ഒരു രാജ്യം വംശഹത്യയിൽ പ്രതിയാവുന്നത് ആദ്യം
മ്യാൻമാര് ചെയ്തത് വംശഹത്യ: റോഹിംഗ്യൻ അഭയാര്ഥികളെ തിരിച്ചെത്തിക്കാനും യുഎൻ നീതിന്യായ കോടതി ഉത്തരവ്

ഹേഗ്:റോഹിംഗ്യൻ വിഭാഗത്തിനെതിരായ സൈനിക ആക്രമണങ്ങളിലൂടെ മ്യാൻമാര് ചെയ്തത് വംശഹത്യയെന്ന് അന്താരാഷ്ട്ര നീതിന്യായ കോടതി. ആക്രമണം മൂലം പലായനം ചെയ്തവരെ തിരികെ രാജ്യത്ത് പ്രവേശിപ്പിക്കാനും ഉത്തരവ് നൽകി. ഐക്യരാഷ്ട്രസഭയുടെ പരമോന്നത നീതിപീഠമായ അന്താരാഷ്ട്ര നീതിന്യായ കോടതി അതിന്റെ ചരിത്രത്തിൽ ആദ്യമായാണ് ഒരു രാജ്യത്തിനെതിരെ ഇങ്ങനെ ഒരു വിധി പുറപ്പെടുവിക്കുന്നത്.
ഈ വര്ഷം സമാധാനത്തിനുള്ള നോബൽ സമ്മാനം നേടിയ പ്രമുഖ അന്താരാഷ്ട്ര നിയമജ്ഞ നവി പിള്ള ഉൾപ്പെടുന്ന 15 അംഗ ബെഞ്ചാണ് വിധി പ്രസ്താവിച്ചത്. 9-6 എന്ന ഭൂരിപക്ഷത്തിലാണ് കോടതി മ്യാൻമറിനെതിരെ വിധി പറഞ്ഞത്. 2017-ലെ അതി ക്രൂരമായ സൈനിക നടപടികളുടെ പശ്ചാത്തലത്തിലാണ് കേസ് പരിഗണിച്ചത്.
വിഘടനവാദി ആരോപണം തള്ളി
വടക്കൻ റാഖൈൻ പ്രവിശ്യയിൽ റോഹിംഗ്യൻ വിഭാഗത്തിനെതിരെ മ്യാൻമർ വംശഹത്യ നടത്തിയെന്നും, ഇത് 1948-ലെ വംശഹത്യ വിരുദ്ധ കൺവെൻഷന്റെ (Genocide Convention) ലംഘനമാണെന്നും കോടതി പ്രസിഡന്റ് യുജി ഇവാസാവ വ്യക്തമാക്കി. 2017-ലെ സൈനിക നീക്കം വിഘടനവാദികൾക്കെതിരായ നിയമാനുസൃതമായ നടപടിയായിരുന്നു എന്ന മ്യാൻമറിന്റെ വാദം കോടതി പൂർണ്ണമായും തള്ളിക്കളഞ്ഞു.
മ്യാൻമർ സുരക്ഷാ സേന ഏകദേശം 10,000-ത്തോളം റോഹിംഗ്യൻ സാധാരണക്കാരെ കൊലപ്പെടുത്തി. വ്യാപകമായ ലൈംഗികാതിക്രമങ്ങളും കുട്ടികൾക്കെതിരായ കടുത്ത ക്രൂരതകളും നടത്തിയതായും കോടതി കണ്ടെത്തി. കൂട്ടത്തോടെ പലായനം ചെയ്യാൻ ശ്രമിച്ചവരെ പോലും സൈന്യം ആക്രമിച്ചു.
റോഹിംഗ്യൻ ജനതയ്ക്ക് സുരക്ഷിതവും മാന്യവും സ്വമേധയാ ഉള്ളതുമായ തിരിച്ചുവരവ് ഉറപ്പാക്കാൻ കോടതി മ്യാൻമറിനോട് ഉത്തരവിട്ടു. വംശഹത്യയ്ക്ക് ഉത്തരവാദികളായവരെ അന്വേഷിച്ച് കണ്ടെത്തി ശിക്ഷിക്കാനും ഇരകൾക്ക് നഷ്ടപരിഹാരം നൽകാനും കോടതി നിർദ്ദേശിച്ചു. നഷ്ടപരിഹാരത്തുക സംബന്ധിച്ച തീരുമാനം പിന്നീടുള്ള നടപടികളിൽ കൈക്കൊള്ളും.

