പ്രൈം വോളിബോള്‍ ലീഗ് : ഗോവ ഗാർഡിയൻസിനെ വീഴ്‌ത്തി കൊച്ചി ബ്ലൂ സ്‌പൈക്കേഴ്‌സിന്‌ ആദ്യ ജയം

ഹൈദരാബാദ്: പ്രൈം വോളിബോള്‍ ലീഗ് നാലാം സീസണില്‍ ഞായറാഴ്ച നടന്ന രണ്ടാം കളിയില്‍ കൊച്ചി ബ്ലൂ സ്‌പൈക്കേഴ്‌സിന്‌ തകർപ്പൻ ജയം. ഗോവ ഗാർഡിയൻസിനെ അഞ്ച്‌ സെറ്റ്‌ പോരാട്ടത്തിൽ തോൽപ്പിച്ചു. സ്കോർ: 11–15, 17–15, 15–13, 10–15, 15–10. ആദ്യ കളിയിൽ തോറ്റ കൊച്ചിയുടെ തിരിച്ചുവരവായി ഇത്‌. വിജയത്തോടെ കൊച്ചി പട്ടികയിൽ രണ്ടാമതെത്തി. ഗോവയുടെ തുടർച്ചയായ രണ്ടാം തോൽവിയാണ്‌. കൊച്ചിയുടെ ഹേമന്താണ്‌ കളിയിലെ താരം.

സൂപ്പർ സെർവിലൂടെ ഗോവ ക്യാപ്‌റ്റൻ ചിരാഗ്‌ യാദവ്‌ മികച്ച തുടക്കം നൽകിയെങ്കിലും മറുവശത്ത്‌ കളത്തിൽ പ്രകമ്പനം തീർത്ത്‌ കൊച്ചി ക്യാപ്‌റ്റൻ എറിൻ വർഗീസും നിന്നു. ഒടുവിൽ സൂപ്പർ പോയിന്റ്‌ അവസരം ഉപയോഗിക്കാനുള്ള ഗോവയുടെ തീരുമാനം കൃത്യമായി. എറിന്റെ സെർവീസ്‌ പിഴവിലാണ്‌ പോയിന്റ്‌ കിട്ടിയത്‌. കൊച്ചിക്കായി അമരീന്ദർപാൽ സിങ്‌ കളത്തിന്‌ നടുവിൽവച്ച്‌ ആക്രമണം നടത്തി. ഹേമന്ത്‌ സെർവുകൾ കൊണ്ടും തീ പടർത്തി. കൊച്ചി ക്യാപ്‌റ്റൻ ബൈറൺ കെറ്റുറാകിസ്‌ അമരീന്ദറുമായി ചേർന്ന്‌ ബ്ലോക്കുണ്ടാക്കി ചിരാഗിന്റെ ആക്രമണങ്ങളെ തടഞ്ഞു.

എറിൻ ആത്മവിശ്വാസത്തോടെ ആക്രമണം നടത്തിയതോടെ കൊച്ചി കളിയില്‍ നിയന്ത്രണം നേടി. പ്രിൻസിന്റെ സെർവ്‌ പാളിയതോടെ ഗോവയുടെ സൂപ്പർ പോയിന്റ്‌ നഷ്ടമായി. പിന്നിലായതോടെ രോഹിതിന്റെ കരുത്തുറ്റ സെർവുകളിലൂടെ ഗോവ തിരിച്ചുവരാൻ ശ്രമിച്ചു. പകരക്കാരൻ വിക്രം ആക്രമണത്തിലും പ്രതിരോധത്തിലും തിളങ്ങിയതോടെ കളി അഞ്ചാം സെറ്റിലേക്ക്‌ നീണ്ടു. ലിബെറോ അലൻ ആഷിക്കിന്റെ കിടിലൻ സേവുകൾ കൊച്ചിക്ക് അഞ്ചാം സെറ്റിൽ നിർണായക പോയിന്റുകൾ നൽകി.