പ്രൈം വോളിബോള്‍ ലീഗ്: സീസണ്‍ 4 ഹൈദരാബാദിൽ
ഹൈദരാബാദ്: മൂന്ന് സീസണുകളിലായി വോളിബോള്‍ ആരാധകരെ ആവേശത്തിലാക്കിയ പ്രൈം വോളിബോള്‍ ലീഗിന്റെ നാലാം സീസണിന് ഒക്ടോബര്‍ രണ്ടിന് ഹൈദരാബാദില്‍ തുടക്കമാകും. കഴിഞ്ഞ ദിവസം നടന്ന ചടങ്ങില്‍ തെലങ്കാന മുഖ്യമന്ത്രി എ രേവന്ത് റെഡ്ഡി, കായിക യുവജനക്ഷേമ മന്ത്രി വകിതി ശ്രീഹരി, കായിക വകുപ്പ് സ്‌പെഷ്യല്‍ ചീഫ് സെക്രട്ടറി ജയേഷ് രഞ്ജന്‍, സ്‌പോര്‍ട്‌സ് അതോറിറ്റി ഓഫ് തെലങ്കാന ചെയര്‍മാന്‍ ശിവ സേന റെഡ്ഡി, സ്‌പോര്‍ട്‌സ് അതോറിറ്റി ഓഫ് തെലങ്കാന വൈസ് ചെയര്‍പേഴ്‌സണും എംഡിയുമായ എ സോണിബാല ദേവി എന്നിവര്‍ ചേര്‍ന്ന് പിവിഎല്‍ സീസണ്‍ 4ന്റെ പോസ്റ്റര്‍ പ്രകാശനം ചെയ്തു.
തെലങ്കാന കായികരംഗത്തെ അതീവ താല്‍പ്പര്യത്തോടെ കാണുന്ന ഒരു സംസ്ഥാനമാണെന്ന് പ്രൈം വോളിബോള്‍ ലീഗിന് പിന്തുണ പ്രഖ്യാപിച്ചുകൊണ്ട് തെലങ്കാന മുഖ്യമന്ത്രി എ രേവന്ത് റെഡ്ഡി പറഞ്ഞു. വോളിബോളിന്റെയും കായിക വിനോദത്തിന്റെയും ആവേശം ഉയര്‍ത്തിപ്പിടിക്കുന്ന ഒരു വിജയകരമായ സീസണിനായി ഞങ്ങള്‍ കാത്തിരിക്കുകയാണന്നും അദ്ദേഹം കൂട്ടിച്ചേര്‍ത്തു.
രണ്ട് സെമിഫൈനലുകളും ഫൈനലും ഉള്‍പ്പെടെ 38 മത്സരങ്ങള്‍ക്കാണ് ഹൈദരാബാദിലെ ഗച്ചിബൗളി ഇന്‍ഡോര്‍ സ്റ്റേഡിയം വേദിയൊരുക്കുക. പോയ സീസണുകളില്‍ നിന്ന് വ്യത്യസ്തമായി 10 ടീമുകളാണ് ഇത്തവണ പിവിഎല്‍ കിരീടത്തിനായി മത്സരിക്കുക. ഗോവ ഗാര്‍ഡിയന്‍സ് ആണ് ഈ സീസണില്‍ അരങ്ങേറ്റത്തിനൊരുങ്ങുന്ന പുതിയ ടീം.
10 ടീം ഫ്രാഞ്ചൈസികള്‍ പങ്കെടുക്കുന്ന ഇന്ത്യയിലെ ആദ്യത്തെ പ്രൊഫഷണല്‍ വോളിബോള്‍ ലീഗാണ് പ്രൈം വോളിബോള്‍ ലീഗ്. ഇന്ത്യയിലെ കായിക വിപണന സ്ഥാപനമായ ബേസ്‌ലൈന്‍ വെഞ്ച്വേഴ്‌സിന്റെ സഹഉടമസ്ഥതയിലുള്ളതാണ് ലീഗ്. വോളിബോളിന്റെ ആഗോള ബോഡിയായ ഫെഡറേഷന്‍ ഇന്റര്‍നാഷണല്‍ ഡി വോളി ബാളുമായി (എഫ്‌ഐവിബി) ചേര്‍ന്ന് പ്രവര്‍ത്തിക്കുന്ന പ്രൈം വോളിബോള്‍ ലീഗിന്റെ നാലാം സീസണ്‍ 2025 ഒക്ടോബര്‍ 2ന് ഹൈദരാബാദില്‍ ആരംഭിക്കും. ലോകമെമ്പാടുമുള്ള താരങ്ങള്‍ പങ്കെടുക്കുന്ന ലീഗിലേക്ക് എഫ്‌ഐവിബിയുടെ അന്താരാഷ്ട്ര ട്രാന്‍സ്ഫര്‍ നടപടിക്രമങ്ങളിലൂടെയാണ് കളിക്കാരെ തിരഞ്ഞെടുത്തത്.
Related News
Dont Miss it
0 comments