കോടതിമുറിയിൽ വൈകാരിക നിമിഷങ്ങൾ
ഏകദേശം മൂന്ന് മണിക്കൂർ നീണ്ട വിധിപ്രസ്താവം കേൾക്കാൻ ആയിരക്കണക്കിന് കിലോമീറ്ററുകൾ സഞ്ചരിച്ച് എത്തിയ റോഹിംഗ്യൻ വംശജരും അഭിഭാഷകരും വിധി വന്നതിന് പിന്നാലെ പരസ്പരം ആലിംഗനം ചെയ്തും കരഞ്ഞുമാണ് സന്തോഷം പങ്കുവെച്ചത്. "ഇത് റോഹിംഗ്യൻ ജനതയ്ക്ക് മാത്രമല്ല, തങ്ങളുടെ ദുരിതങ്ങൾ ആരും കേൾക്കുന്നില്ലെന്ന് കരുതിയിരുന്ന ലോകമെമ്പാടുമുള്ള അടിച്ചമർത്തപ്പെട്ട എല്ലാ ജനവിഭാഗങ്ങൾക്കും വലിയ ദിവസമാണ്," എന്ന് വിധി കേൾക്കാൻ കോടതിയിലെത്തിയ റോഹിംഗ്യൻ മനുഷ്യാവകാശ പ്രവർത്തക യാസ്മിൻ ഉള്ള പ്രതികരിച്ചു.
ശുദ്ധീകരണ നടപടി എന്ന പേരിൽ
വംശീയ വേട്ട
2017 ഓഗസ്റ്റിലാണ് ഒരു റോഹിംഗ്യൻ വിഘടനവാദി ഗ്രൂപ്പിന്റെ ആക്രമണത്തിന് മറുപടിയെന്നോണം മ്യാൻമർ സൈന്യം റാഖൈൻ പ്രവിശ്യയിൽ 'ശുദ്ധീകരണ നടപടി' (Clearance Campaign) ആരംഭിച്ചത്. ഇതിനെത്തുടർന്ന് നടുക്കുന്ന അതിക്രമങ്ങളും കൂട്ടബലാത്സംഗങ്ങളും കൊലപാതകങ്ങളും നടത്തി. ആയിരക്കണക്കിന് വീടുകൾ അഗ്നിക്കിരയാക്കി. അതിക്രമങ്ങൾക്കെതിരെ ആഫ്രിക്കൻ രാഷ്ട്രമായ ഗാംബിയയാണ് 2019-ൽ അന്താരാഷ്ട്ര നീതിന്യായ കോടതിയെ സമീപിച്ചത്. വംശഹത്യ നടന്നിട്ടുണ്ടെന്ന് സ്ഥാപിക്കാൻ, ഒരു ജനവിഭാഗത്തെ "പൂർണ്ണമായോ ഭാഗികമായോ നശിപ്പിക്കാനുള്ള ഉദ്ദേശ്യം" ഉണ്ടായിരുന്നുവെന്ന് കോടതിക്ക് ബോധ്യപ്പെടേണ്ടതുണ്ടായിരുന്നു.
നിലവിൽ ഏകദേശം 12 ലക്ഷത്തോളം റോഹിംഗ്യൻ അഭയാർത്ഥികൾ ബംഗ്ലാദേശിലെ കോക്സ് ബസാർ ജില്ലയിലെ തിങ്ങിനിറഞ്ഞ ക്യാമ്പുകളിലാണ് കഴിയുന്നത്. തീപിടുത്ത ഭീഷണി, പകർച്ചവ്യാധികൾ, മണ്ണിടിച്ചിൽ, ശുചിത്വമില്ലായ്മ, കർശനമായ തൊഴിൽ നിയന്ത്രണങ്ങൾ എന്നിവയാൽ ദുരിതപൂർണ്ണമായ ജീവിതമാണ് ഇവർ അവിടെ നയിക്കുന്നത്.
