print edition ഇടിക്കൂട്ടിലെ ‘ചന്ദ്രജാലം’ ; ഇന്ത്യയെ 
ബോക്‌സിങ്‌ കപ്പ്‌ 
ചാമ്പ്യൻമാരാക്കിയത്‌ 
മലയാളി 
പരിശീലകൻ

സമാനതകളില്ലാത്ത നേട്ടമാണ്‌ സമീപകാലത്ത്‌ ഇന്ത്യൻ വനിതാ ബോക്‌സിങ്ങിൽ. ലോക ചാമ്പ്യൻഷിപ്പിന്‌ പിന്നാലെ ബോക്‌സിങ്‌ കപ്പിലും ഇന്ത്യ തിളങ്ങി. മലയാളി പരിശീലകൻ ദ്രോണാചാര്യ ഡോ. ഡി ചന്ദ്രലാലാണ്‌ വനിതാ ടീം കോച്ച്‌. മാർച്ചിൽ ചുമതലയേറ്റ കൊല്ലം സ്വദേശിക്ക്‌ കീഴിൽ ഇന്ത്യ വനിതാ ബോക്‌സിങ്ങിൽ വൻ ശക്തിയായി മാറുകയാണ്‌. മേരികോം ഉൾപ്പെടെയുള്ള ലോക താരങ്ങളെ പരിശീലിപ്പിച്ചിട്ടുണ്ട്‌. മാർച്ചിലാണ്‌ വീണ്ടും ഇന്ത്യൻ ടീമിന്റെ പരിശീലകനായെത്തുന്നത്‌. ഇന്ത്യൻ വനിതാ ബോക്‌സിങ് ടീമിനെക്കുറിച്ചും ഭാവി ലക്ഷ്യങ്ങളെക്കുറിച്ചും അദ്ദേഹം സംസാരിക്കുന്നു.

​

പവർഹ‍ൗസ്‌

ഇന്ത്യ ലോക ബോക്‌സിങ്ങിലെ പവർഹ‍ൗസായി മാറുന്നതിൽ സന്തോഷമുണ്ട്‌. ലോക ചാന്പ്യൻഷിപ്പ്‌ കഴിഞ്ഞപ്പോൾ വേൾഡ്‌ ബോക്‌സിങ്‌ പ്രസിഡന്റ്‌ തന്നെ പറഞ്ഞു. ‘ഇന്ത്യ എവിടെയുമുണ്ടായിരുന്നില്ല. പക്ഷേ, ബോക്‌സിങ്‌ കപ്പും ലോക ചാന്പ്യൻഷിപ്പും കഴിഞ്ഞപ്പോൾ വനിതാ ബോക്‌സിങ്ങിൽ ഇന്ത്യ പവർഹ‍ൗസായി മാറുകയാണ്‌’. ഇന്ത്യൻ ബോക്‌സിങ്ങിൽ വലിയ മാറ്റങ്ങൾ സംഭവിക്കുന്നുണ്ട്‌. കസാഖ്‌സ്ഥാനിൽ നമുക്ക്‌ വനിതകളിൽ മികച്ച നേട്ടമുണ്ടാക്കാനായി. വനിതകളും പുരുഷന്മാരും ആദ്യമായി ഒരുവേദിയിൽ ഇറങ്ങിയ ലോക ചാന്പ്യൻഷിപ്പിൽ രണ്ട്‌ സ്വർണവും ഓരോ വെള്ളിയും വെങ്കലവും നേടി. ബോക്‌സിങ്‌ കപ്പിൽ ജേതാക്കളായി. ഏഴ്‌ സ്വർണമാണ്‌ വനിതകൾക്ക്‌. നമ്മൾ മോശം അവസ്ഥയിൽ നിന്ന് തിരിച്ചു വരികയാണ്.

അച്ചടക്കം

കൃത്യമായി പരിശീലനം നടത്താതെ എവിടെയുമെത്താനാകില്ല. ഇന്നലെ എന്തുണ്ടായിരുന്നു എന്നതിൽ കാര്യമില്ല. ഇന്ന്‌ എന്താണ്‌. നാളെ എന്താകണം എന്നതാകണം നമ്മുടെ അധ്വാനം. അച്ചടക്കമുള്ള പരിശീലനം അത്യാവശ്യം. ബോക്‌സിങ്ങിൽ പരിശീലകന്‌ വലിയ പ്രാധാന്യമുണ്ട്‌. കുട്ടികളെ ലക്ഷ്യബോധമുള്ളവരാക്കുകയാണ്‌ പ്രധാനം. അതിനൊപ്പം ആഭ്യന്തര തലത്തിൽ മികച്ച മത്സരങ്ങളും വേണം. പട്യാലയിൽ നടത്തിയ മികച്ച പരിശീലനമാണ്‌ ബോക്‌സിങ്‌ കപ്പിലെ ഇന്ത്യയുടെ മെഡൽ നേട്ടത്തിന്‌ കാരണം.

