ജൂനിയർ ഏഷ്യാ കപ്പ് ഹോക്കി: ഇന്ത്യയെ അൻമോൾ എക്ക നയിക്കും

ന്യൂഡൽഹി: ചൈനയിലെ മോഖിയിൽ നടക്കുന്ന എഎച്ച്എഫ് ജൂനിയർ ഏഷ്യാ കപ്പിനുള്ള ഇന്ത്യൻ പുരുഷ ഹോക്കി ടീമിനെ പ്രഖ്യാപിച്ചു. 18 അംഗ ടീമിന്റെ നായകനായി പ്രതിരോധ താരം അൻമോൾ എക്കയെ തെരഞ്ഞെടുത്തു.

ഓഗസ്റ്റ് 30 മുതൽ സെപ്റ്റംബർ 13 വരെയാണ് ടൂർണമെന്റ് നടക്കുന്നത്. പുതുതായി നിയമിതനായ പരിശീലകൻ ഫ്രെഡറിക് സോയിസിന്റെ നേതൃത്വത്തിൽ ബെംഗളൂരുവിലെ സ്പോർട്സ് അതോറിറ്റി ഓഫ് ഇന്ത്യ കേന്ദ്രത്തിലാണ് ടീം പരിശീലനം നടത്തുന്നത്.

ടൂർണമെന്റിന് മുന്നോടിയായി ഇന്ത്യൻ ടീം ബെൽജിയത്തിൽ പര്യടനം നടത്തി ശക്തരായ എതിരാളികൾക്കെതിരെ മത്സരിച്ചിരുന്നു. പരിശീലനവും മത്സരപരിചയവും ടീമിന്റെ പ്രകടനം മെച്ചപ്പെടുത്താനും മികച്ച കോമ്പിനേഷനുകൾ കണ്ടെത്താനും സഹായിച്ചതായി പരിശീലക സംഘം വ്യക്തമാക്കി.

നിലവിൽ മലേഷ്യൻ അണ്ടർ-21 ടീമിനെതിരായ സൗഹൃദ മത്സരങ്ങളിലൂടെയാണ് ഇന്ത്യൻ താരങ്ങൾ ഒരുക്കം തുടരുന്നത്. ജൂനിയർ ഏഷ്യാ കപ്പ് ശക്തമായ മത്സരമായിരിക്കുമെന്നും അച്ചടക്കമുള്ള ആക്രമണ ഹോക്കിയിലൂടെ മികച്ച പ്രകടനം ലക്ഷ്യമിടുന്നതായും പരിശീലകൻ ഫ്രെഡറിക് സോയിസ് പറഞ്ഞു.

ഇന്ത്യൻ ടീം

ഗോൾകീപ്പർമാർ

വിവേക് ലക്ര, കുനാൽ തേവാതിയ

ഡിഫൻഡർമാർ

അൻമോൾ എക്ക (ക്യാപ്റ്റൻ), രോഹിത് കുള്ളു, ചിരാഗ്, രവീന്ദർ, ആശു മൗര്യ, സഞ്ജിത് ടിർക്കി, സുഖ്‌വിന്ദർ

മിഡ്ഫീൽഡർമാർ

അദ്രോഹിത് എക്ക, ഹർപാൽ, ജീത്പാൽ, മൻമീത് സിംഗ് റായ്

ഫോർവേഡുകൾ

അജീത് യാദവ്, പ്രഭ്ദീപ് സിംഗ്, ഗുർസേവക് സിംഗ്, ആര്യൻ എക്സസ്, ലോവീനൂർ സിംഗ്

പകരക്കാരായ താരങ്ങൾ

അർജുൻ സന്തോഷ് ഹർഗുഡെ, ഋതിക് ലക്ര