അൾജീരിയൻ കടമ്പ കടന്ന് സ്വിറ്റ്‌സർലൻഡ്‌; പ്രീ ക്വാർട്ടറിൽ

ഹ‍ൂസ്‌റ്റൺ: ആഫ്രിക്കൻ ശക്തികളായ അൾജീരിയയെ തകർത്ത് സ്വിറ്റ്‌സർലൻഡ്‌ ലോകകപ്പ്‌ പ്രീ ക്വാർട്ടർ കടന്നു. പ്രധാന ടൂർണമെന്റുകളിൽ സ്ഥിരതയാർന്ന പ്രകടനം നടത്തുന്ന സ്വിസ്‌ സംഘം മറുപടിയില്ലാത്ത രണ്ട് ​ഗോളുകൾക്കാണ് അൾജീരിയയെ തകർത്തത്. ബ്രീൽ എംബോളോയും ഡാൻ എൻഡോയുമാണ് ടീമിനായി ​ഗോൾ നേടിയത്. പ്രീ ക്വാർട്ടറിൽ കൊളംബിയ- ഘാന മത്സര വിജയികളാവും എതിരാളികൾ.

നിർണായക മത്സരത്തിൽ മികച്ച പന്തടക്കത്തോടെ അൾജീരിയയാണ് കളിമെനഞ്ഞത്. എന്നാൽ അവസരങ്ങൾ ​ഗോളാക്കി മാറ്റാൻ ടീമിന് കഴിയാതെപോയത് തിരിച്ചടിയായി. ആദ്യ മിനിറ്റുകളിൽ സ്വിസ് ​ഗോൾ മുഖത്ത് അൾജീരിയ വലിയ ആക്രമണങ്ങള്‍ നടത്തി. അഞ്ചാം മിനിറ്റിലും ഏഴാം മിനിറ്റിലും ​​ഗോളിയെ പരീക്ഷിച്ചു. എന്നാൽ പ്രത്യാക്രമണത്തിലൂടെ പത്താം മിനിറ്റിൽ സ്വിസ് പട ​ലീഡ് നേടി. ജൊഹാൻ മൻസാംബിയുടെ അസിസ്റ്റിൽ നിന്നാണ് ​ഗോൾ. ബോക്സിനുള്ളിൽ നിന്നും ലഭിച്ച പന്തുമായി മുന്നേറിയ മൻസാംബി, അൾജീരിയൻ പ്രതിരോധത്തെ മറികടന്ന് ബ്രീൽ എംബോളോയ്ക്ക് ക്രോസ് നൽകുകയായിരുന്നു. മികച്ചൊരു ബാക്ക് ഹീല്‍ ടെച്ചിലൂടെ താരം പന്ത് ലക്ഷ്യത്തിലെത്തിച്ചു.

രണ്ടാം പകുതിയുടെ തുടക്കത്തിൽ തന്നെ സ്വിറ്റ്‌സർലൻഡ്‌ ലീഡ് ഉയർത്തി. 46-ാം മിനിറ്റിൽ ഡാൻ എൻഡോയാണ് ​ഗോൾ നേടിയത്. പാഴായ നിരവധി ആക്രമണങ്ങളും പ്രത്യാക്രമണങ്ങളും പിന്നീട് കണ്ടെങ്കിലും ​ഗോൾ മാത്രം വിട്ടു നിന്നു. 1954ന് ശേഷം ക്വാർട്ടര്‍ പ്രവേശനമാണ് സ്വിറ്റ്‌സർലൻഡിന്റെ ലക്ഷ്യം. 12 തവണ ലോകകപ്പ് കളിച്ച ടീം മൂന്ന് തവണ ക്വാർട്ടറിൽ എത്തി. 1934, 38, 54 വർഷങ്ങളിലായിരുന്നു ക്വാർട്ടർ പ്രവേശനം.