കിങ്‌സ്‌ കപ്പ്‌: ബാഴ്സയെ ​ഗോളിൽ മുക്കി അത്‌ലറ്റികോ

മാഡ്രിഡ്‌: സ്‌പാനിഷ്‌ കിങ്‌സ്‌ കപ്പ്‌ ഫുട്‌ബോൾ ആദ്യപാദ സെമിയിൽ ബാഴ്‌സലോണയെ ​ഗോളിൽ മുക്കി അത്‌ലറ്റികോ മാഡ്രിഡ്. കിങ്‌സ്‌ കപ്പിൽ നിലവിലെ ജേതാക്കളായ ബാഴ്‌സയെ എതിരില്ലാത്ത നാല് ​ഗോളിനാണ് അത്‌ലറ്റികോ തകർത്തത്. ഇതോടെ ഫൈനലിലേക്കുള്ള വഴിയിൽ ഡീഗോ സിമിയോണിയുടെ ടീം വലിയ ചുവടുവെപ്പ് നടത്തി.

മത്സരത്തിന്റെ ആദ്യ പകുതിയിൽ കാഴ്ചവെച്ച മോശം പ്രകടനത്തിലൂടെ തങ്ങളുടെ തകർച്ചയ്ക്ക് ബാഴ്സലോണ തന്നെ വഴിയൊരുക്കി. ഏഴാം മിനിറ്റിൽ ബാഴ്‌സ ഡിഫൻഡർ എറിക് ഗാർസിയയുടെ ഓൺ​ഗോളിലൂടെയാണ് അത്‌ലറ്റികോ ലീഡ് നേടിയത്. എറിക് ഗാർസിയ നൽകിയ ബാക്ക് പാസ് നിയന്ത്രിക്കാൻ ബാഴ്സ ​ഗോൾകീപ്പർക്ക് കഴിയാതെ പന്ത് വലയിൽ കയറുകയായിരുന്നു.

തുടർന്ന് 14-ാം മിനിറ്റിൽ ഒൺടോയ്‌ൻ ഗ്രീസ്‌മാനിലൂടെ അത്‌ലറ്റിക്കോ ലീഡ് ഉയർത്തി. 33-ാം മിനിറ്റിൽ അഡമോള ലുക്മാനും ​ഗോൾ കണ്ടെത്തി. ജൂലിയൻ അൽവാരെസ്‌ നൽകിയ പാസിൽ നിന്നായിരുന്നു ടീമിന്റെ മൂന്നാം ഗോൾ നേടി. ആദ്യ പകുതിയുടെ ഇഞ്ചുറി ടൈമിൽ അൽവാരസ് കൂടി ലക്ഷ്യം കണ്ടതോടെ അത്‌ലറ്റിക്കോയുടെ ലീഡ് 4-0 ആയി.

കൂടുതൽ ഗോളുകൾ നേടാനുള്ള അവസരങ്ങൾ അത്‌ലറ്റിക്കോയ്ക്കും ലഭിച്ചെങ്കിലും അവ ലക്ഷ്യത്തിലെത്തിക്കാനായില്ല. ബാഴ്സലോണയ്ക്ക് താളം കണ്ടെത്താൻ കഴിയാതിരുന്ന മത്സരത്തിൽ അത്‌ലറ്റിക്കോയുടെ ശക്തമായ പ്രതിരോധം തകർക്കാൻ ടീമിനായില്ല. മാർച്ച് മൂന്നിനാണ് രണ്ടാം പാദ മത്സരം.