ടീം വിജയിച്ചു എന്ന ധാരണയിൽ തയ്യാറാക്കിയ അവധി പ്രഖ്യാപന പോസ്റ്റ് ട്വീറ്റായി; അർജന്റീനൻ പ്രസിഡന്റിന് ട്രോൾ മഴ

ബ്യൂണസ് ഐറിസ്: ലോകകപ്പ് ഫൈനലിൽ സ്പെയിനോട് അർജന്റീന പരാജയപ്പെട്ടതിന് പിന്നാലെ അർജന്റീനൻ പ്രസിഡന്റ് ഹാവിയർ മിലെയ് അബദ്ധത്തിൽ പോസ്റ്റ് ചെയ്ത ട്വീറ്റ് വലിയ ചർച്ചയാകുന്നു.

ടീം വിജയിച്ചു എന്ന ധാരണയിൽ മുൻകൂട്ടി തയ്യാറാക്കിയ അവധി പ്രഖ്യാപനമാണ് പ്രസിഡന്റിന്റെ ഔദ്യോഗിക പേജിൽ നിന്ന് അബദ്ധത്തിൽ പുറത്തുവന്നത്. മത്സരം തോറ്റെങ്കിലും, മുൻകൂട്ടി ഷെഡ്യൂൾ ചെയ്ത പോസ്റ്റ് ഡിലീറ്റ് ചെയ്യാൻ മറന്നതാണ് ഇതിന് കാരണമായതെന്ന് കരുതപ്പെടുന്നു.

ലോകകപ്പ് വിജയത്തിന്റെ ആഘോഷങ്ങൾക്കായി ഒരു ദിവസം ദേശീയ അവധിയായി പ്രഖ്യാപിക്കുമെന്നും, തീയതി കളിക്കാരുടെയും കോച്ചിംഗ് സ്റ്റാഫിന്റെയും താല്പര്യപ്രകാരം തീരുമാനിക്കുമെന്നുമാണ് പോസ്റ്റിൽ ഉണ്ടായിരുന്നത്.

ഇതിന് ഏതാനും മണിക്കൂറുകൾക്ക് മുൻപ് ടീമിന്റെ പോരാട്ടവീര്യത്തെ അഭിനന്ദിച്ചുകൊണ്ട് മിലി മറ്റൊരു പോസ്റ്റ് പങ്കുവെച്ചിരുന്നു. എന്നാൽ, പരാജയത്തിന് പിന്നാലെ വിജയാഘോഷത്തെക്കുറിച്ചുള്ള പോസ്റ്റ് പ്രത്യക്ഷപ്പെട്ടതോടെ പ്രസിഡന്റ് വലിയ ട്രോളുകൾക്കാണ് ഇരയായത്.

ഫെറാൻ ടോറസ് അധികസമയത്ത് നേടിയ ഏക ഗോളിലാണ് സ്‌പെയിൻ ലോകകപ്പ് സ്വന്തമാക്കിയത്. ഇതോടെ അർജന്റീനയുടെയും ലയണൽ മെസ്സിയുടെയും സുവർണ്ണകാലഘട്ടത്തിന് ഒരു തിരിച്ചടിയായി ഈ പരാജയം മാറി.

2010-ന് ശേഷം സ്പെയിൻ നേടുന്ന രണ്ടാമത്തെയും, 19-കാരൻ ലാമിൻ യമാലിന്റെ കരിയറിലെ ഏറ്റവും വലിയ നേട്ടവുമായി ഇത് മാറി. യൂറോ കപ്പ് ജേതാക്കളായ സ്പെയിൻ ഇതോടെ ലോകകപ്പും സ്വന്തമാക്കി ഇരട്ട നേട്ടവുമായി കുതിക്കുകയാണ്.