ബാഡ്മിന്റൺ: വനിതാ ടീം വിഭാഗത്തിൽ ഇന്ത്യ പുറത്ത്; തിളങ്ങി മലയാളി താരം ട്രീസ ജോളി

ന​ഗോയ: ഏഷ്യൻ ഗെയിംസ് വനിതാ ടീം ബാഡ്മിന്റണിൽ ഇന്ത്യയുടെ മെഡൽ പ്രതീക്ഷകൾ അവസാനിച്ചു. മത്സരത്തിൽ ജപ്പാനോട് 3-1 എന്ന നിലയിൽ പരാജയപ്പെട്ടാണ് ഇന്ത്യൻ ടീം പുറത്തായത്.

നാലാം മത്സരത്തിൽ ഇന്ത്യയുടെ തൻവി ശർമ്മ ജപ്പാന്റെ പ്രമുഖ താരം നോസോമി ഒകുഹാരയോട് 12-21, 10-21 എന്ന സ്കോറിന് പരാജയപ്പെട്ടതോടെയാണ് ഇന്ത്യയുടെ പുറത്താകൽ ഉറപ്പായത്. തൻവി ശർമ്മ - ഗായത്രി ഗോപീചന്ദ് സഖ്യവും നോസോമി ഒകുഹാര - മായ തഗുചി സഖ്യവും തമ്മിൽ നടക്കേണ്ടിയിരുന്ന അഞ്ചാം മത്സരം, ജപ്പാൻ 3-1 ന് വിജയം ഉറപ്പിച്ചതിനാൽ ഉപേക്ഷിച്ചു.

ആദ്യ മാച്ച് സിം​ഗിൾസിൽ ഇന്ത്യയുടെ മുൻനിര താരം പിവി സിന്ധു പരാജയപ്പെട്ടു. രണ്ടാം മാച്ച് സിംഗിൾസിൽ ഹുദ ഉന്നതിയും പരാജയപ്പെട്ടതോടെ ഇന്ത്യ 0-2 എന്ന നിലയിൽ പിന്നിലായി. മൂന്നാം മാച്ച് ഡബിൾസിൽ ഇന്ത്യ തിരിച്ചുവരവ് നടത്തി. ഗായത്രി ഗോപീചന്ദ് - ട്രീസ ജോളി സഖ്യം 21-17, 21-16 എന്ന സ്കോറിന് വിജയം നേടി ഇന്ത്യയുടെ പ്രതീക്ഷകൾ സജീവമാക്കി. നാലാം മാച്ച് സിംഗിൾസിൽ തൻവി ശർമ്മ 12-21, 10-21 എന്ന സ്കോറിന് നോസോമി ഒകുഹാരയോട് പരാജയപ്പെട്ടു.

ടീം പരാജയപ്പെട്ട് ഇന്ത്യ ടൂർണമെന്റിൽ നിന്ന് പുറത്തായെങ്കിലും, തോൽവിയുടെ നിഴലിലും മലയാളി താരം ട്രീസ ജോളിയുടെ തകർപ്പൻ പ്രകടനം ഇന്ത്യൻ ക്യാമ്പിന് വലിയ ആശ്വാസവും രാജ്യത്തിനും കേരളത്തിനും ഒരുപോലെ അഭിമാന നിമിഷവുമായി മാറി.