ക്രിസ്റ്റ്യാനോ റൊണാൾഡോ വിരമിച്ചു

ലിസ്ബൺ : ക്രിസ്റ്റ്യാനോ റൊണാൾഡോ അന്താരാഷ്ട്ര ഫുട്ബോളിൽ നിന്ന് വിരമിച്ചു. പോർച്ചുഗൽ ദേശീയ ടീമിനായി ഇനി കളിക്കില്ല. വീഡിയോ സന്ദേശത്തിലൂടെയാണ് താരം വിരമിക്കൽ തീരുമാനം അറിയിച്ചത്. ഇതോടെ 23 വർഷം നീണ്ട രാജ്യാന്തര കരിയറിനാണ് വിരാമമാകുന്നത്.

മാഞ്ചസ്റ്റർ യുണൈറ്റഡ്, റയൽ മാഡ്രിഡ് ക്ലബുകൾക്കായി ചാമ്പ്യൻസ് ലീഗ് കിരീടങ്ങൾ നേടിയിട്ടുള്ള റൊണാൾഡോ യൂറോ കപ്പ്, യുവേഫ നേഷൻസ് ലീഗ് കിരീടങ്ങളും സ്വന്തമാക്കിയിട്ടുണ്ട്. പോർച്ചുഗൽ ദേശീയ ടീമിനായി നിരവധി നേട്ടങ്ങൾ സ്വന്തമാക്കിയ ശേഷമാണ് താരത്തിന്റെ പടിയിറക്കം.

2026 ഫിഫ ലോകകപ്പായിരിക്കും തന്റെ അവസാന ലോകകപ്പെന്ന് റൊണാൾഡോ നേരത്തെ വ്യക്തമാക്കിയിരുന്നു. നവംബറിലെ രാജ്യാന്തര ഇടവേളയ്ക്ക് ശേഷം പോർച്ചുഗൽ ദേശീയ ടീമിന്റെ ഏഴാം നമ്പർ ജഴ്സി തിരികെ നൽകുമെന്ന് റൊണാൾഡോ വ്യക്തമാക്കി.

2003 ആഗസ്റ്റിലാണ് റൊണാൾഡോ പോർച്ചുഗലിനായി അരങ്ങേറ്റം കുറിച്ചത്. 234 മത്സരങ്ങളിൽ നിന്ന് 146 ഗോളുകൾ നേടിയ താരം രാജ്യാന്തര ഫുട്ബോളിലെ എക്കാലത്തെയും മികച്ച ഗോൾവേട്ടക്കാരനായാണ് പടിയിറങ്ങുന്നത്. ഏറ്റവും കൂടുതൽ രാജ്യാന്തര മത്സരങ്ങൾ കളിച്ച താരമെന്ന റെക്കോഡും താരത്തിന്റെ പേരിലാണ്.

2016ൽ പോർച്ചുഗലിന് യൂറോ കപ്പ് കിരീടം നേടിക്കൊടുക്കുന്നതിൽ നിർണായക പങ്കുവഹിച്ചു. ആറ് ലോകകപ്പുകളിൽ പോർച്ചുഗലിനെ പ്രതിനിധീകരിച്ച താരം ലോകകപ്പിന്റെ ആറ് വ്യത്യസ്ത പതിപ്പുകളിൽ ഗോൾ നേടുന്ന ആദ്യ താരമെന്ന നേട്ടവും സ്വന്തമാക്കി. എന്നാൽ ലോകകപ്പ് കിരീടം നേടുകയെന്ന സ്വപ്നം സാക്ഷാത്കരിക്കാനായില്ല. സ്പെയിനിനെതിരായ പ്രീക്വാർട്ടറിൽ 1-0ന് തോറ്റതോടെയാണ് അവസാന ലോകകപ്പ് പോരാട്ടത്തിന് വിരാമമായത്.

ദേശീയ ടീമിനൊപ്പമുള്ള യാത്ര അവസാനിപ്പിക്കുക എളുപ്പമായിരുന്നില്ലെന്ന് റൊണാൾഡോ വീഡിയോ സന്ദേശത്തിൽ പറഞ്ഞു. അടുത്ത തലമുറയ്ക്ക് അവസരം കൈമാറേണ്ട സമയമായെന്നും 2003 ആഗസ്റ്റിൽ തുടങ്ങിയ യാത്ര തന്റെ ജീവിതം മാറ്റിമറിച്ചെന്നും താരം കൂട്ടിച്ചേർത്തു.

ദേശീയ ടീമിനായി കളിച്ച കാലയളവിൽ ഗോളുകളും റെക്കോഡുകളും കിരീടങ്ങളും മാത്രമല്ല നേടിയതെന്നും ലോകത്തിന്റെ വിവിധ ഭാഗങ്ങളിലുള്ള പോർച്ചുഗീസ് ജനതയുമായി വലിയ ബന്ധം സ്ഥാപിക്കാനായെന്നും റൊണാൾഡോ പറഞ്ഞു. രാജ്യത്തിനായി കളിക്കുമ്പോൾ എപ്പോഴും പരമാവധി മികവ് പുറത്തെടുക്കാൻ ശ്രമിച്ചെന്നും താരം വ്യക്തമാക്കി.

Updating...