഞ്ഞ മൂന്ന്‌ സീസണിലും ടീമിനൊപ്പമുണ്ടായിരുന്ന സൂപ്പർ താരം ജെറോം വിനീതും പരിശീലകൻ കിഷോർ കുമാറുമില്ല. മുതിർന്ന പരിശീലകൻ സണ്ണി ജോസഫാണ്‌ ഇത്തവണ ടീമിനെ ഒരുക്കിയിരിക്കുന്നത്‌. പരിചയസന്പന്നനായ മുൻ ഇന്ത്യൻ നായകൻ മോഹൻ ഉക്രപാണ്ഡ്യനാണ്‌ ക്യാപ്‌റ്റൻ. ശ്രീലങ്കൻ താരം തരുഷ ചമന്തയും ആഫ്രിക്കൻ അറ്റാക്കർ ബോസ്‌കോയും വിദേശ സാന്നിധ്യമാണ്‌.

ഇന്ത്യൻ താരം ഷമീമുദ്ദീൻ, അബ്ദുറഹീം, ഹാരിസ്, കിരൺ രാജ്, ആദർശ് എന്നിവരാണ്‌ മലയാളി താരങ്ങൾ. അഹമ്മദ്‌ ഫായിസും സാദിഖും സഹപരിശീലകരാണ്‌.

​

പിടിച്ചെടുക്കാൻ കൊച്ചി

ഇതുവരെയും കൈപ്പിടിയിലൊതുക്കാൻ കഴിയാതെപോയ കിരീടം സ്വന്തമാക്കാനാണ്‌ കൊച്ചിയുടെ വരവ്‌. ഇന്ത്യന്‍ ക്യാപ്റ്റന്‍ വിനീത്കുമാറാണ് ടീമിനെ നയിക്കുന്നത്. കാനഡ സെറ്റര്‍ ബെറോണ്‍ കെറ്റുറാക്കിസും ഫ്രഞ്ച് താരം നിക്കോളാസ് മരേചാലുമാണ് ടീമിലെ വിദേശ കരുത്ത്‌. എറിന്‍ വര്‍ഗീസ്, അമല്‍ കെ തോമസ്, ഹേമന്ദ്‌ എന്നിവരാണ്‌ അറ്റാക്കര്‍മാർ. യു ജന്‍ഷാദാണ് സെറ്റര്‍. ആഫ്രിക്കയിൽനിന്നുള്ള സൈസ് വര്‍ധനാണ് മുഖ്യപരിശീലകന്‍.