ചെൽസിയെ അട്ടിമറിച്ച് ബ്രെന്റ്ഫോർഡ്; 1938ന് ശേഷം സ്വന്തം തട്ടകത്തിൽ വിജയം

ലണ്ടൻ: ഇം​ഗ്ലീഷ് പ്രീമിയർ ലീ​ഗിൽ ബ്രെന്റ്ഫോർഡിന് മുന്നിൽ തരിപ്പണമായി ചെൽസി. എതിരില്ലാത്ത മൂന്ന് ​ഗോളുകൾക്കാണ് ബ്രെന്റ്ഫോർഡ് മുൻചാമ്പ്യന്മാരെ തോൽപിച്ചത്. 1938 ന് ശേഷം ചെൽസിക്കെതിരെ സ്വന്തം മൈതാനത്ത് ബ്രെന്റ്ഫോർഡ് നേടുന്ന ആദ്യ വിജയമാണിത്.

സ്വന്തം തട്ടകത്തിൽ രണ്ടാം പകുതിയിലാണ് ബ്രെന്റ്ഫോർഡ് മൂന്ന് ഗോളുകളും നേടിയത്. 61-ാം മിനിറ്റിൽ ജെയ്ഡൻ ആന്റണിയിലൂടെ ബ്രെന്റ്ഫോർഡ് അക്കൗണ്ട് തുറന്നു. തുടർന്ന് 83-ാം മിനിറ്റിൽ ഇഗോർ തിയാഗോയും ഇഞ്ചുറി ടൈമിൽ (90+4') ഫാബിയോ കാര്‍വാലോയും വലകുലുക്കിയതോടെ ചെൽസിക്കെതിരെ ബ്രെന്റ്ഫോർഡ് വമ്പൻ വിജയം ആഘോഷിച്ചു.

ജയത്തോടെ ബ്രെന്റ്ഫോർഡ് മൂന്നാം സ്ഥാനത്തേക്ക് മുന്നേറി. ചെൽസി ഏഴാം സ്ഥാനത്താണ് തുടരുന്നത്.