സ്വർഗ്ഗത്തിലേക്ക് ഒരു ഗോൾ; ഇക്വഡോറിന്റെ സ്പൈഡർമാന് ആദരം

ക്വിറ്റോ: ഫുട്ബോൾ കേവലം 90 മിനിറ്റിന്റെ കളിയല്ല, ചിലപ്പോൾ അത് മരണത്തെപ്പോലും തോൽപ്പിക്കുന്ന വലിയൊരു പ്രണയമാണ്. അതിന് തെളിവായിരുന്നു 2006 ജർമ്മനി ലോകകപ്പിലെ ഇക്വഡോർ-കോസ്റ്ററിക്ക പോരാട്ടം.

ഹാംബർഗിലെ സ്റ്റേഡിയത്തിൽ കളി അവസാനിക്കാൻ നിമിഷങ്ങൾ മാത്രം ബാക്കിനിൽക്കെ, എഡിസൺ മെൻഡിസിന്റെ ക്രോസ് സ്വീകരിച്ച് ഇവാൻ കാവിയേഡസ് എന്ന ഇക്വഡോർ സ്ട്രൈക്കർ പന്ത് വലയിലേക്ക് പായിച്ചു.

സ്റ്റേഡിയം ഒന്നടങ്കം ഇരമ്പി. ഇക്വഡോർ 3-0 ന് വിജയം ഉറപ്പിച്ചു. എന്നാൽ അതിന് തൊട്ടുപിന്നാലെ കണ്ട ദൃശ്യം കായികലോകത്തിന്റെ കണ്ണ് നനയിക്കുന്നതായിരുന്നു.

ആഹ്ലാദാതിരേകത്തോടെ ഓടിയ കാവിയേഡസ് തന്റെ ഷോർട്സിനുള്ളിൽ നിന്ന് ഒരു മാസ്ക് പുറത്തെടുത്തു. മഞ്ഞയും നീലയും ചുവപ്പും കലർന്ന ഇക്വഡോറിന്റെ ദേശീയ നിറങ്ങളിലുള്ള ഒരു 'സ്പൈഡർമാൻ' മാസ്ക്!

അതവൻ മുഖത്ത് ധരിച്ച് കോർണർ ഫ്ലാഗിലേക്ക് ഓടിയപ്പോൾ സഹതാരങ്ങൾ കണ്ണീരോടെ അവനെ പൊതിഞ്ഞു. അത് കേവലമൊരു ഗോൾ ആഘോഷമായിരുന്നില്ല; സ്വർഗ്ഗത്തിലേക്ക് നോക്കി ഒരു സുഹൃത്ത് നൽകിയ വറ്റാത്ത പ്രണയത്തിന്റെ പ്രണാമമായിരുന്നു.

ഒരു മകന്റെ ആഗ്രഹവും 'സ്പൈഡർമാന്റെ' ജനനവും

എല്ലാം തുടങ്ങിയത് ഒരു പിതാവിന്റെ സ്നേഹത്തിൽ നിന്നായിരുന്നു. ഇക്വഡോർ ദേശീയ ടീമിലെ കരുത്തനായ സ്ട്രൈക്കർ ഒട്ടിലിനോ ടെനോറിയോ തന്റെ മകൻ ജോർദിയോടൊപ്പം ഒരു തീം പാർക്കിൽ പോയതായിരുന്നു ആ കഥയുടെ തുടക്കം.

അവിടെവെച്ച് കളിപ്പാട്ടങ്ങൾക്കിടയിൽ കണ്ട സ്പൈഡർമാൻ മാസ്ക് ആ കുഞ്ഞിന്റെ കണ്ണ് ഉടക്കി. കെട്ടിടങ്ങളിൽ നിന്ന് കെട്ടിടങ്ങളിലേക്ക് ചാടിമറിയുന്ന, നീതിമാനും തമാശക്കാരനുമായ ആ സൂപ്പർഹീറോയെ ജോർദിക്ക് ജീവനായിരുന്നു. മകന്റെ ആഗ്രഹം സാധിച്ച് അച്ഛൻ ആ മാസ്ക് വാങ്ങി നൽകി.

അവിടെ നിന്നാണ് ഇക്വഡോർ ഫുട്ബോളിലെ 'ഗോൾവേട്ടക്കാരനായ സ്പൈഡർമാന്റെ' ഉദയം. ജന്മനാട്ടിലെ പ്രമുഖ ക്ലബ്ബായ എമെലെക്കിലും പിന്നീട് എൽ നാഷനലിലും അവൻ ഗോൾ മെഷീനായി മാറി.

ഗോളടിച്ച ശേഷം ജേഴ്സിക്കുള്ളിൽ നിന്നോ സോക്സിനുള്ളിൽ നിന്നോ സ്പൈഡർമാൻ മാസ്ക് പുറത്തെടുത്ത് മുഖത്ത് വെച്ച് അവൻ ആരാധകരെ വിസ്മയിപ്പിച്ചു. ആ മാസ്ക് ഇക്വഡോർ ഫുട്ബോളിന്റെ ഐഡന്റിറ്റിയായി മാറി.

