റോണോയും പിള്ളേരും കുതിക്കുന്നു; അൽ നാസർ ഒന്നാം സ്ഥാനത്ത്

ക്രിസ്റ്റ്യാനോ റൊണാൾഡോ Photo AFP
റിയാദ്: സൗദി പ്രോ ലീഗിൽ ക്രിസ്റ്റ്യാനോ റൊണാൾഡോയും പിള്ളേരും അപരാജിതരായി കുതിക്കുന്നു. ഞായറാഴ്ച നടന്ന മത്സരത്തിൽ അൽ ഖലീജിനെ ഒന്നിനെതിരെ നാലു ഗോളുകൾക്കാണ് അൽ നാസർ തകർത്തത്. സീസണിലെ ഒമ്പത് മത്സരങ്ങളിലും വിജയിച്ച ടീം ഒന്നാം സ്ഥാനത്ത് തുടരുകയാണ്. ക്രിസ്റ്റ്യാനോ റൊണാൾഡോയുടെ അവിസ്മരണീയ ബൈസിക്കിൾ കിക്കിനും ആരാധകർ സാക്ഷിയായി.
മികച്ച ഫോമിലുള്ള അൽ നസർ കളിയുടെ തുടക്കം മുതൽ ആധിപത്യം പുലർത്തി. കളിയുടെ 39-ാം മിനിറ്റിൽ ജോവോ ഫെലിക്സിലൂടെ ടീം ലീഡ് നേടി. ഗോൾ നേടിയതോടെ അൽ നാസർ കൂടുതൽ ഉണർന്നു. മൂന്ന് മിനിറ്റുകൾക്ക് ശേഷം 42-ാം മിനിറ്റിൽ വെസ്ലിയിലൂടെ ടീം ലീഡ് ഉയർത്തി. ഫെലിക്സാണ് ഗോളിന് വഴിയൊരുക്കിയത്.
രണ്ടാം പകുതിയുടെ തുടക്കത്തിൽ തന്നെ അൽ ഖലീജ് ഒരു ഗോൾ മടക്കി. മുറാദ് അൽ ഹവ്സവിയാണ് ടീമിനായി ഗോൾ നേടിയത്. സമനിലയ്ക്കായി അൽ ഖലീജ് ശ്രമിക്കുന്നതിനിടെ 77-ാം മിനിറ്റിൽ സാദിയോ മാനെ അൽ ടീമിനായി ഗോൾ നേടി. 90-ാം മിനിറ്റിൽ അൽ ഖലീജ് താരം ഡിമിട്രിയോസ് കുർബെലിസ് ചുവപ്പ് കാർഡ് കണ്ട് പുറത്തായത് ടീമിന് തിരിച്ചടിയായി. മത്സരത്തിന്റെ ഇഞ്ചുറി ടൈമിലായിരുന്നു കാണികളെ ആവേശത്തിലാഴ്ത്തി റൊണാൾഡോയുടെ ബൈസിക്കിൾ കിക്ക് ഗോൾ. 96-ാം മിനിറ്റില് ബോക്സിനുള്ളിലേക്ക് ലഭിച്ച ഹൈബോള് 40 കാരൻ മനോഹരമായി ബൈസിക്കിൾ കിക്കിലൂടെ ഗോളാക്കി മാറ്റുകയായിരുന്നു.









0 comments