ചരിത്രമെഴുതാൻ കേപ് വെർദെ; കന്നിപ്പോരാട്ടത്തിൽ എതിരാളികൾ വമ്പന്മാരായ സ്പെയിൻ

അറ്റ്‌ലാന്റ: ഫിഫ ലോകകപ്പിന്റെ ചരിത്രത്തിലേക്ക് തങ്ങളുടെ പേര് കൂട്ടിച്ചേർക്കാനായി ആഫ്രിക്കൻ കുഞ്ഞൻമാരായ കേപ് വെർദെ ഇന്ന് പന്തുതട്ടാനിറങ്ങുന്നു. മെഴ്‌സിഡസ് ബെൻസ് സ്റ്റേഡിയത്തിൽ നടക്കുന്ന ഗ്രൂപ്പ് എച്ച് പോരാട്ടത്തിൽ മുൻ ലോക ചാമ്പ്യന്മാരും യൂറോപ്യൻ ജേതാക്കളുമായ സ്പെയിനാണ് കേപ് വെർദെയുടെ എതിരാളികൾ.തിങ്കളാഴ്ച ഇന്ത്യൻ സമയം രാത്രി 9:30 നാണ് സ്പെയിൻ -കേപ് വെർദെ മത്സരം

കന്നി ലോകകപ്പ് കളിക്കുന്ന കേപ് വെർദെ വൻ അട്ടിമറി ലക്ഷ്യമിടുമ്പോൾ, മികച്ച ജയത്തോടെ ടൂർണമെന്റിന് തുടക്കമിടാനാണ് സ്പെയിൻ ഒരുങ്ങുന്നത്. സൗദി അറേബ്യ, യുറുഗ്വായ് എന്നിവരാണ് ഈ ഗ്രൂപ്പിലെ മറ്റ് ടീമുകൾ.

തുടർച്ചയായ വിജയങ്ങളുടെ ആത്മവിശ്വാസത്തിൽ 'ബ്ലൂ ഷാർക്സ്'

യോഗ്യതാ റൗണ്ടിൽ കരുത്തരായ കാമറൂണിനെ അട്ടിമറിച്ച് ഗ്രൂപ്പിൽ ഒന്നാമന്മാരായാണ് കേപ് വെർദെ തങ്ങളുടെ ചരിത്രപരമായ ലോകകപ്പ് യോഗ്യത ഉറപ്പാക്കിയത്. അവസാനമായി കളിച്ച മൂന്ന് അന്താരാഷ്ട്ര മത്സരങ്ങളിലും വിജയിച്ചതിന്റെ തികഞ്ഞ ആത്മവിശ്വാസത്തിലാണ് ബുബിസ്റ്റയുടെ പരിശീലനത്തിലിറങ്ങുന്ന ടീം.

ഇതിൽ സെർബിയ, ബെർമുഡ എന്നീ ടീമുകൾക്കെതിരെ 3-0 ത്തിന്റെ തകർപ്പൻ വിജയങ്ങളും ഉൾപ്പെടുന്നു. ഫിഫ റാങ്കിംഗിൽ രണ്ടാം സ്ഥാനത്തുള്ള സ്പെയിൻ തങ്ങൾക്ക് കടുത്ത വെല്ലുവിളിയാണെന്ന് അറിയാമെങ്കിലും, യാതൊരുവിധ സമ്മർദ്ദവുമില്ലാതെ പൂർണ്ണ സ്വാതന്ത്ര്യത്തോടെ കളിച്ച് അത്ഭുതങ്ങൾ സൃഷ്ടിക്കാനാണ് ആഫ്രിക്കൻ രാജ്യം ലക്ഷ്യമിടുന്നത്.

യൂറോ വീര്യവുമായി സ്പെയിൻ; യമാലും നിക്കോയും ബെഞ്ചിലിരുന്നേക്കും

2024-ൽ ഇംഗ്ലണ്ടിനെ തോൽപ്പിച്ച് യൂറോപ്യൻ ചാമ്പ്യന്മാരായ ലൂയിസ് ഡി ലാ ഫുവെന്റെയുടെ സ്പെയിൻ ടീം തന്നെയാണ് ഈ ടൂർണമെന്റിലെ പ്രധാന കിരീടപ്രതീക്ഷക്കാർ. കഴിഞ്ഞ 10 മത്സരങ്ങളിൽ തോൽവിയറിയാതെ മുന്നേറുന്ന അവർ, അവസാന തയ്യാറെടുപ്പ് മത്സരത്തിൽ പെറുവിനെ 3-1 ന് തകർത്തിരുന്നു.

പരിക്കിൽ നിന്നും മുക്തരായി വിങ്ങർമാരായ ലാമിൻ യമാലും നിക്കോ വില്യംസും അടുത്തിടെ പൂർണ്ണ പരിശീലനത്തിലേക്ക് മടങ്ങിയെത്തിയെങ്കിലും, ഇവരെ ആദ്യ ഇലവനിൽ ഉൾപ്പെടുത്താതെ പകരക്കാരുടെ ബെഞ്ചിലിരുത്താനാണ് സാധ്യത.

പേശീവലിവ് കാരണം വിക്ടർ മുനിയോസ് കളിക്കുന്ന കാര്യം സംശയത്തിലാണ്. ഫെറാൻ ടോറസ്, അലക്സ് ബീന, മൈക്കൽ ഒയാർസബാൽ എന്നിവരാകും സ്പെയിന്റെ മുന്നേറ്റനിര നയിക്കുക.

പരിക്കിന്റെ ആശങ്കകളില്ലാതെ കേപ് വെർദെ

ചരിത്രപരമായ ഈ മത്സരത്തിന് മുൻപ് കേപ് വെർദെ ക്യാമ്പിൽ ആർക്കും തന്നെ പരിക്കിന്റെ ആശങ്കകളില്ല. 97 മത്സരങ്ങളിൽ നിന്ന് 22 ഗോളുകൾ നേടി രാജ്യത്തിന്റെ എക്കാലത്തെയും മികച്ച ഗോൾവേട്ടക്കാരനായ 36-കാരൻ റയാൻ മെൻഡിസ് തന്നെയാകും ടീമിനെ നയിക്കുക.

ആക്രമണത്തിൽ മികവ് പുലർത്തുന്ന യുവതാരം ഡെയ്‌ലോൺ ലിവ്‌റാമെന്റോയും വിയ്യാറയൽ താരം ലോഗൻ കോസ്റ്റ നയിക്കുന്ന പ്രതിരോധ നിരയും കേപ് വെർദെയുടെ കരുത്താണ്. 4-3-3 എന്ന ആക്രമണ ശൈലിയിൽ കളിക്കുന്ന സ്പെയിനെ കൗണ്ടർ അറ്റാക്കുകളിലൂടെ പ്രതിരോധത്തിലാക്കാനാകും കേപ് വെർദെ കോച്ച് ബുബിസ്റ്റ തന്ത്രങ്ങൾ മെനയുക.