ഫിഫ ലോകകപ്പിൽ സെനഗലിനെതിരെ നോർവേയ്ക്ക് ത്രില്ലർ ജയം; ഇരട്ട ഗോളുമായി ഹാളണ്ട്

ന്യൂജേഴ്‌സി: ഫിഫ ലോകകപ്പിൽ സെനഗലിനെതിരായ വാശിയേറിയ പോരാട്ടത്തിൽ 3-2 എന്ന സ്കോറിന് നോർവേയ്ക്ക് വിജയം. സൂപ്പർ താരം എർലിങ് ഹാളണ്ടിന്റെ ഇരട്ട ഗോളുകളും മാർക്കസ് ഹോംഗ്രെൻ പെഡേഴ്സന്റെ ഗോളുമാണ് നോർവേയ്ക്ക് നിർണ്ണായക ജയം സമ്മാനിച്ചത്.

സെനഗലിനായി ഇസ്മായില സാർ രണ്ട് ഗോളുകൾ നേടി പൊരുതി നോക്കിയെങ്കിലും വിജയം നോർവേയ്ക്കൊപ്പമായിരുന്നു. ഇതോടെ രണ്ട് മത്സരങ്ങളിൽ നിന്ന് രണ്ട് ഗോളുകൾ വീതം നേടി ഹാളണ്ട് ടൂർണമെന്റിലെ തന്റെ ഫോം തുടരുകയാണ്.

മെറ്റ്‌ലൈഫ് സ്റ്റേഡിയത്തിൽ നടന്ന മത്സരത്തിൽ നോർവേയുടെ വ്യക്തമായ ആധിപത്യമായിരുന്നു കണ്ടതെങ്കിലും അവസാന നിമിഷം വരെ സെനഗൽ കടുത്ത വെല്ലുവിളിയുയർത്തി.

അവസാന നിമിഷം ഇസ്മായില സാർ നേടിയ രണ്ടാം ഗോൾ സെനഗലിന് ആശ്വാസം നൽകിയെങ്കിലും സമനില പിടിക്കാൻ അവർക്കായില്ല.

ഈ വിജയത്തോടെ ആറ് പോയിന്റുമായി നോർവേ ഗ്രൂപ്പിൽ രണ്ടാം സ്ഥാനത്താണ്. ഗോൾ ശരാശരിയിൽ ഫ്രാൻസാണ് ഒന്നാമത്. അവസാന ഗ്രൂപ്പ് മത്സരത്തിൽ ഫ്രാൻസും നോർവേയും തമ്മിലുള്ള പോരാട്ടം നിർണ്ണായകമായിരിക്കും.

സമനില നേടിയാൽ പോലും ഫ്രാൻസിന് ഗ്രൂപ്പ് ചാമ്പ്യന്മാരായി മുന്നേറാൻ സാധിക്കും. അതേസമയം, സെനഗൽ തുടർച്ചയായ തോൽവികളോടെ പൂജ്യത്തിൽ നിൽക്കുകയാണ്. നോക്കൗട്ട് സാധ്യത നിലനിർത്താൻ ഇറാഖിനെതിരായ അവസാന മത്സരത്തിൽ ജയം അനിവാര്യമാണ്.