ബ്രസീലിന് തിരിച്ചടി; നോർവേയ്‌ക്കെതിരായ മത്സരത്തിലും റാഫിഞ്ഞ കളിക്കില്ല

ന്യൂ ജേഴ്‌സി: 2026 ഫിഫ ലോകകപ്പിൽ നോർവേയ്‌ക്കെതിരെ നടക്കാനിരിക്കുന്ന ബ്രസീലിന്റെ നിർണ്ണായക പ്രീ-ക്വാർട്ടർ പോരാട്ടത്തിൽ സ്റ്റാർ വിംഗർ റാഫിഞ്ഞ ഉണ്ടാകില്ല. പേശീസംബന്ധമായ പരിക്കിൽ നിന്ന് താരം പൂർണ്ണമായി മുക്തനാകാത്തതിനാലാണ് പരിശീലക സംഘം അദ്ദേഹത്തെ ഒഴിവാക്കാൻ തീരുമാനിച്ചത്.

ഹെയ്‌തിക്കെതിരായ മത്സരത്തിനിടെയാണ് റാഫിഞ്ഞയ്ക്ക് വലതു തുടയുടെ പിൻഭാഗത്ത് പരിക്കേറ്റത്. തുടർന്ന് നടന്ന സ്കോട്ട്ലൻഡ്, ജപ്പാൻ മത്സരങ്ങളിലും താരത്തിന് കളത്തിലിറങ്ങാൻ സാധിച്ചിരുന്നില്ല.

നോർവേയ്‌ക്കെതിരായ മത്സരത്തിൽ തിരികെ എത്തുമെന്ന് പ്രതീക്ഷിച്ചിരുന്നെങ്കിലും, പരിശീലന സെഷനുകളിൽ പൂർണ്ണ കായികക്ഷമത തെളിയിക്കാൻ അദ്ദേഹത്തിന് കഴിഞ്ഞില്ല. കാർലോ ആൻസലോട്ടി ഉൾപ്പെടെയുള്ള പരിശീലക സംഘം താരത്തിന്റെ കാര്യത്തിൽ അതീവ ജാഗ്രതയാണ് പുലർത്തുന്നത്.

ബ്രസീൽ ക്വാർട്ടർ ഫൈനലിലേക്ക് മുന്നേറുകയാണെങ്കിൽ റാഫിഞ്ഞയ്ക്ക് തിരിച്ചുവരാനാകുമെന്ന പ്രതീക്ഷയിലാണ് മെഡിക്കൽ സംഘം. താരത്തിന്റെ പരിക്കിന്റെ ചരിത്രം പരിഗണിച്ച് യാതൊരുവിധ റിസ്കും എടുക്കാൻ ടീം തയ്യാറല്ല.

ബാഴ്‌സലോണ മെഡിക്കൽ വിഭാഗവും ബ്രസീലിയൻ ടീമുമായി നിരന്തരം ബന്ധപ്പെട്ട് താരത്തിന്റെ ആരോഗ്യാവസ്ഥ നിരീക്ഷിക്കുന്നുണ്ട്. ടൂർണമെന്റിന്റെ നിർണ്ണായക ഘട്ടത്തിൽ താരം തിരിച്ചെത്തുമെന്ന പ്രതീക്ഷയിലാണ് ആരാധകർ.