2026 ഓഗസ്റ്റിൽ നടന്ന വംശഹത്യ അനുസ്മരണ ദിനത്തിൽ, ബംഗ്ലാദേശിലെ കോക്സ് ബസാറിലുള്ള റോഹിംഗ്യൻ അഭയാർത്ഥികൾ മ്യാൻമറിൽ നിന്നുള്ള തങ്ങളുടെ പലായനത്തിന്റെ ഒൻപതാം വാർഷികം ആചരിക്കുന്നു
അന്താരാഷ്ട്ര നീതിന്യായ കോടതിയുടെ വിധികൾ അന്തിമവും നിയമപരമായി ബാധ്യതയുള്ളതുമാണ്. എന്നാൽ, വിധി നടപ്പിലാക്കാൻ കോടതിക്ക് നേരിട്ട് സംവിധാനങ്ങളില്ല. മ്യാൻമർ വിധി ലംഘിച്ചാൽ അത് യുഎൻ രക്ഷാസമിതിക്ക് റിപ്പോർട്ട് ചെയ്യാൻ മാത്രമേ കോടതിക്ക് സാധിക്കൂ.
എങ്കിലും ഈ വിധി മറ്റ് അന്താരാഷ്ട്ര കേസുകളിലും നിർണ്ണായകമാകും. ഡൊണള്ഡ് ട്രംപ് ഉള്പ്പെടെ ഭരണകൂടങ്ങള് അന്താരാഷ്ട്ര കോടതിയെ തകര്ക്കാൻ ആസൂത്രിത നീക്കവും അഭിപ്രായ സമാഹരണവും നടത്തുന്ന സാഹചര്യത്തിലാണ് വിധി വന്നിരിക്കുന്നത്. വ്യാഴാഴ്ച ചൈനയിൽ നടന്ന ത്രികക്ഷി ചർച്ച തുടങ്ങുന്നതിന് തൊട്ട് മുൻപ് വരെ യു എൻ കോടതിയെ ട്രംപ് തള്ളിപ്പറഞ്ഞിരുന്നു. അമേരിക്ക പോലുള്ള രാജ്യങ്ങള്ക്ക് ഇത് വെല്ലുവിളിയാണ് എന്ന് അഭിപ്രായപ്പെട്ടു.
അടുത്തത് ഇസ്രയേൽ
ഗാസയിലെ സൈനിക നടപടികളിലൂടെ ഇസ്രായേൽ വംശഹത്യ വിരുദ്ധ കൺവെൻഷൻ ലംഘിച്ചുവെന്ന് ചൂണ്ടികാട്ടി ദക്ഷിണാഫ്രിക്ക നൽകിയ കേസ് ഇതേ കോടതിയുടെ പരിഗണനയിലാണ്. ഇസ്രായേൽ ഈ ആരോപണം നിഷേധിച്ചിട്ടുണ്ട്. അമേരിക്ക അവര്ക്ക് വംശഹത്യയിൽ പിന്തുണ തുടരുകയും ചെയ്യുന്നു. 2022-ലെ അധിനിവേശത്തെ ന്യായീകരിക്കാൻ റഷ്യ വ്യാജ വംശഹത്യ ആരോപണങ്ങൾ ഉന്നയിച്ചുവെന്ന് കാട്ടി യുക്രെയ്ൻ നൽകിയ കേസും കോടതിയിലുണ്ട്.
മ്യാൻമർ സൈന്യത്തിൽ നിന്ന് റോഹിംഗ്യൻ ജനത അനുഭവിച്ച ദുരിതങ്ങൾക്കുള്ള ദീർഘകാലത്തെ കാത്തിരിപ്പിന് ശേഷമുള്ള അംഗീകാരമാണ് ഈ വിധിയെന്നും, ലോകമെമ്പാടുമുള്ള വംശഹത്യ ഇരകളുടെ നീതിക്കായുള്ള പോരാട്ടത്തിന് ഇതൊരു സുപ്രധാന മാതൃകയാകുമെന്നും ഹ്യൂമൻ റൈറ്റ്സ് വാച്ച് സീനിയർ ഇന്റർനാഷണൽ ജസ്റ്റിസ് കൗൺസൽ മരിയ എലീന വിഗ്നോളി അഭിപ്രായപ്പെട്ടു.
2007-ൽ ബോസ്നിയയിലെ സ്രെബ്രെനിക്ക കൂട്ടക്കൊലയിൽ വംശഹത്യ തടയുന്നതിൽ സെർബിയ പരാജയപ്പെട്ടുവെന്ന് കോടതി വിധിച്ചിരുന്നു. എന്നാൽ ഒരു രാജ്യം നേരിട്ട് വംശഹത്യ നടത്തിയെന്ന് വിധിക്കുന്നത് ഇതാദ്യമാണ്.








0 comments