"ബ്രിജ് ഭൂഷണെതിരെ പരാതി നൽകിയ ആറുപേരിൽ ഒരാൾ ഞാൻ"; വെളിപ്പെടുത്തലുമായി വനിതാ ഗുസ്തി താരം

ന്യൂഡൽഹി: ഗുസ്തി ഫെഡറേഷൻ അധികൃതരുമായുള്ള ദീർഘകാല പോരാട്ടത്തിൽ നിർണ്ണായക വെളിപ്പെടുത്തലുമായി ഒളിമ്പ്യൻ വിനേഷ് ഫോഗട്ട്.

മുൻ റെസ്ലിംഗ് ഫെഡറേഷൻ ഓഫ് ഇന്ത്യ അധ്യക്ഷൻ ബ്രിജ് ഭൂഷൺ ശരൺ സിംഗ് ലൈംഗികമായി പീഡിപ്പിച്ച ആറ് വനിതാ ഗുസ്തി താരങ്ങളിൽ ഒരാൾ താനാണെന്ന് വിനേഷ് വെളിപ്പെടുത്തി.

ഹൃദയസ്പർശിയായ ഒരു വീഡിയോ സന്ദേശത്തിലൂടെയാണ് വിനേഷ് ഇക്കാര്യം അറിയിച്ചത്. കോടതിയുടെ പരിഗണനയിലുള്ള ക്രിമിനൽ കേസിൽ ഇരയായ കാര്യം വിനേഷ് പരസ്യമായി വെളിപ്പെടുത്തുന്നത് ഇതാദ്യമാണ്.

2026-ലെ ഏഷ്യൻ ഗെയിംസിന് മുന്നോടിയായുള്ള തന്റെ തിരിച്ചുവരവ് അട്ടിമറിക്കാൻ ഗുസ്തി ഫെഡറേഷൻ ബോധപൂർവ്വം ശ്രമിക്കുന്നുവെന്നും, അത്തരം സാഹചര്യങ്ങൾ കാരണമാണ് തന്റെ പേര് വെളിപ്പെടുത്താൻ നിർബന്ധിതയായതെന്നും വിനേഷ് പറഞ്ഞു.

ബ്രിജ് ഭൂഷനെതിരെയുള്ള കേസിൽ സാക്ഷിമൊഴികൾ രേഖപ്പെടുത്തുന്നത് ഉൾപ്പെടെയുള്ള നടപടികൾ കോടതിയിൽ തുടരുകയാണ്. നിയമനടപടികൾ അതിന്റെ വഴിക്ക് പോകട്ടെ എന്ന് കരുതിയാണ് ഇതുവരെ പേര് വെളിപ്പെടുത്താതിരുന്നതെന്ന് താരം വിശദീകരിച്ചു.

"ഇത്തരമൊരു സാഹചര്യത്തിൽ ഒരു സ്ത്രീക്ക് മത്സരങ്ങളിൽ പങ്കെടുക്കുക എന്നത് വളരെ ബുദ്ധിമുട്ടുള്ള കാര്യമാണ്. സമാനമായ അവസ്ഥയിലൂടെ കടന്നുപോയിട്ടുള്ള ഏതൊരു കായികതാരത്തിനും ഇത് മനസ്സിലാക്കാൻ സാധിക്കും," വിനേഷ് കൂട്ടിച്ചേർത്തു.

ബ്രിജ് ഭൂഷന്റെ ശക്തികേന്ദ്രമായ ഉത്തർപ്രദേശിലെ ഗോണ്ടയിൽ റാങ്കിംഗ് ടൂർണമെന്റുകളും ട്രയൽസും നടത്താനുള്ള ഫെഡറേഷന്റെ തീരുമാനമാണ് വിനേഷിനെ ഈ വെളിപ്പെടുത്തലിന് പ്രേരിപ്പിച്ചത്.

ബ്രിജ് ഭൂഷന്റെ ഉടമസ്ഥതയിലുള്ള സ്വകാര്യ കോളേജിലാണ് ട്രയൽസ് സംഘടിപ്പിക്കുന്നത്. അതിനാൽ അവിടെ സുതാര്യമായ മത്സരം അസാധ്യമാണെന്ന് താരം ആരോപിച്ചു.

