ഹോക്കി ലോകകപ്പ്: ജർമ്മനി - സ്പെയിൻ കലാശപ്പോരാട്ടം നാളെ

ആംസ്റ്റൽവീൻ : പുരുഷ ഹോക്കി ലോകകപ്പിൽ നിലവിലെ ചാമ്പ്യന്മാരായ ജർമ്മനിയും സ്പെയിനും ഫൈനലിൽ ഏറ്റുമുട്ടും. നാളെ രാതി 8 മണിക്കാണ് മത്സരം. സെമിഫൈനലിൽ അർജന്റീനയെ 2-1 ന് തോൽപ്പിച്ചാണ് ജർമ്മനി ഫൈനലിൽ കടന്നത്. രണ്ടാം സെമിയിൽ ആതിഥേയരായ നെതർലൻഡ്സിനെ 4-3 ന് അട്ടിമറിച്ചാണ് സ്പെയിൻ കലാശപ്പോരാട്ടത്തിന് യോഗ്യത നേടിയത്. 1998 ന് ശേഷം ആദ്യമായാണ് സ്പെയിൻ ലോകകപ്പ് ഫൈനലിൽ എത്തുന്നത്.

ആവേശകരമായ ആദ്യ സെമിയിൽ 33-ാം മിനിറ്റിൽ മോറിറ്റ്സ് ലുഡ്‌വിഗിന്റെ പാസിൽ നിന്ന് ജസ്റ്റസ് വൈഗാൻഡ് നേടിയ ഗോളിലൂടെ ജർമ്മനിയാണ് ആദ്യം മുന്നിലെത്തിയത്. എന്നാൽ നാലാം ക്വാർട്ടറിന്റെ തുടക്കത്തിൽ ലഭിച്ച പെനാൽറ്റി കോർണറിലൂടെ ടോമാസ് ഡൊമെനെ അർജന്റീനയ്ക്കായി സമനില പിടിച്ചു.

50-ാം മിനിറ്റിൽ അർജന്റീനിയൻ താരം ലൂസിയോ മെൻഡെസിന് മഞ്ഞക്കാർഡ് ലഭിച്ച് പുറത്തുപോകേണ്ടി വന്നത് മത്സരത്തിൽ നിർണായകമായി. 10 പേരായി ചുരുങ്ങിയ അർജന്റീനയ്ക്കെതിരെ 54-ാം മിനിറ്റിൽ പോൾ-ഫിലിപ്പ് കൗഫ്മാൻ ജർമ്മനിയുടെ വിജയഗോൾ നേടി. രണ്ട് ഗോൾ നേടിയ ജസ്റ്റസ് വൈഗാൻഡാണ് പ്ലെയർ ഓഫ് ദി മാച്ച്.

രണ്ടാം സെമിയിൽ മൂന്നാം ക്വാർട്ടർ വരെ 1-0 ന് മുന്നിൽ നിന്ന ശേഷമാണ് നെതർലൻഡ്സ് സ്പെയിനോട് പരാജയപ്പെട്ടത്. സ്പെയിനായി ജോസ് ബാസ്റ്ററ ഹാട്രിക് നേടിയപ്പോൾ പേപെ കുനിൽ ഒരു ഗോൾ നേടി. നെതർലൻഡ്സിനായി ജിപ് യാൻസൻ, ജൂപ്പ് ഡി മോൾ എന്നിവർ ഗോളുകൾ നേടിയെങ്കിലും സ്പെയിന്റെ വിജയം തടയാനായില്ല. സ്റ്റാർ സ്പോർട്സ് ചാനലിലും ജിയോ ഹോട് സ്റ്റാറിലും മത്സരം തത്സമയം കാണാം.