വിധിയുടെ ക്രൂരത; കളിമുറ്റത്തെ കരിനിഴൽ

എന്നാൽ വിധിക്ക് മറ്റൊന്നായിരുന്നു നിശ്ചയം. 2005 മേയ് മാസം. തന്റെ പഴയ ക്ലബ്ബായ എമെലെക്കിനെതിരെ എൽ നാഷനലിനായി തകർപ്പൻ ഹാട്രിക് നേടി ഇക്വഡോറിനെ 5-2 ന്റെ വിജയത്തിലേക്ക് നയിച്ച് ദിവസങ്ങൾക്കുള്ളിൽ ഒട്ടിലിനോ ടെനോറിയോ ഒരു ദാരുണമായ കാർ അപകടത്തിൽ കൊല്ലപ്പെട്ടു.

ആ അവസാന മത്സരത്തിൽ അവൻ മാസ്ക് ധരിച്ചിരുന്നില്ല. പകരം ഒരു പ്ലഷ് ഹാർട്ട് (ചുവന്ന ഹൃദയം) കയ്യിലെടുത്ത് ക്യാമറകൾക്ക് മുന്നിലേക്ക് ഓടിയെത്തി അവൻ വിളിച്ചുപറഞ്ഞു: "ഒരുപാട് സ്നേഹത്തോടെ!"

അതവന്റെ വിടപറച്ചിലായിരുന്നുവെന്ന് അന്ന് ആരും അറിഞ്ഞില്ല. 30-ാം വയസ്സിൽ ആ സ്പൈഡർമാൻ കോർട്ടിൽ നിന്നും ജീവിതത്തിൽ നിന്നും പടിയിറങ്ങി.

ടീമിന്റെ ജീവനായിരുന്ന ഒട്ടിലിനോയുടെ വേർപാട് ഇക്വഡോർ ക്യാമ്പിനെ പിടിച്ചുലച്ചു. "അവന്റെ ആ പുഞ്ചിരിയും സന്തോഷവും ടീമിലേക്ക് അവൻ പകർന്നുനൽകിയ ഊർജ്ജവും എനിക്ക് ഒരിക്കലും മറക്കാൻ കഴിയില്ല," എന്നായിരുന്നു കോച്ച് ലൂയിസ് ഫെർണാണ്ടോ സുവാരസ് അന്ന് വിതുമ്പലോടെ പറഞ്ഞത്.

ഹാംബർഗിലെ ആദരം; അമരനായി സ്പൈഡർമാൻ

ഒരു വർഷത്തിന് ശേഷം ജർമ്മനിയിൽ ലോകകപ്പ് പന്തുരുണ്ടു. ചരിത്രത്തിലാദ്യമായി ഇക്വഡോർ ലോകകപ്പിന്റെ പ്രീ-ക്വാർട്ടറിലേക്ക് കുതിക്കുകയായിരുന്നു. കോസ്റ്ററിക്കയ്ക്കെതിരെ കാവിയേഡസ് ആ മൂന്നാം ഗോൾ നേടിയപ്പോൾ, ഒട്ടിലിനോ ടെനോറിയോ എന്ന അവരുടെ പ്രിയപ്പെട്ട കൂട്ടുകാരൻ കോർട്ടിൽ പുനർജനിക്കുകയായിരുന്നു.

"അവൻ സ്വർഗ്ഗത്തിലിരുന്ന് നമ്മെ കാത്തുസൂക്ഷിക്കുന്നു, നമുക്ക് സന്തോഷം നൽകുന്നു. ടീമിനെ എപ്പോഴും സന്തോഷിപ്പിച്ചിരുന്നത് അവനായിരുന്നു," മത്സരശേഷം കാവിയേഡസ് പറഞ്ഞു.

ആ ലോകകപ്പിൽ ഇക്വഡോർ പ്രീ-ക്വാർട്ടറിൽ ഇംഗ്ലണ്ടിനോട് തോറ്റ് പുറത്തായെങ്കിലും, ആ ചരിത്രനേട്ടത്തേക്കാളും ഫുട്ബോൾ ലോകം ഇന്നും നെഞ്ചിലേറ്റുന്നത് ഹാംബർഗിലെ ആ രാത്രിയെയാണ്.

വിടപറഞ്ഞ സുഹൃത്ത്, തന്റെ യഥാർത്ഥ സൂപ്പർഹീറോ ആണെന്ന് ലോകത്തിന് മുന്നിൽ കാവിയേഡസ് തെളിയിച്ച ആ വികാരനിർഭരമായ നിമിഷം ലോകകപ്പ് ചരിത്രത്തിലെ ഏറ്റവും മനോഹരമായ ഓർമ്മയായി ഇന്നും അവശേഷിക്കുന്നു.