"അദ്ദേഹത്തിന് സ്വന്തമായി സ്വകാര്യ കോളേജുണ്ട്, അവിടെയാണ് ഈ മത്സരം നടക്കുന്നത്. കഠിനാധ്വാനം ചെയ്യുന്ന അത്ലറ്റുകൾക്ക് അവിടെ അർഹമായ പരിഗണന ലഭിക്കുക എന്നത് അസാധ്യമായ കാര്യമാണ്," വിനേഷ് പറഞ്ഞു. നിലവിലെ അധ്യക്ഷൻ സഞ്ജയ് സിംഗിലൂടെ ബ്രിജ് ഭൂഷൺ ഇപ്പോഴും ഫെഡറേഷനെ നിയന്ത്രിക്കുകയാണെന്നും താരം കുറ്റപ്പെടുത്തി.

"ആര് ഏത് മത്സരം നിയന്ത്രിക്കണം, റഫറി എത്ര പോയിന്റ് നൽകണം എന്നതെല്ലാം ബ്രിജ് ഭൂഷണും അദ്ദേഹത്തിന്റെ ആളുകളും തീരുമാനിക്കും. ഗവൺമെന്റും കായിക മന്ത്രാലയവും നിശബ്ദ കാണികളായി ഇതെല്ലാം നോക്കി നിൽക്കുകയാണ്," വിനേഷ് ആരോപിച്ചു.

2024-ലെ പാരീസ് ഒളിമ്പിക്സിന് ശേഷമുള്ള 18 മാസത്തെ ഇടവേളയ്ക്ക് ശേഷം കായികരംഗത്തേക്ക് മടങ്ങിവരാൻ ശ്രമിക്കുകയാണ് വിനേഷ്. എന്നാൽ തന്നെ പീഡിപ്പിച്ചുവെന്ന് ആരോപിക്കപ്പെടുന്ന വ്യക്തിയുടെ സ്വാധീനവലയത്തിൽ മികച്ച പ്രകടനം നടത്താൻ സാധിക്കുമോ എന്ന് അവർ ആശങ്കപ്പെടുന്നു.

"അദ്ദേഹവുമായി ബന്ധമുള്ള ആളുകൾ മാത്രമുള്ള സ്ഥലത്ത് പോയി മത്സരിക്കുക എന്നത് ചിന്തിക്കാവുന്നതിലും അപ്പുറമാണ്. അവിടെ പോയി എനിക്ക് 100 ശതമാനം പ്രകടനം പുറത്തെടുക്കാൻ കഴിയുമെന്ന് ഞാൻ കരുതുന്നില്ല."

ഏഷ്യൻ ഗെയിംസിനുള്ള പരിശീലനം തുടരുന്നതിനിടെ വിനേഷ് നടത്തിയ ഈ വെളിപ്പെടുത്തൽ, കായികതാരങ്ങളുടെ സുരക്ഷയും ഭരണപരമായ സുതാര്യതയും ഉറപ്പാക്കാൻ കേന്ദ്ര കായിക മന്ത്രാലയത്തിന് മേൽ വലിയ സമ്മർദ്ദം ചെലുത്തുന്നുണ്ട്.

എന്തുകൊണ്ട് ഗുസ്തി താരങ്ങൾ പ്രതിഷേധിച്ചു?

2023-ൽ ബ്രിജ് ഭൂഷനെതിരെ നടന്ന പ്രതിഷേധം ആഗോളതലത്തിൽ ശ്രദ്ധിക്കപ്പെട്ടിരുന്നു. സാക്ഷി മാലിക്, ബജ്‌രംഗ് പുനിയ എന്നിവരോടൊപ്പം വിനേഷും ജന്തർ മന്തറിൽ മാസങ്ങളോളം സമരം ചെയ്തു.

പുതിയ പാർലമെന്റ് മന്ദിരത്തിലേക്കുള്ള മാർച്ചിൽ ഗുസ്തി താരങ്ങളെ പോലീസ് ബലം പ്രയോഗിച്ച് നീക്കം ചെയ്തത് വലിയ പ്രതിഷേധത്തിന് ഇടയാക്കിയിരുന്നു.

ഒളിമ്പിക് മെഡൽ ജേതാക്കളായ താരങ്ങളെ തെരുവിലൂടെ വലിച്ചിഴയ്ക്കുന്ന ദൃശ്യങ്ങൾ അന്താരാഷ്ട്ര ഒളിമ്പിക് കമ്മിറ്റിയുടെ ഉൾപ്പെടെ വിമർശനത്തിന് കാരണമായി.വിനേഷ് ഉൾപ്പെടെയുള്ള ആറ് മുതിർന്ന വനിതാ താരങ്ങൾ നൽകിയ ലൈംഗിക പീഡന പരാതിയിൽ ബ്രിജ് ഭൂഷൺ ഇപ്പോഴും വിചാരണ നേരിടുകയാണ്.