കൂവലും പിന്തുണയും ഒരുമിച്ച്; ഫെർണാണ്ടസിന്റെ ഭാവിയിൽ അനിശ്ചിതത്വം

ലണ്ടൻ: ട്രാന്‍സ്ഫര്‍ വിവാദത്തിനിടെ ചെൽസിയുടെ ഹോം ഗ്രൗണ്ടായ സ്റ്റാംഫോർഡ് ബ്രിഡ്ജിൽ ക്ലബ്ബിന്റെ അവസാന പ്രീ-സീസൺ മത്സരത്തിനായി എത്തിയ എൻസോ ഫെർണാണ്ടസിന് ചെൽസി ആരാധകരിൽ നിന്ന് സമ്മിശ്ര പ്രതികരണം.

ചില ആരാധകർ താരത്തെ കൂവിയപ്പോൾ, മറ്റൊരു വിഭാഗം ആരാധകർ പിന്തുണയുമായി രംഗത്തെത്തി. ശനിയാഴ്ച നടന്ന മത്സരത്തിൽ ചെൽസി 3-1 ന് റയൽ സോസിഡാഡിനെ പരാജയപ്പെടുത്തി.

മത്സരത്തിന്റെ 62-ാം മിനിറ്റിൽ ക്യാപ്റ്റൻ റീസ് ജെയിംസിന് പകരക്കാരനായാണ് ഫെർണാണ്ടസ് കളത്തിലിറങ്ങിയത്. താരത്തിന്റെ ഭാവി സംബന്ധിച്ച് ചെൽസി നിശ്ചയിച്ചിരുന്ന സ്വയം ഏർപ്പെടുത്തിയ ട്രാൻസ്ഫർ നടക്കാതെ സമയപരിധി ഒരു ദിവസം മുമ്പ് അവസാനിച്ചിരുന്നു.

25 കാരനായ ഫെർണാണ്ടസിൽ മാഞ്ചസ്റ്റർ സിറ്റി താൽപര്യം പ്രകടിപ്പിച്ചിരുന്നെങ്കിലും, ചെൽസി ആവശ്യപ്പെടുന്നതായി റിപ്പോർട്ട് ചെയ്തിരുന്ന 120 മില്യൺ പൗണ്ട് തുകയ്ക്ക് സമാനമായ ഓഫർ സിറ്റി മുന്നോട്ടുവച്ചില്ല.

ഫെർണാണ്ടസിന്റെ പേര് സ്റ്റേഡിയത്തിൽ പ്രഖ്യാപിച്ച നിമിഷം മുതൽ തന്നെ ചില ആരാധകർ അതൃപ്തി പ്രകടിപ്പിച്ചു. താരം കളത്തിലിറങ്ങിയപ്പോൾ ചില ഭാഗങ്ങളിൽ നിന്ന് കൂവൽ ഉയർന്നെങ്കിലും, മറ്റു ഭാഗങ്ങളിലെ ആരാധകർ പിന്തുണയുമായി മുദ്രാവാക്യങ്ങൾ മുഴക്കി.

ടീം അംഗങ്ങളിൽ നിന്നും ഫെർണാണ്ടസിന് ശക്തമായ പിന്തുണ ലഭിച്ചു. ക്യാപ്റ്റൻ റീസ് ജെയിംസ് കളംവിട്ടപ്പോൾ, തന്റെ സ്ഥിരം ഡെപ്യൂട്ടിയായ ഫെർണാണ്ടസിന് ക്യാപ്റ്റന്റെ ആംബാൻഡ് കൈമാറുകയും അദ്ദേഹത്തെ ആലിംഗനം ചെയ്യുകയും ചെയ്തു. തുടർന്ന് ഫെർണാണ്ടസ് പന്ത് തൊടുമ്പോഴെല്ലാം സ്റ്റേഡിയത്തിൽ കൈയടിയും കൂവലും ഒരുപോലെ ഉയർന്നു.

ഫെർണാണ്ടസിന്റെ ട്രാൻസ്ഫർ സാഗ

ഈ വേനൽക്കാലത്ത് തന്നെ ചെൽസി വിടാൻ ആഗ്രഹിക്കുന്നതായി ഫെർണാണ്ടസ് വ്യക്തമാക്കിയിരുന്നു. ആദ്യം റയൽ മാഡ്രിഡിന് താരത്തിൽ താൽപര്യമുണ്ടായിരുന്നെങ്കിലും പിന്നീട് അവർ പിന്മാറി.

പിന്നാലെ ഫെർണാണ്ടസിന്റെ പ്രതിനിധികൾ മാഞ്ചസ്റ്റർ സിറ്റിയുമായി ചർച്ചകൾ നടത്തിയെങ്കിലും, ചെൽസി നിശ്ചയിച്ച വെള്ളിയാഴ്ചത്തെ സമയപരിധിക്ക് മുമ്പ് സിറ്റി ഔദ്യോഗിക ഓഫർ നൽകിയില്ല.

ഇതോടെ ചെൽസിയുടെ പ്രധാന മിഡ്ഫീൽഡർമാരിൽ ഒരാളായ ഫെർണാണ്ടസ് ടീമിൽ തുടരുമെന്നാണ് ക്ലബ്ബിന്റെ പ്രതീക്ഷ. എന്നാൽ സെപ്റ്റംബർ 1 ന് ട്രാൻസ്ഫർ വിൻഡോ അടയ്ക്കുന്നതുവരെ താരത്തിന്റെ ഭാവി സംബന്ധിച്ച അനിശ്ചിതത്വം തുടരാൻ സാധ്യതയുണ്ട്.

ഫെർണാണ്ടസ് പരസ്യമായി ക്ലബ് വിടാനുള്ള ആഗ്രഹം പ്രകടിപ്പിച്ചതും അദ്ദേഹത്തിന്റെ പ്രതിനിധികൾ കരാറുമായി ബന്ധപ്പെട്ട് നടത്തിയ പരാമർശങ്ങളും ചില ചെൽസി ആരാധകരെ അസ്വസ്ഥരാക്കിയിട്ടുണ്ട്. അതേസമയം, വിഷയങ്ങൾ അവസാനിപ്പിച്ച് അർജന്റീന താരത്തിന് തുടർന്നും പിന്തുണ നൽകാൻ തയ്യാറായ ആരാധകരും ഏറെയാണ്.