ഏഷ്യൻ ഗെയിംസ്: തജീന്ദർപാൽ സിങിന് പകരം പവൻ സെറാവത്ത് പതാകവാഹകൻ

നഗോയ: ഏഷ്യൻ ഗെയിംസ് ഉദ്ഘാടനച്ചടങ്ങിൽ ഷോട്ട്പുട്ട് താരം തജീന്ദർപാൽ സിങിന് പകരം കബഡി താരം പവൻ സെറാവത്ത് ഇന്ത്യയുടെ പതാകവാഹകനാകും. ഔദ്യോഗിക കിറ്റ് സമയത്ത് ലഭിക്കാത്തതിനാൽ തജീന്ദർപാൽ സിങ്ങിന് ചടങ്ങിൽ പങ്കെടുക്കാൻ കഴിയാത്തതിനെ തുടർന്നാണ് സെറാവത്തിനെ പകരം നിയോഗിച്ചതെന്നാണ് വിശദീകരണം.

ഷൂട്ടിംഗ് താരം മനു ഭാക്കറിനൊപ്പം തജീന്ദർപാലിനെയാണ് നേരത്തെ പതാകവാഹകനായി പ്രഖ്യാപിച്ചിരുന്നത്. മുൻ ഏഷ്യൻ ഗെയിംസിൽ സ്വർണം നേടിയ ഇന്ത്യൻ പുരുഷ കബഡി ടീമിലെ അംഗമായിരുന്ന സെറാവത്ത് ഇനി തജീന്ദർപാൽ സിങ് പകരം പതാകയേന്തുമെന്ന് ഇന്ത്യൻ സംഘത്തിന്റെ ചീഫ് ഡി മിഷൻ സഹദേവ് യാദവ് അറിയിച്ചു.

കിറ്റ് വൈകിട്ട് മൂന്നിന് നഗോയ വിമാനത്താവളത്തിൽ എത്തുമെന്നാണ് അറിയിച്ചതെന്നും അവിടെ നിന്ന് ഉദ്ഘാടന വേദിയിലെത്താൻ സമയമെടുക്കുന്നതിനാൽ ചടങ്ങിൽ പങ്കെടുക്കുന്നില്ലെന്നും തജീന്ദർപാൽ പറഞ്ഞു. ഇന്ത്യയിൽ തന്നെയാണ് തന്റെ കിറ്റ് ഉള്ളതെന്നും അത്‌ലറ്റിക്സ് ടീമിലെ മറ്റാർക്കും ഇതുവരെ കിറ്റ് ലഭിച്ചിട്ടില്ലെന്നും അദ്ദേഹം വ്യക്തമാക്കി.

സെപ്തംബർ 13 മുതൽ ടോക്കിയോയ്ക്ക് സമീപമുള്ള സുകുബ സർവകലാശാലയിൽ പരിശീലനം നടത്തുന്ന ഇന്ത്യൻ അത്‌ലറ്റിക്സ് സംഘം സെപ്തംബർ 21ന് നഗോയയിലെത്തും. ഉദ്ഘാടനച്ചടങ്ങിലെ പതാകവാഹക ചുമതല സംബന്ധിച്ച് വെള്ളിയാഴ്ച മാത്രമാണ് തനിക്ക് അറിയിപ്പ് ലഭിച്ചതെന്നും തജീന്ദർപാൽ പറഞ്ഞു.