കളംവിട്ടിട്ടും അവസാനിക്കാത്ത തരംഗം; സോഷ്യൽ മീഡിയയിൽ നിറഞ്ഞ് ക്രിസ്റ്റ്യാനോ റൊണാൾഡോ

ലിസ്ബൺ : അന്താരാഷ്ട്ര ഫുട്ബോളിൽനിന്ന് വിരമിക്കൽ പ്രഖ്യാപിച്ചെങ്കിലും സോഷ്യൽ മീഡിയയിൽ നിറഞ്ഞുനിൽക്കുകയാണ് പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോ. പത്ര-ദൃശ്യ മാധ്യമങ്ങളിലും റോണോ വിശേഷങ്ങൾ അവസാനിച്ചിട്ടില്ല. കളിക്കളത്തിലെ സുവർണ നിമിഷങ്ങളും അവിസ്മരണീയ ഗോളുകളും നേട്ടങ്ങളും പങ്കുവെച്ച് ആരാധകർ താരത്തിന് ആദരമർപ്പിക്കുകയാണ്.

റൊണാൾഡോ എക്‌സിൽ പങ്കുവെച്ച വൈകാരിക വീഡിയോയ്ക്ക് 49 മില്യൺ കാഴ്ചകാരെയാണ് ലഭിച്ചത്. വിരമിക്കൽ പ്രഖ്യാപനത്തിന് പിന്നാലെ താരത്തിന്റെ 23 വർഷത്തെ രാജ്യാന്തര കരിയറിലെ ഓർമകൾ മാധ്യമങ്ങളിൽ നിറയുകയാണ്.

റൊണാൾഡോയുടെ പഴയ മത്സരങ്ങളുടെയും നിർണായക ഗോളുകളുടെയും ചിത്രങ്ങളും വീഡിയോകളും ആരാധകർ വ്യാപകമായി പങ്കുവെക്കുന്നുണ്ട്. മാഞ്ചസ്റ്റർ യുണൈറ്റഡ്, റയൽ മാഡ്രിഡ്, യുവന്റസ് തുടങ്ങിയ ക്ലബ്ബുകൾക്കായുള്ള പ്രകടനങ്ങളും പോർച്ചുഗൽ ജഴ്സിയിൽ നേടിയ ചരിത്രനേട്ടങ്ങളുമെല്ലാം വീണ്ടും ചർച്ചയാകുന്നു. വിരമിക്കൽ പ്രഖ്യാപനത്തിന് പിന്നാലെ താരത്തിന്റെ കരിയറിലെ ഓരോ ഘട്ടവും ഓർത്തെടുക്കുകയാണ് ഫുട്ബോൾ ലോകം.

റൊണാൾഡോയുടെ കുടുംബ വിശേഷങ്ങൾ ആരാധകർക്ക് ഏറ്റവും പ്രിയപ്പെട്ടതാണ്. മകൻ അണ്ടർ 17 പോർച്ചുഗൽ ടീമിനായി കളിക്കാനിറങ്ങി രണ്ടാമത്തെ ദിവസമായിരുന്നു റോണോ വിരമിക്കൽ പ്രഖ്യാപിച്ചത്. അച്ഛന്റെയും മകന്റെയും ചിത്രങ്ങൾ ചേർത്തുള്ള പോസ്റ്റുകൾ വ്യാപകമാണ്.

കേരളത്തിലെ ആരാധകർക്കിടയിലും വിരമിക്കലിന്റെ അലകൾ അടങ്ങാതെ ആഞ്ഞടിക്കുകയാണ് . കൊച്ചു കുട്ടികളും കൗമാരക്കാരും യുവജനങ്ങളും മുതിർന്നവരും ഒരു പോലെ ഫുട്ബോൾ ഇതിഹാസത്തെ വാഴ്ത്തുകയാണ്.

തിരുവനന്തപുരം ടെക്നോപാർക്കിലെ ഐടി ജീവനക്കാരുടെ ക്ഷേമസംഘടനയായ പ്രതിധ്വനിയുടെ സ്പോർട്സ് ഫോറം പങ്കുവെച്ച പ്രത്യേക പോസ്റ്റർ ശ്രദ്ധേയമായി. റൊണാൾഡോയുടെ മുഖവും കരിയറിലെ വിവിധ ഘട്ടങ്ങളിലെ ചിത്രങ്ങളും ചേർത്തൊരുക്കിയ പോസ്റ്ററിൽ 'എ ലെജൻഡ് റിട്ടയേഴ്സ്' എന്ന സന്ദേശത്തോടെയാണ് ആദരമർപ്പിച്ചിരിക്കുന്നത്.

2003ൽ പോർച്ചുഗൽ ദേശീയ ടീമിനായി അരങ്ങേറിയ താരം 234 മത്സരങ്ങളിൽനിന്ന് 146 ഗോളുകളുമായാണ് വിടപറയുന്നത്. 2016ലെ യൂറോ കപ്പ് വിജയവും 2019, 2025 വർഷങ്ങളിലെ നേഷൻസ് ലീഗ് കിരീടങ്ങളും താരത്തിന്റെ കരിയറിലെ പ്രധാന നേട്ടങ്ങളാണ്. അന്താരാഷ്ട്ര ഫുട്ബോളിൽ ഏറ്റവും കൂടുതൽ മത്സരങ്ങൾ കളിച്ചതിന്റെയും ഏറ്റവും കൂടുതൽ ഗോളുകൾ നേടിയതിന്റെയും റെക്കോഡുകളും റൊണാൾഡോയുടെ പേരിലാണ്.

ദേശീയ ടീമിനായുള്ള യാത്ര അവസാനിച്ചെങ്കിലും ആരാധകരുടെ മനസിൽനിന്ന് റൊണാൾഡോയുടെ സാന്നിധ്യം മായുന്നില്ല. കളിക്കളത്തിലെ നേട്ടങ്ങൾക്കൊപ്പം താരത്തിന്റെ ജീവിതയാത്രയും പോരാട്ടങ്ങളും പ്രചോദനമായ നിമിഷങ്ങളും പങ്കുവെച്ചാണ് ആരാധകർ തങ്ങളുടെ പ്രിയ താരത്തോട് നന്ദി പറയുന്നത്. ഫുട്ബോളിൽനിന്ന് വിടവാങ്ങുമ്പോഴും സോഷ്യൽ മീഡിയയിൽ തുടരുന്ന റൊണാൾഡോ തരംഗം അദ്ദേഹത്തിന്റെ ആഗോള ആരാധകപിന്തുണയുടെ തെളിവായി മാറുകയാണ്.