​

ഭാവി ശോഭനം

മീനാക്ഷി ഹൂഡയും ജാസ്‌മിൻ ലംബോറിയയും ഇന്ത്യയുടെ ഭാവി പ്രതീക്ഷകളാണ്‌. ലോക ചാന്പ്യൻഷിപ്പിൽ ജാസ്‌മിൻ തോൽപ്പിച്ചത്‌ പോളണ്ടിന്റെ ഒളിന്പിക്‌സ്‌ വെള്ളി മെഡൽ ജേതാവിനെയും ഒന്നാം റാങ്കുകാരിയെയുമാണ്‌. മീനാക്ഷിയും കസാഖ്‌സ്ഥാന്റെ ഒളിന്പിക്‌സ്‌ വെങ്കല മെഡൽ ജേതാവിനെ തോൽപ്പിച്ച്‌ ചാമ്പ്യനായി. നിലവിലെ പ്രകടനം കണക്കിലെടുത്താൽ ഒളിന്പിക്‌സ്‌ ചാന്പ്യനാകാനുള്ള കരുത്തുണ്ട്‌. പക്ഷേ, ഒളിന്പിക്‌സിന്‌ ഇനിയും രണ്ടര വർഷമുണ്ട്‌. പുതിയ താരങ്ങൾ ഉയർന്നുവരാം. അതിനാൽ നിർണായകമാണ്‌ ഇ‍ൗ കാലയളവ്‌. നുപൂർ ഷെറോൺ, പർവീൺ ഹൂഡ, പ്രീതി പവാർ എന്നിവരെല്ലാം പ്രതീക്ഷയുള്ള താരങ്ങളാണ്‌.

​

24 ക്യാരറ്റ്‌ ജയം

യൂറോപ്യൻ രാജ്യങ്ങളിൽ മത്സരിച്ച്‌ നേടുന്ന ജയത്തിന്‌ വലിയ മൂല്യമുണ്ട്‌. ആ സാഹചര്യങ്ങളിൽ പൊരുതി ജയിക്കുക എന്നതാണ്‌ നിസാര കാര്യമല്ല. ലിവർപൂളിലെയും അസ്‌താനയിലെയും മത്സരങ്ങൾ നമ്മുടെ യുവതാരങ്ങൾക്ക്‌ വലിയ ആത്മവിശ്വാസം നൽകും. അവർ നേരിട്ടതും തോൽപ്പിച്ചതുമൊക്കെ ലോകോത്തര താരങ്ങളെയും ഒളിമ്പ്യൻമാരെയുമൊക്കെയാണ്‌. കോമൺവെൽത്ത്‌ ഗെയിംസ്‌, ഏഷ്യൻ ഗെയിംസ്‌, ഒളിന്പിക്‌സ്‌ എന്നിവയാണ്‌ അടുത്ത ലക്ഷ്യം.

ബോക്‌സിങ്‌ കപ്പ്‌: ഇന്ത്യ ജേതാക്കൾ

ലോക ബോക്‌സിങ്‌ കപ്പിൽ ചരിത്രനേട്ടവുമായി ഇന്ത്യ. ഗ്രേറ്റർ നോയിഡയിൽ നടന്ന ഫൈനൽസിൽ 20 മെഡലുകളാണ്‌ ഇന്ത്യ സ്വന്തമാക്കിയത്‌. ഒന്പത്‌ സ്വർണവും ആറ്‌ വെള്ളിയും അഞ്ച്‌ വെങ്കലവും. അതിൽ ഏഴ്‌ സ്വർണം വനിതകളാണ്‌ നേടിയത്‌. ഒരു വെള്ളിയും രണ്ട്‌ വെങ്കലവുമുണ്ട്‌.

ബോക്‌സിങ്‌ കപ്പ്‌ സീരീസിന്റെ അവസാന പാദമായിരുന്നു നോയിഡയിൽ നടന്നത്‌. കരുത്തരായ ഉസ്‌ബെക്കിസ്ഥാനും കസാഖ്‌സ്ഥാനും രണ്ടാംനിരയെയാണ്‌ ഇറക്കിയത്‌. ചൈനയും അമേരിക്കയും പങ്കെടുത്തില്ല. ഇന്ത്യ 20 ഇനങ്ങളിൽ ഇറങ്ങി. വനിതകളിൽ നിഖാത്‌ സറീന്റെ തിരിച്ചുവരവാണ്‌ ശ്രദ്ധേയമായത്‌. ഇ‍ൗ വർഷം ആദ്യ രാജ്യാന്തര മെഡലാണ്‌ സറീൻ സ്വന്തമാക്കിയത്‌.